လါအီကူး(၂၂)သီ,၂၀၂၄နံၣ်
သုးကီၣ်ကးအသုး ဟဲဆှၣ်တၢ်လၢကလံၤကျါ ဖဲကီးတရံး-ရၤမတံ(အ့ရှၢ)ကျဲမုၢ်ဖးဒိၣ်ဒီးတီနီၢ်ကစၢၢ်အကပၤ၀ံၤ ခးလီၤကျိဖးဒိၣ်မုၢ်နၤမုၢ်ဆါလီအဂ့ၢ် ၀့ၢ်ကီးတရံးကမျၢၢ်ဖိတဂၤ တဲ၀ဲန့ၣ်လီၤ.
အီၣ်စ့ၣ်ယၣ်သုးကျိၤလၢ ဂုၥ်ကျဲးစၢတိဖျိ၀ဲ ကီးတရံး-ရၤမတံ(အ့ရှၢ)ကျဲမုၢ်ဖးဒိၣ်ဒီးတီနီၢ်ကစၢၢ်အံၤ ဖဲလၢလါယူၤလံ(၂၆)သီအနံၤန့ၣ် က့ၤဂုၤက့ၤအခံန့ၣ်လီၤ.
ဘၣ်ဆၣ်ဒီး သုးကီၣ်ကးအသုးအံၤ ဟဲဆှၣ်ကွၢ်ဟုၣ်တၢ်လၢကလံၤကျါတဖၣ်, (စကခ-၁၂)အစုတီၤဖီလၥ် ကျိဖးဒိၣ်တၢ်လုၢ်ခိၣ်ဒီး (ခလရ-၉၇)တဖၣ် ခးလီၤ၀ဲကျိဖးဒိၣ်တဖၣ် အိၣ်ထီၣ်၀ဲမုၢ်နၤမုၢ်ဆါန့ၣ်လီၤ.
ဖဲလၢလါအီကူး(၂၁)သီအနံၤ, ဟါ(၈)နၣ်ရံၣ်အဆၢကတီၢ်န့ၣ် သုးကီၣ်ကးခးလီၤကျိဖးဒိၣ်တကးဘၣ် ခးလီၤ၀ဲစ့ၢ်ကီးဒီး ကျိဖိတဖၣ်အဃိ၀့ၢ်ပူၤကမျၢၢ်တဖၣ်ဘၣ်ယိၣ်ဘၣ်ဘှီ၀ဲဘၣ်ဆၣ် တၢ်ဖိတၢ်လံၤအပှ့ၤကလံၤဒိၣ်ဒီးတၢ်လ့ၤတၢ်က့ၤအလဲဒိၣ်အဃိ တၢ်ကဃ့ၢ်ပူၤဖျဲးသးအဂီၢ် ကွၢ်ဆၢၣ်မဲၥ်ဘၣ် တၢ်ကီတၢ်ခဲအဂ့ၢ် ပှၤလၢအိၣ်ဖဲ၀့ၢ်ပူၤတဖၣ်တဲ၀ဲန့ၣ်လီၤ.
“ဖဲမနၤန့ၣ် ခးလီၤ၀ဲကျိဖးဒိၣ်လီၤ. တၢ်နၢ်ဟူဘၣ်စ့ၢ်ကီး ကျိဖိအကလုၢ်လီၤ. တၢ်မ့ၢ်ကဲထီၣ်သးန့ၣ် အိၣ်ကတဲၥ်ကတီၤသးလၢ ကဃ့ၢ်ပူၤဖျဲးအဂီၢ်လီၤ. လဲၤလဲၤက့ၤက့ၤန့ၣ် ကျိၥ်စ့လၢၥ်လီၤ. ခဲအံၤန့ၣ် တၢ်ဖိတၢ်လံၤစ့ၢ်ကီး အပှ့ၤဒိၣ်လီၤ. တၢ်ခဲလၢၥ်န့ၣ် ကီခဲဒိၣ်မးလီၤ. မ့ၢ်ကဲထီၣ်သးတဘိယူၢ်တခီ တညီဘၣ်. ပှၤတနီၤလၢ တဘၣ်လီၢ်ဘၣ်စးစ့ၢ်ကီးအိၣ်၀ဲလီၤ” အဂ့ၢ် လီၢ်က၀ီၤကမျၢၢ်ဖိတဂၤ တဲ၀ဲန့ၣ်လီၤ.
ဖဲလါယူၤလံ(၂၅)သီအနံၤန့ၣ် KNLAအပှၤသုးဖိတဖၣ် ခး၀ဲအီၣ်စ့ၣ်ယၣ်သုးကျိၤလၢ အိၣ်ဆီလီၤပၥ်သးဖဲ တီနီၢ်ကစၢၢ်လၢ ကျိဖးဒိၣ်အဃိ ဘၣ်ဒိ၀ဲ၀ံၤက့ၤဂုၤက့ၤအခံဆူ ၀့ၢ်ကီးတရံးအကပၤန့ၣ်လီၤ.
တၢ်ဒုးတဖၣ်တအိၣ်၀ဲဘၣ်ဆၣ် သုးကီၣ်ကးတပၤ ခးလီၤကျိဖးဒိၣ်အိၣ်ထီၣ်၀ဲမုၢ်နၤမုၢ်ဆါအသိး ဟဲဆှၣ်ကွၢ်ဟုၣ်တၢ်လၢကလံၤကျါတဖၣ်အိၣ်၀ဲအဂ့ၢ် တၢ်မဲၥ်ညါဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
“အ၀ဲသ့ၣ်မ့ၢ်ဟဲနုၥ်တခီ တၢ်ကကဲထီၣ်သးဒိၣ်ဒိၣ်မုၢ်မုၢ်လီၤ. အ၀ဲသ့ၣ်ဟဲနုၥ်လီၤ၀ဲတဘူၣ်ဘၣ်. အိၣ်ဂၢၤယံၤလံ. အ၀ဲသ့ၣ်တခီ ခးလီၤနါစိၤကျိဖးဒိၣ်ကအိၣ် တခီၣ်တဘျီလီၤ. ခးလီၤ၀ဲလၢ မုၢ်နၤခီတပၤလီၤ. မုၢ်ဆါခီတပၤစ့ၢ်ကီး ခးလီၤ၀ဲန့ၣ်လီၤ. ခးလီၤ၀ဲတဘီခံဘီလီၤ. တၢ်ဒုးဒုတကဲထီၣ်သးဒံးဘၣ်. မမ့ၢ်လၢကဘီယူၤန့ၣ် ဟဲဆှၣ်၀ဲတနွံ(၃)ဘျီလီၤ. ဟဲဆှၣ်၀ဲလၢ မုၢ်နၤခီတပၤဒီးဂီၤဆိဆိအဆၢကတီၢ်န့ၣ်လီၤ.”
သုးကီၣ်ကးအသုး ဟဲထီၣ်၀ဲသုးကျိၤလၢ ထံကီၢ်ပတီၢ်အီၣ်စ့ၣ်ယၣ်ဒုးယၤရဲၣ်ကျဲၤအသိး ဟဲတုၤဃီၤ၀ဲဆူ တၢ်ဆၢကတီၢ်ယံၤ(၃)လါဘၣ်ဆၣ် တိဖျိ၀ဲအ့ရှၢကျဲမုၢ်ဖးဒိၣ်ပၥ်ဃုၥ် တီနီၢ်ကစၢၢ်တန့ၢ်ဒံးဘၣ်ဒီး တကးဘၣ် ခီဖျိလၢKNLAသုးပၥ်ဖှိၣ်တဖၣ်ဒုးအီၤအဃိ တၢ်သံတၢ်ပှၢ်တဖၣ်အိၣ်ထီၣ်၀ဲအါ၀ံၤ ဘၣ်ဒိၣ်ဘၣ်ထံး၀ဲန့ၣ်လီၤ.
လၢန့ၣ်အမဲၥ်ညါ တၢ်ဒုးတၢ်ယၤတဖၣ်လၢ တၢ်စးထီၣ်မၤအီၤဖဲ လါဒ့ၣ်စ့ဘၢၣ်(၁)သီအနံၤအတီၢ်ပူၤစ့ၢ်ကီး လီၢ်က၀ီၤကမျၢၢ်(၂၀)ဘျဲၣ်သံ၀ဲ၀ံၤ ကမျၢၢ်စံၣ်သုးဟံၣ်ဃီ (၅၀၀)ဘျဲၣ်စ့ၢ်ကီး မ့ၣ်အူအီၣ်ဟးဂီၤကွံၥ်အသိး ဟံၣ်ဃီ(၁၀၀)ဘျဲၣ်ဟးဂီၤကွံၥ်၀ဲ တကးဘၣ်လီၢ်က၀ီၤကမျၢၢ်လၢအကလီၢ်တဖၣ် ဘၣ်ဃ့ၢ်ပူၤဖျဲးသးန့ၣ်လီၤ.
Ref: DVB
