လါအီးကထိဘၢၣ်(၁၀)သီ,၂၀၂၄နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်မုၢ်တြီၢ်ဟီၣ်က၀ီၤအပူၤ သုးကီၣ်ကးမၤအါထီၣ်ကလံၤကျါတၢ်ဒုးတဖၣ်အဃိ လီၢ်က၀ီၤကမျၢၢ်တၢ်သံတၢ်ပှၢ်အိၣ်အါထီၣ်အဂ့ၢ် ကီၢ်ရ့ၣ်မုၢ်တြီၢ် ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၢ်ဒိၣ် စံး၀ဲန့ၣ်လီၤ.
“အီးကထိဘၢၣ် လါစးထီၣ်န့ၣ် သုးကီၣ်ကးသူအါထီၣ်ကလံၤကျါတၢ်ဒုးတဖၣ်လီၤ. ဟဲခးလီၤတၢ်လၢကဘီယူၤခဲအံၤခဲအံၤလီၤ. တၢ်လီၢ်လၢအ၀ဲသ့ၣ်သုးကွံၥ်အလီၢ်တဖၣ်အပူၤ ကမျၢၢ်တဖၣ်, တၢ်ကရၢကရိတဖၣ် သုအိၣ်တန့ၢ်အဂီၢ် ဟဲမၤပျံၤမၤဖုး၀ဲအဂ့ၢ်” သုးခိၣ်ဒိၣ်ဂီၢ်ဂ့ၢ် စီၤကျၢၢ်ဒိၣ် စံး၀ဲန့ၣ်လီၤ.
ခီဖျိလၢသုးကီၣ်ကးဟဲဒုးတၢ်လၢကလံၤကျါအဃိ လါအီးကထိဘၢၣ်တၢတနွံအတီၢ်ပူၤ ဘၣ်သံ၀ဲ ၀့ၢ်ဖၣ်ပူၣ်ကမျၢၢ်ပိၥ်မုၣ်(၁)ဂၤဒီးဒီဖိပၢ်(၂)ဂၤလၢအိၣ်ဖဲ ဘူသိၣ်ကီၢ်ဆၣ်ဘၣ်အဃိ ဘၣ်သံ၀ဲ ခဲလၢၥ်(၃)ဂၤအဂ့ၢ် တၢ်သ့ၣ်ညါဘၣ်န့ၣ်လီၤ.
ဖဲအပူၤကွံၥ် လါမရှးအတီၢ်ပူၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီး သုးပၥ်ဖှိၣ်တဖၣ် ထီၣ်ဒုး၀ဲ၀့ၢ်ဖၣ်ပူၣ်၀ံၤ ထီၣ်ဒုးမၤန့ၢ်၀ဲ ခီၣ်သုးရ့ၣ် ခလရ (၁၉), ခီၣ်ချ့သုးရ့ၣ် ခမရ (၄၃၄) ဒီး သုးတၢ်ပီးတၢ်လီသုးကလၢၤ(၆၄၂)တဖၣ်န့ၣ်လီၤ.
ကတီၢ်ခဲအံၤ (KNLA)ဒီး သုးပၥ်ဖှိၣ်တဖၣ်က၀ီၤကးတံၥ်ဃၣ်၀ဲ သုးကီၣ်ကး မုၢ်ထီၣ်ကလံၤထံးသုး၀ဲၤလီၢ်ခိၣ်သ့ၣ်(ရတခ)အစုတီၤဖီလၥ် သုးတၢ်တိၤကူၣ်ကျဲၤခိၣ်သ့ၣ် စဗခ(၁), ခမရ (၃၄၀) ဒီး (၃၄၁)တဖၣ်လၢ အိၣ်ဆီလီၤအသးဖဲ ၀့ၢ်ဖၣ်ပူၤန့ၣ်လီၤ. တၢ်ဟဲမၤပှဲၤအါထီၣ်သုးအဂံၢ်အဘါဆူ သုးရ့ၣ်တဖၣ်အံၤအအိၣ်သုတန့ၢ်အဂီၢ် တၢ်ဒီၣ်တဲၥ်ကးတံၥ်ဃၣ်၀ဲအဂ့ၢ် ကီၢ်ရ့ၣ်မုၢ်တြီၢ်ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၢ်ဒိၣ် စံး၀ဲန့ၣ်လီၤ.
ဖဲအပူၤကွံၥ် လါမးရှးအတီၢ်ပူၤ စးထီၣ်လၢ တၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုး၀ဲ၀့ၢ်အဆၢကတီၢ်ဒီးတုၤခဲအံၤ ကမျၢၢ်လၢအိၣ်ဆိးဖဲ ၀့ၢ်ဖၣ်ပူၣ်ပူၤတဖၣ် ဘၣ်ဃ့ၢ်ပူၤဖျဲးသး၀ံၤ ဘၣ်ကွၢ်ဆၢၣ်မဲၥ်ဘၣ် တၢ်ကီတၢ်ခဲအါမးန့ၣ်လီၤ.
Ref: Mizzima
