လါမ့ၤ(၉)သီ, ၂၀၂၄နံၣ်
ဖဲ၂၀၂၄နံၣ်, လါမ့ၤ(၈)သီအနံၤ, ဂီၤအဆၢကတီၫ် KNLA ဒီး သုးပာ်ဖှိၣ်တဖၣ်ထီၣ်ဒုးမၤန့ၫ်၀ဲ သုးကီၣ်ကး အသုးကလၢၤလၢအိၣ်ဆီလီၤအသးဖဲ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၄), ကီၫ်ရ့ၣ်ဘျံး-ဒ၀ဲၫ်, ကီၫ်ဆၣ်ကစၢၫ်ဒိၣ်, ပတးသုးကလၢၤ(ပဒက်စခန်း)အပူၤ သုးကီၣ်ကးတပၤ သံ၀ဲ(၈)ဂၤဒီး တၫ်ဖီၣ်န့ၫ်မူဒံး(၂၀)ဂၤဘျဲၣ်အဂ့ၫ် တၫ်သ့ၣ်ညါဘၣ်န့ၣ်လီၤ.
သုးကီၣ်ကးတပၤ အသုးကလၢၤ သုတလီၤအဂီၫ် ဟဲတ့ၫ်လီၤမ့ၣ်ပိၫ်လၢကလံၤကျါတဖၣ်အိၣ်၀ဲအသိး ထံသုးတပၤစ့ၫ်ကီးခးစၢၤ၀ဲကျိဖးဒိၣ်တဖၣ် အိၣ်ထီၣ်၀ဲတဘိယူာ်ဃီလီၤအဂ့ၫ် စံး၀ဲန့ၣ်လီၤ.
ဒုးယၤရဲၣ်ကျဲၤအံၤ တၫ်ယူၣ်န့ၫ်အမံၤလၢ Operation T ၀ံၤ ဒုးယၤရဲၣ်ကျဲၤအပူၤ သုးက့နီၫ်ဂံၫ်(၆), KNLA သုးရ့ၣ်(၂၇), သုးက့နီၫ်ဂ့ၫ်(၄), KNLA သုးရ့ၣ်(၁၂), ဖဲၣ်ဒရဲၣ်သုးကျိၤ, ဒီညံၣ်နီၣ် (ဒေါင်းညီနောင်) သုးကျိၤဒီး သိၣ်မှံသုးပာ်ဖှိၣ်တဖၣ်ပာ်ဃုာ်၀ဲအဂ့ၫ် သုးဂ့ၫ်၀ီပှၤဘၣ်မူဘၣ်ဒါတဂၤတဲ၀ဲန့ၣ်လီၤ.
တၫ်ဒုးအံၤအဃိ ပတး(ပဒက်), ပ၀း(ပဝ), ကၠီးဆဲၣ်(ကျော်ဆည်), တကိၣ်တဲၣ်(တံခွန်တိုင်) သ၀ီ(၅)ဖျၢၣ်အပူၤ လီၫ်က၀ီၤကမျၢၫ်(၁,၅၀၀)ဘျဲၣ် ဘၣ်ဃ့ၫ်ပူၤဖျဲးအသးအဂ့ၫ် လီၫ်က၀ီၤကမျၢၫ်တဖၣ်စံး၀ဲန့ၣ်လီၤ.
တကးဘၣ် ဖဲလါမ့ၤ(၈)သီအနံၤ, ဟါလီၤခီအဆၢကတီၫ်စ့ၫ်ကီး သုးကီၣ်ကးတပၤ လဲၤတ့ၫ်လီၤမ့ၣ်ပိၫ် ဖဲကီၫ်ဆၣ်ကစၢၫ်ဒိၣ်အပူၤ ယငဲဒီး ကနဲးသံၣ်ရံးသ၀ီ (ရငဲနှင့်ကနက်သီရီရွာ)တဖၣ်ပူၤအဃိ ပှၤသးစၫ်(၂)ဂၤဒီး ဖံသးပှၫ်(၁)ဂၤ သံ၀ဲအဂ့ၫ် လီၫ်က၀ီၤကမျၢၫ်တဖၣ် စံး၀ဲန့ၣ်လီၤ.
ဖဲအပူၤကွံာ် လါအ့ဖြ့ၣ်(၂၄)သီအနံၤစ့ၫ်ကီး KNLA ဒီး သုးပာ်ဖှိၣ်တဖၣ် ထီၣ်ဒုးမၤန့ၫ်ဃာ်၀ဲ သုးကီၣ်ကး မီထၣ်သုးကလၢၤအသိး ဖဲလၢလါယနူၤအါရံၤအတီၫ်ပူၤစ့ၫ်ကီး တၫ်ထီၣ်ဒုးမၤန့ၫ်ဃာ်၀ဲ သုးကီၣ်ကး ကၠီးထူးသုးကလၢၤန့ၣ်လီၤ.
ref:rfa
photo:socialmedia
