လါအီးကထိဘၢၣ်(၁)သီ,၂၀၂၄နံၣ်
သုးကီၣ်ကးအပှၤသုးဖိအါတက့ၢ်လၢ ဟးဆှၣ်သမံးသမိးတၢ်လၢ ဒ၀ဲၢ်၀့ၢ်ပူၤအံၤ မ့ၢ်ဒ၀ဲၢ်လီၢ်က၀ီၤဖိ ပှၤသးစၢ်တဖၣ်လီၤအဂ့ၢ် ပှၤအိၣ်လၢဒ၀ဲၢ်၀့ၢ်ပူၤတဖၣ် တဲ၀ဲန့ၣ်လီၤ.
အပူၤကွံၥ် ဒ၀ဲၢ်၀့ၢ်ပူၤအိၣ်ဒၣ်ထဲသုးကီၣ်ကးအသုးလၢလီၢ်က၀ီၤယံၤတဖၣ်လီၤဘၣ်ဆၣ် စးထီၣ်လၢအပူၤကွံၥ်(၂)လါန့ၣ် တၢ်ထံၣ်ဘၣ်၀ဲ သုးကီၣ်ကးအသုးအါအါဂီၢ်ဂီၢ်လၢ အစံးကတိၤဘၣ် ဒ၀ဲၢ်ကျိၥ်သ့တဖၣ်အဂ့ၢ် စံး၀ဲန့ၣ်လီၤ.
စှၤသီအတီၢ်ပူၤ သုးကီၣ်ကးအပှၤသုးဖိ(၆)ဂၤလၢ အသမံးသမိးပှၤလ့ၤလိၤဟးထီၣ်တဖၣ် ဖဲဆါခၠံၣ်ကျဲအနၢၤအံၤ မ့ၢ်ဒၣ်ပှၤဒ၀ဲၢ်ဖိလၢ အစံးကတိၤဘၣ် ဒ၀ဲၢ်ကျိၥ်လီၤအဂ့ၢ် ပှၤ၀့ၢ်ဒ၀ဲၢ်ဖိတဖၣ် စံး၀ဲန့ၣ်လီၤ.
ပှၤဒ၀ဲၢ်ဖိသုးကီၣ်ကးအပှၤသုးဖိတဖၣ်အံၤ ကူသိးဃၣ်၀ဲ စုဒူၣ်ပနီၣ်ပၥ်ယူၣ်နံၣ်ဖီတဖၣ်, ဒီသဒၢခိၣ်သလုးတဖၣ်လၢလၢပှဲၤပှဲၤ၀ံၤ မ့မ့ၢ်တနီၤတခီ ကူသိးဃၣ်စ့ၢ်ကီးဒီးခိၣ်ဖၢၣ်ဂီၤတဖၣ်အဂ့ၢ် ပှၤလၢထံၣ်န့ၢ်၀ဲတဖၣ် စံး၀ဲန့ၣ်လီၤ. အ၀ဲသ့ၣ် မ့ၢ်သုးကီၣ်ကးအပှၤသုးဖိလၢ အစံၣ်လီၤဃၣ်သုးတၢ်သိၣ်လိတဖၣ်ဧါ မ့တမ့ၢ် အကဲပၠူၣ်စီထံတဖၣ်ဧါန့ၣ် တၢ်တသ့ၣ်ညါလီၤတံၢ်ဘၣ်.
“အပူၤကွံၥ်န့ၣ် ပှၤသုးဖိလၢအတဲဘၣ် ဒ၀ဲၢ်ကျိၥ်တအိၣ်ဘၣ်. ခဲအံၤတခီ ကျဲၣ်ကျီလၢၥ်လံ. မ့ၢ်ဟဲအိၣ်ကျဲၣ်ကျီလိၥ်သးဒီး ကမျၢၢ်တဖၣ်တခီ ဘၣ်အိၣ်ပလီၢ်သးလီၤ”အဂ့ၢ် ပိၥ်ခွါတဂၤလၢအိၣ်ဖဲ ၀့ၢ်ဒ၀ဲၢ်တဂၤ တဲ၀ဲန့ၣ်လီၤ.
သုးကီၣ်ကးအသုးလၢကူသိးဃၣ် ဂၢၤကီၢ်သုးယူၣ်နံၣ်ဖီတဖၣ် လၢအိၣ်ဖဲ၀့ၢ်ဒ၀ဲၢ်ပူၤတဖၣ်တခီ တမ့ၢ်ပှၤသးစၢ်တဖၣ်ဘၣ်ဒီး မ့ၢ်ဒၣ်ပှၤစိၤခၢၣ်သးဒီး ပှၤသးပှၢ်တဖၣ်လီၤအဂ့ၢ် ပှၤ၀့ၢ်ဖိတဖၣ် တဲ၀ဲန့ၣ်လီၤ.
သုးကီၣ်ကးအသုးတဖၣ် ဆီလီၤပၥ်တၢ်သမံသမိးတြဲၤလၢ ၀့ၢ်ဒ၀ဲၢ်အနုၥ်လီၤတဖၣ်၀ံၤ သမံးသမိး၀ဲဃံးဃံးအသိး မၤစ့ၢ်ကီး၀ဲတၢ်သမံသမိးကိးမုၢ်နံၤဃၣ်ဃၣ် ဖဲဒ၀ဲၢ်၀့ၢ်ခၢၣ်သးကျဲအနၢၤ, မီလဲဃိၣ်အနုၥ်လီၤကျဲ, ဆွ့ၣ်ကူၣ်သီခါဖၠၣ်အကပၤ, ၀့ၢ်သီနီၣ်ဂံၢ်(၂)ကျဲခိၣ်ထီး, မ့ၣ်အူသၢဖျၢၣ်ကျဲအနၢၤ, အိးတတါကၠံကျဲအနၢၤတဖၣ်န့ၣ်လီၤ.
မုၢ်နၤခီတပၤစ့ၢ်ကီး သုးကီၣ်ကးအသုးသိ့လၣ်တဖၣ် ညီနုၥ်ဟးဆှၣ်သမံးသမိးတၢ်လၢ ၀့ၢ်ပူၤကျဲမုၢ်ဒိၣ် ဒီးကျဲနၢၤတဖၣ်အိၣ်၀ဲအသိး နုၥ်လီၤသမံသမိးသတူၢ်ကလၥ်စ့ၢ်ကီး အိၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
Ref: The Tanintharyi Times
