ကထီၣ်ဒုးမၤန့ၢ် ဖၣ်ပူၣ်သုးတၢ်တိၥ်ကူၣ်ကျဲၤခိၣ်သ့ၣ်အဂီၢ် ထီၣ်ဒုးဆိ၀ဲ သုးကလၢၤတဖၣ်လၢ အိၣ်ဖဲသုးတၢ်တိၥ်ကူၣ်ကျဲၤခိၣ်သ့ၣ်အခိၣ်ဃၢၤတဖၣ်

လါဒံၣ်စ့ဘၢၣ်(၁၁)သီ,၂၀၂၄နံၣ်

ခ့ၣ်အဲၣ်ယူၣ်-မုၢ်တြီၢ်တၢ်ကစီၣ် ပၥ်ဖျါဃၥ်၀ဲလၢ ၂၀၂၄နံၣ်, လါနိၣ်၀့ဘၢၣ်, (၁)လါအတီၢ်ပူၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၅), ကီၢ်ရ့ၣ်မုၢ်တြီၢ်ဟီၣ်က၀ီၤအပူၤ တၢ်ဒုးကဲထီၣ်တ့ၢ်လၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးပၥ်ဖှိၣ်ဒီး သုးကီၣ်ကးအဘၢၣ်စၢၤ အိၣ်ထီၣ်၀ဲ(၄၃)ဘျီဒီး သုးကီၣ်ကးအသုး သံ၀ဲ(၉၀)ဂၤဃၥ်ဃၥ်န့ၣ်လီၤ.

တၢ်ပၢၢ်ဆၢသုးပၥ်ဖှိၣ် အပှၤဘၣ်မူဘၣ်ဒါတဂၤ စံး၀ဲလၢ”မ့ဘၣ်တဲနီၢ်ကီၢ်န့ၣ် အိၣ်တ့ၢ်ဒၣ်ထဲ သုးတၢ်တိၥ်ကူၣ်ကျဲၤခိၣ်သ့ၣ်လီၤ. ဒ်သိးကထီၣ်ဒုးမၤန့ၢ် သုးတၢ်တိၥ်ကူၣ်ကျဲၤခိၣ်သ့ၣ်အဂီၢ် တၢ်ထီၣ်ဒုးဆိကွံၥ် သုးကလၢၤတဖၣ်လၢအိၣ်ဖဲ သုးတၢ်တိၥ်ကူၣ်ကျဲၤခိၣ်သ့ၣ်အခိၣ်အဃၢၤလီၤ. လီၤဂၥ်ဒ်သိး တၢ်ထီၣ်ဒုးမၤန့ၢ်ကွံၥ် သုးကလၢၤတဖၣ်လၢ ကမၤစၢၤသုးတၢ်တိၥ်ကူၣ်ကျဲၤခိၣ်သ့ၣ်အဂီၢ် ”န့ၣ်လီၤ.

တၢ်ထီၣ်ဒုးမၤန့ၢ်ကွံၥ် သုးကီၣ်ကးသုးကလၢၤတဖၣ်အဃိ သုးကီၣ်ကးတပၤ ဟဲဆှၢန့ၢ်အပှၤသုးဖိ တၢ်အီၣ်တၢ်အီဒီးစုက၀ဲၤပီးလီတဖၣ် လၢကလံၤကျါလီၤအဂ့ၢ် တဲ၀ဲန့ၣ်လီၤ.

“မ့ဘၣ်တဲ ဖၣ်ပူၣ်သုးတၢ်တိၥ်ကူၣ်ကျဲၤခိၣ်သ့ၣ်န့ၣ် တၢ်ကဟဲမၤစၢၤလၢ ဟီၣ်ခိၣ်မဲၥ်ဖံးခိၣ်တန့ၢ်လၢၤဘၣ်. အမၤစၢၤတန့ၢ်လၢၤဘၣ်န့ၣ် အိၣ်ဖးယံၤလံဒီး သိၣ်မှံသုးပၥ်ဖှိၣ်တဖၣ် ဒီၣ်တဲၥ်ကွံၥ်ဃၥ်အီၤလီၤ. FFT ဒြိသုးတဖၣ်စ့ၢ်ကီး လဲၤတ့ၢ်လီၤဒြိမ့ၣ်ပိၢ်တဖၣ်လီၤ. အ၀ဲသ့ၣ် ဟဲထီၣ်လၢခီၣ်တန့ၢ်လၢၤဘၣ်. ဟဲတ့ၢ်လီၤန့ၢ် အပှၤသုးဖိတၢ်အီၣ်တၢ်အီဒီးစုက၀ဲၤပီးလီတဖၣ် လၢကလံၤကျါ”အဂ့ၢ်န့ၣ်လီၤ. 

တၢ်ဒုးကဲထီၣ်သးလၢKNLAသုးပၥ်ဖှိၣ်ဒီးသုးကီၣ်ကးအဘၢၣ်စၢၤတကးဘၣ်ခီဖျိသုးကီၣ်ကးအကလံၤကျါတၢ်ဒုးတဖၣ်အဃိ လီၢ်က၀ီၤဒူသ၀ီတဖၣ် ဘၣ်လဲၤဃ့ၢ်ပူၤဖျဲးသးဆူ ကတၢတံဒီး ကမးမီ၀့ၢ်တပၤန့ၣ်လီၤ.

လါအီးကထိဘၢၣ် (၂၉)အနံၤန့ၣ် KNLAဒီးသုးပၥ်ဖှိၣ်တဖၣ် ထီၣ်ဒုးမၤန့ၢ် သုးကီၣ်ကးခီပူးသုးကလၢၤလၢ သုးအဂံၢ်အဘါအိၣ်(၁၀၀)ဘျဲၣ်အသိး လါနိၣ်၀့ဘၢၣ်(၉)သီအနံၤစ့ၢ်ကီး ထီၣ်ဒုးမၤန့ၢ်၀ဲ သုးကီၣ်ကးကူဆ့းတိၤတၢ်ဘံၢ်တၢ်ဘၢသုးကလၢၤတဖျၢၣ်န့ၣ်လီၤ.

ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးသုးပၥ်ဖှိၣ်တဖၣ် ဒ်သိးကထီၣ်ဒုးမၤနၢၤ ဖၣ်ပူၣ်သုးတၢ်တိၥ်ကူၣ်ကျဲၤခိၣ်သ့ၣ်အဂီၢ် က၀ီၤကးတံၥ်ဒုး၀ဲအဖၢမုၢ်ဒံးန့ၣ်လီၤ.

Ref: VOA