လါမ့ၤ(၁၇)သီ, ၂၀၂၄နံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်ရ့ၣ်မုၫ်တြီၫ်, သုးက့နီၣ်ဂံၫ်(၅)ဟီၣ်က၀ီၤအပူၤ သုးကီၣ်ကးအသုးကလၢၤ(၂)ဖျၢၣ်လၢအမ့ၫ် လၢၫ်တိ(လယ်တိုး)ဒီး မီၣ်ဖိကၠိ(မော်ဖိုးကျိုး)သုးကလၢၤတဖၣ်အပူၤ သုးကီၣ်ကးအပှၤသုးဖိတဖၣ် ပာ်တ့ၫ်သုးကလၢၤဃ့ၫ်ပူၤဖျဲးသးအဂ့ၫ် တၫ်သ့ၣ်ညါဘၣ်န့ၣ်လီၤ.
သုးကီၣ်ကး(စစ်ကောင်စီ)အပှၤသုးဖိလၢ ပာ်တ့ၫ်သုးကလၢၤတဖၣ်အံၤ လဲၤသုးအသးဆူ သုးကီၣ်ကးအသုးကလၢၤဖးဒိၣ်တဖျၢၣ်လၢအမ့ၫ် ခီပိးသုးကလၢၤ(ခေါပုတ်တပ်စခန်း)အဂ့ၫ် တၫ်သ့ၣ်ညါဘၣ်လၢ သုးက့နီၫ်ဂံၫ်(၅) KNLA ဂံၫ်ခီၣ်ထံးတၫ်ကစီၣ်အအိၣ်န့ၣ်လီၤ.
“လၢၫ်တိဒီး မီၣ်ဖိကၠိသုးကလၢၤအပူၤ အ၀ဲသ့ၣ်(သုးကီၣ်ကးအပှၤသုးဖိတဖၣ်)ဟးထီၣ်လံ. ကလဲၤပာ်ဖှိၣ်ထီၣ်သးဆူ ခီပိးသုးကလၢၤအဂ့ၫ်တၫ်နၫ်ဟူဘၣ်လီၤ. တလဲၤတုၤလၢခီပိးသုးကလၢၤဒံးဘၣ်အဂ့ၫ် တၫ်သ့ၣ်ညါဘၣ်လီၤ. အ၀ဲသ့ၣ်ပာ်ဖှိၣ်ထီၣ်သးသုတန့ၫ်အဂီၫ်တၫ်မၤတံာ်တာ်အီၤလီၤ. အ၀ဲသ့ၣ်အက့ၤကျဲပူၤ မ့ၫ်ကွၫ်ဆၢၣ်မဲာ်လိာ်သးဒီး KNLA သုးဖိတဖၣ်တခီ တၫ်တပျၣ်ကွံာ်အီၤဘၣ်. တၫ်ကလဲၤခိးဒုးအီၤလၢကျဲတီၤ” အဂ့ၫ် တၫ်ကစီၣ်ဂံၫ်ထံးစံး၀ဲန့ၣ်လီၤ.
လၢၫ်တိသုးကလၢၤအံၤ အိၣ်ဆီလီၤအသးဖဲအဘူးဒီး မဲၫ်ခါထၣ်သုးကသုးကလၢၤ(မယ်ခါးထာတပ်စခန်း)န့ၣ်လီၤ. မ့မ့ၫ်မဲၫ်ခါထၣ်သုးကလၢၤန့ၣ် ဖဲအပူၤကွံာ် ၂၀၂၃နံၣ် လါမးရှးအတီၫ်ပူၤ KNLA ဒီးတၫ်ပၢၫ်ဆၢသုးပာ်ဖှိၣ်တဖၣ် ထီၣ်ဒုးမၤန့ၫ်ဃာ်၀ဲန့ၣ်လီၤ.
ခီပိးသုးကလၢၤလၢ သုးကီၣ်ကးအပှၤသုးဖိတဖၣ် ကက့ၤပာ်ဖှိၣ်သးန့ၣ် မ့ၫ်သုးကလၢၤတဖၣ်လၢ အိၣ်နံၣ်ယံၤလါထၢသုးကလၢၤဖးဒိၣ်(၁)ဖျၢၣ်၀ံၤ သုးအဂံၫ်အဘါအိၣ်၀ဲ(၆၀)တုၤ (၁၀၀)ဘျဲၣ်အဂ့ၫ် တၫ်သ့ၣ်ညါဘၣ်လၢ လီၫ်က၀ီၤဂံၫ်ခီၣ်ထံးတၫ်ကစီၣ်စံး၀ဲန့ၣ်လီၤ. လၢၫ်တိ(လယ်တိုး), မီၣ်ဖိကၠိ(မော်ဖို့ကျိုး), ခီပိးသုးကလၢၤ(ခေါပုတ်တပ်စခန်း)ဒီး တၫ်မဲာ်ညါသုးကလၢၤတနီၤအပူၤ သုးကီၣ်ကး အပှၤသုးဖိတဖၣ် မ့ၫ်ပာ်ဖှိၣ်ထီၣ်သးခဲလၢာ်န့ၣ် ကအိၣ်ထီၣ်၀ဲ(၂၀၀)ဂၤတုၤ (၄၀၀)ဂၤန့ၣ်လီၤ.
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်ရ့ၣ်မုၫ်တြီၫ်ဟီၣ်က၀ီၤပူၤ သုးကီၣ်ကး အသုးကလၢၤဖးဒိၣ်တဖၣ်န့ၣ် မ့ၫ်သုးကလၢၤတဖၣ်လၢအိၣ်ဖဲ၀့ၫ်ဖၣ်ပူၣ်(ဖာပွန်မြို့)အကပၤန့ၣ်လီၤ. ကီၫ်ကၠီၣ်တဲၣ်-ပယီၤကီၫ်ဆၢဒီတကျိၤအိၣ် သုးကီၣ်အသုးကလၢၤတဖၣ်အံၤ KNLA ဒီးတၫ်ပၢၫ်ဆၢသုးပာ်ဖှိၣ်တဖၣ် ထီၣ်ဒုးမၤန့ၫ်ဃာ်၀ဲအသိး ပာ်တ့ၫ်သုးကလၢၤဃ့ၫ်ပူၤဖျဲးသးတဖၣ်စ့ၫ်ကီးအိၣ်၀ဲန့ၣ်လီၤ.
ref:salweenpress
