လါယူၤလံ(၂၅)သီ, ၂၀၂၄နံၣ်
ဒ၀ဲၢ်ကီၢ်ရ့ၣ်, ကီၢ်ဆၣ်ခဲလၢၥ်အပူၤ ကလံၤအူဒီးမူခိၣ်စူၤဒိၣ်အဃိ သ့ၣ်ထူၣ်တဖၣ်လီၤတကူၤ၀ံၤ ဟံၣ်တဖၣ်ဟးဂီၤကွံၥ်၀ဲတကးဒံးဘၣ်တၢ်လီၢ်အါတီၢ်အပူၤစ့ၢ်ကီးထံဒိၣ်နိယွၤတဖၣ်ကဲထီၣ်၀ဲအဂ့ၢ်လီၢ်က၀ီၤကမျၢၢ်တဖၣ်တဲ၀ဲန့ၣ်လီၤ.
တဂီၤအံၤန့ၣ် ခီဖျိလၢကလံၤအူဆူၣ်အဃိ ဒ၀ဲၢ်၀့ၢ်အပူၤ ကမၠီက့ကျဲ,ရွ့ၣ်တီၣ်စါကျဲ,၀့ၢ်က၀ီၤကျဲဒီး ကဘီယူၤကျဲတဖၣ်အပူၤ သ့ၣ်ထူၣ်ဖးဒိၣ်တဖၣ်လီၤတကူၤ၀ံၤ ကျဲတဖၣ်ကးတံၥ်သးကဲထီၣ်၀ဲအဂ့ၢ် ပှၤလၢအိၣ်လၢ၀့ၢ်ပူၤတဖၣ်တဲ၀ဲန့ၣ်လီၤ.
တကးဒံးဘၣ် ခီဖျိလၢမူခိၣ်စူၤဒိၣ်၀ံၤ ထံကျိၤဒီးထံကျိတဖၣ်အပူၤ ထံဒိၣ်နိယွၤကဲထီၣ်သးအဃိ ရှ့ၣ်မးလဲၣ်စွဲ, ကၠီးမီၣ်,မၠိးသ့း,အိးသယၣ်ဒီး မၠီၣ်ပလဲက၀ီၤဒ့တဖၣ်အပူၤ ကျဲထံလီၤဘၢဒီးထံဒိၣ်တဖၣ်ကဲထီၣ်၀ဲအဂ့ၢ် ပှၤလၢအိၣ်ဖဲ၀့ၢ်ပူၤတဖၣ်စံး၀ဲန့ၣ်လီၤ.
ဒ၀ဲၢ်ကီၢ်ဆၣ်, မုၢ်ထီၣ်ဟီၣ်က၀ီၤ, ပကၣ်ရံၣ်ဒီး၀ဲးသ့ၣ်သ၀ီအပူၤစ့ၢ်ကီး ထံဒိၣ်နိယွၤတဖၣ်ကဲထီၣ်၀ဲန့ၣ်လီၤ. လၢန့ၣ်အမဲၥ်ညါ သိလ့ၣ်ကျဲမုၢ်အဖီခိၣ်ထံဒိၣ်ထီၣ်အဃိ သိလ့ၣ်လၢအိၣ်ဖဲ ဒ၀ဲၢ်-ထံခံကျဲမုၢ်အဖီခိၣ်တဖၣ် လဲၤ၀ဲဆူ ပကၣ်ရံၣ်သ၀ီတန့ၢ်လၢၤဘၣ်အဂ့ၢ် လီၢ်က၀ီၤကမျၢၢ်တဖၣ်တဲ၀ဲန့ၣ်လီၤ.
သယဲးခၠီးကီၢ်ဆၣ်ပူၤတခီ ကၠၣ်အ့ကရူၢ်ပူၤ ကျဲတဖၣ်ထံဒိၣ်ထီၣ်၀ံၤ ဘျံး-ဒ၀ဲၢ်သိလ့ၣ်ကျဲမုၢ်အဖီခိၣ် သယဲနခွးသ၀ီဒီးပါပၠ့ၣ်သ၀ီအဘၢၣ်စၢၤ, သယဲးခၠီ၀့ၢ်အကပၤတဖၣ်အပလီၤၤ ထံဒိၣ်ထီၣ်အဃိ တၢ်လ့ၤလိၤဟးထီၣ်တန့ၢ်ဘၣ်အဂ့ၢ်လီၢ်က၀ီၤကမျၢၢ်တဖၣ် စံး၀ဲန့ၣ်လီၤ.
ယ့ၣ်ဖၠူၣ်ကီၢ်ဆၣ်ပူၤတခီ ကလ့ၣ်အီၣ်၀့ၢ်အကပၤကျဲတနီၤတကးဘၣ် သ၀ီလၢအဘူးဒီးဖဲန့ၣ်တဖၣ်အပူၤစ့ၢ်ကီး ထံဒိၣ်နိယွၤကဲထီၣ်၀ံၤ ဟံၣ်ထူၣ်အထီ ဟံၣ်ခံကထၢတၢ်ဖီလၥ်တကထၢထံလီၤဘၢကွံၥ်၀ဲအဂ့ၢ် လီၢ်က၀ီၤကမျၢၢ်တဖၣ်တဲ၀ဲန့ၣ်လီၤ.
လီလိၣ်ကီၢ်ဆၣ်ပူၤစ့ၢ်ကီး သိလ့ၣ်ကျဲမုၢ်အဖီခိၣ် ထံလူၤဘၢကွံၥ်၀ံၤ ကလံၤအူဆူၣ်အဃိ သ့ၣ်ထူၣ်လီၤတကူၤ, လီၤမ့ၣ်အူပျံၤတဖၣ်တဲၥ်ကွံၥ်ဒီး ဟံၣ်အဒူၣ်တဖၣ်လီၤတလးကွံၥ်အဂ့ၢ် လီၢ်က၀ီၤကမျၢၢ်တဖၣ် တဲ၀ဲန့ၣ်လီၤ.
NUG အမူခိၣ်ကလံၤသီၣ်ဂီၤတၢ်တယၢ်အဖီခိၣ် တလါအံၤတုၤ(၂၈)သီအနံၤန့ၣ် လၢတနီသရံးကီၢ်ဆၣ်ပူၤ မူခိၣ်ဆူၣ်ဒိၣ်သ့အဂ့ၢ်ပၥ်ဖျါထီၣ်၀ဲ၀ံၤ ထံဒိၣ်နိယွၤဒီးဟီၣ်ခိၣ်လီၤပှီၢ်သ့အဃိ တၢ်ကတဲၥ်ကတီၤပၥ်သးအဂ့ၢ် ဟ့ၣ်ပလီၢ်ဃၣ်၀ဲန့ၣ်လီၤ.
Ref: The Tanintharyi Times
