လါစဲးပထ့ဘၢၣ်(၆)သီ,၂၀၂၄နံၣ်
ကၠီၣ်တဲၣ် တၫ်တီခိၣ်ရိၣ်မဲရဲၣ်ကျဲၤတၫ်ဖံးတၫ်မၤ၀ဲၤကျိၤဒီးပှၤကညီတၫ်နုာ်လီၤဟးထီၣ် ပှၤဘၣ်မူဘၣ်ဒါတဖၣ် မၤ၀ဲတၫ်သမံသမိး ဖဲကၠီၣ်တဲၣ်-ကညီကီၫ်ဆၢ, တးခ်ကီၫ်ရ့ၣ်,၀့ၫ်မဲဆီးအပူၤ လၢပှၤကီၫ်ပယီၤဖိတၫ်အီၣ်ကျးဒီးတၣ်မၤတနီၤလီၤ.
တၫ်ဟဲသမံသမိးဒ်သိးအံၤန့ၣ် မ့ၫ်လၢ ပှၤလဲၤတၢၣ်အဃိ၀ံၤ ကျးကစၫ်တကးဘၣ်, သံကွၫ်သံဒိး၀ဲ ပှၤလၢဟဲပှ့ၤတၫ်တဂၤစုာ်စုာ်အဂ့ၢ် ဂ့ၫ်ခီၣ်ထံးတၫ်ကစီၣ်လၢ အသ့ၣ်ညါထွဲတၫ်ကဲထီၣ်အသးတဂၤ တဲ၀ဲန့ၣ်လီၤ.
ဘၣ်ထွဲဒီးတၫ်အိၣ်သးအံၤအဖီခိၣ် ပှၤကီၫ်ပယီၤဖိလၢဖံးတၫ်မၤတၫ်ဖဲကီၫ်ကၠီၣ်တဲၣ်ပူၤတဖၣ် ကဘၣ်ပလီၫ်သးလၢ လီၫ်က၀ီၤတၫ်ဘျၢဒီးပှၤတ၀ၢတၫ်အိၣ်မူအိၣ်ဂဲၤတၫ်အိၣ်သးတဖၣ်၀ံၤ ကီၫ်ကၠီၣ်တဲၣ်တၫ်အိၣ်သးလၢ ဆီတလဲအသးသ့ကိးဆၢကတီၫ်ဒဲးအဃိ ဘၣ်အိၣ်သ့သ့ဘၣ်ဘၣ်အဂ့ၫ် ကူၣ်သ့ဒီးတၫ်ဂုၤထီၣ်ပသီထီၣ်ဖီၣ်ဒ့ရှ့ ဒၣ်ရဲးထၢၣ် အူထူခၠံး(ဦးထူးချစ်)တဲ၀ဲလီၤ.
“ကီၫ်ကၠီၣ်တဲၣ်ပူၤ တၫ်မ့ၫ်မၤတၫ်တမံၤဂ့ၤတမံၤဂ့ၤန့ၣ် တၫ်ဘျၢလၢကၠီၣ်တဲၣ်ပဒိၣ်ပာ် လီၤ၀ဲန့ၣ် တၫ်ကဘၣ် လူၤပိာ်မၤ ထွဲ၀ဲ၀ံၤ ဘၣ်အိၣ်မူသ့သ့ဘၣ်ဘၣ်ဒီးလီၫ်က၀ီၤပှၤကၠီၣ်တဲၣ်ဖိတဖၣ်အဂ့ၫ် တဲ၀ဲလီၤ.”
ကၠီၣ်တဲၣ်ဘၣ်မူဘၣ်ဒါတဖၣ် နုာ်လီၤသမံသမိး၀ဲ ပှၤကီၫ်ပယီၤဖိ တၫ်အီၣ်ကျးတဖၣ်ဖဲ ၀့ၫ်မဲဆီးပူၤအသိး တၫ်ကစီၣ်ဟးထီၣ်လၢ တၫ်ကသမံသမိး Migrant ကၠိတဖၣ်အဃိ ကၠိတဖၣ်ကဘၣ်အိၣ်ကတဲာ်ကတီၤသး ခီဖျိလၢ မိၫ်တၫ်ကရၢကရိအတၫ်ဆီၣ်ထွဲအဖီခိၣ်အဂ့ၫ် အူခၠံးထူ တဲဆီၣ်တခူ၀ဲလီၤ.
ကီၫ်ကၠီၣ်တဲၣ်အပူၤ ပှၤထံဂုၤကီၫ်ဂၤဖိတဖၣ်လၢ မ့ၫ်ကမၤမုာ်ကျိၤ၀ဲၤကွာ်တၫ်ဖံးတၫ်မၤန့ၣ် ကလူၤပိာ်မၤထွဲအဂီၫ် တၫ်သိၣ် တၫ်သီဒီးတၫ်မၤအကျိၤအကျဲတဖၣ် အိၣ်အါမးန့ၣ်လီၤ.
ကီၫ်ကၠီၣ်တဲၣ်တၫ်ဘျၢတဖၣ် အဒူၣ်အဆၢအိၣ်လၢ ထံကီၫ်ပူၤ ပှၤထံဂုၤကီၫ်ဂၤဖိအတၫ်န့ၫ်ပၢတဖၣ်အဖီခိၣ်န့ၣ်လီၤ.
တၫ်အိၣ်သးဒ်သိးအံၤအဃိ လၢပတယါ,ဖူခဲးဒီးကီၫ်ဆၢဟီၣ်က၀ီၤတၫ်လီၫ်တဖၣ် အါတက့ၫ်တၫ်အိးထီၣ်ကျး တဖၣ် လၢပှၤဂၤအမံၤတဆီ၀ံၤ သမံသမိးတၫ်တလီၫ်လီၫ်အဃိ ကျးတဖၣ်ဘၣ်တၫ်ကးတံာ်ကွံာ်ဒီး တၫ်ဟံးန့ၫ်ဂ့ၫ်၀ီဒၣ်လဲၣ် အိၣ်စ့ၫ်ကီး၀ဲလီၤ.
Ref: Border Echo
