လါအီးကထိဘၢၣ်(၃)သီ,၂၀၂၄နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ဒူသထူၣ်, ဖၣ်အၣ်ကီၢ်ဆၣ်အပူၤ သုးခိၣ်ဘိၤဘံၣ်တီခိၣ်ရိၣ်မဲ(DKBA)ထုးဖးကရၢအပှၤလၢလဲၤဘှီထီၣ်သုးကလၢၤသီ ဖဲနီဖးဒိၣ်ကရူၢ် ၀ၣ်တရဲၢ်သ၀ီပူၤ ကၠိမဲၥ်ညါတဖၣ် တၢ်ဟ့ၣ်ပလီၢ်လဲၤတ့ၢ်လီၤဒြိမ့ၣ်ပိၢ်အဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.
သုးခိၣ်ဘိၤဘံၣ်တီခိၣ်ရိၣ်မဲ(DKBA)ထုးဖးကရၢ လၢဟဲဘှီထီၣ်သုးကလၢၤသီ ဖဲ၀ၣ်တရဲၢ်သ၀ီကၠိမဲၥ်ညါအံၤ လီၢ်က၀ီၤကမျၢၢ်တဖၣ် ဒီးKNUတပၤတတူၢ်လိၥ်၀ဲဘၣ်ဒီး ကဲထီၣ်တၢ်ဂ့ၤလိၥ်ခဲအံၤခဲအံၤလီၤအဂ့ၢ် တၢ်သ့ၣ်ညါဘၣ်န့ၣ်လီၤ.
“KNU တပၤတတူၢ်လိၥ်၀ဲဘၣ်. လီၢ်က၀ီၤကမျၢၢ်တဖၣ်စ့ၢ်ကီး တတူၢ်လိၥ်၀ဲဘၣ်. ကဲထီၣ်တၢ်ဂ့ၢ်လိၥ်ဘှီလိၥ်ခဲအံၤခဲအံၤ ဘၣ်ဆၣ် ဖဲလါစဲးပထ့ဘၢၣ် တၢတနွံအတီၢ်ပူၤလံၤလံၤ (DKBA)အပှၤသုးဖိတဖၣ် ဟဲဘှီထီၣ်၀ဲသုးကလၢၤသီန့ၣ်လီၤ. လါစဲးပထ့ဘၢၣ်(၂၉)သီအနံၤ,ဟါလီၤခီအဆၢကတီၢ်,တၢ်ပၢၢ်ဆၢသုးပၥ်ဖှိၣ်တဖၣ်အဆိကတၢၢ်တဘျီတၢ်ဟ့ၣ်ပလီၢ်လဲၤတ့ၢ်လီၤလၢဒြိမ့ၣ်ပိၢ်(၁)ဖျၢၣ်”အဂ့ၢ် လီၢ်က၀ီၤကမျၢၢ်တဂၤ တဲ၀ဲန့ၣ်လီၤ.
သုးကလၢၤသီလၢ ဟဲဘှီထီၣ်၀ဲ ဖဲ၀ၣ်ဒရဲၢ်သ၀ီအံၤ အိၣ်၀ဲဒၣ်ဖဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၁)ဟီၣ်က၀ီၤပူၤအဃိ လီၢ်က၀ီၤကမျၢၢ်တဖၣ်ဘၣ်ယိၣ်လၢ တၢ်ဒုးကကဲထီၣ်သးလၢ ကညီဖိကဒဲကဒဲအဂ့ၢ် တၢ်သ့ၣ်ညါဘၣ်န့ၣ်လီၤ.
KNUတပၤတတူၢ်လိၥ်၀ဲလၢ သုးခိၣ်ဘိၤဘံၣ်တီခိၣ်ရိၣ်မဲ(DKBA)ထုးဖးကရၢ ဟဲဘှီထီၣ်သုးကလၢၤသီအဖီခိၣ် တဲဃၣ်၀ဲဘၣ်ဆၣ် သုးခိၣ်ဘိၤဘံၣ်တပၤစ့ၢ်ကီး လီၢ်က၀ီၤကမျၢၢ်တဖၣ် မ့ၢ်တတူၢ်လိၥ်သနၥ်က့ ကဘှီထီၣ်၀ဲလီၤအဂ့ၢ် တဲဃၣ်၀ဲန့ၣ်လီၤ.
