လါမ့ၤ(၆)သီ, ၂၀၂၄နံၣ်
ဖဲ၂၀၂၄နံၣ်, လါမ့ၤ(၂)သီအနံၤ, ဟါ(၉း၃၀)နၣ်ရံၣ်အဆၢကတီၫ် သုးကီၣ်ကးခးလီၤကျိဖးဒိၣ်ဆူ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်ရ့ၣ်ချၢၣ်လွံၫ်ထူၣ်, ကီၫ်ဆၣ်လၢၫ်ဒိၣ်, ကၠိကၠံ(ကညီ)သ၀ီ(ကရင်ကျွန်းကြီးရွာ)အပူၤအဃိ ကမျၢၫ်(၂)ဂၤဘၣ်ဒိ၀ဲ, ကမျၢၫ်ဟံၣ်(၂)ဖျၢၣ်ဒီး တၫ်ဖိတၫ်လံၤတဖၣ် ဟးဂီၤကွံာ်၀ဲန့ၣ်လီၤ.
ကီၫ်ဆၣ်လၢၫ်ဒိၣ်, ကၠိကၠံ(ကညီ)သ၀ီဖိ(ကရင်ကျွန်းကြီးရွာ) (၂)ဂၤလၢအမ့ၫ် ဒီၣ်စ့ၣ်ကၠံၣ်(ဒေါ်စိန်ကြည်) သးနံၣ်(၈၀)ဒီး နီၫ်၀ါထူ သးနံၣ်(၄၇)ဘၣ်ဒိ၀ဲ၀ံၤ အူစါအူ(ဦးစန်းဦး)ဟံၣ်(၁)ဖျၢၣ်, ဆိၣ်လၣ်(၂)ဘ့ၣ်, ဒီၣ်စ့ၣ်ကၠံၣ် ဟံၣ်(၁)ဖျၢၣ်, ထိၣ်ဒ့ၣ်(၁)ဘ့ၣ်, မီၣ်တီၣ်တုာ်(၁)ခိၣ်ဒီး အူစ့ၣ်၀့ (ဦးစိန်၀င်း)ဒၢး(၁)ဖျၢၣ်စ့ၫ်ကီး ဟးဂီၤကွံာ်၀ဲန့ၣ်လီၤ.
ဖဲ၂၀၂၄နံၣ်, လါမ့ၤ(၁)သီအနံၤ, ဂီၤအဆၢကတီၫ် ကီၫ်ဆၣ်မူဟီၣ်က၀ီၤအပူၤ သုးကီၣ်ကး အကဘီယူၤဒုးသုးဟဲခးလီၤတၫ်(၄)ဘျီအဃိ ကမျၢၫ်အိၣ်ဟံၣ်(၁၅)ဖျၢၣ်, သီခါဖၠၣ်(၁)ဖျၢၣ်ဟးဂီၤကွံာ်၀ဲအသိး သီခါတဂၤစ့ၫ်ကီး ဘၣ်ဒိ၀ဲန့ၣ်လီၤ.
ဖဲ၂၀၂၄နံၣ်, လါမ့ၤ(၁)သီအနံၤ, ဂီၤ(၉း၂၀)နၣ်ရံၣ်အဆၢကတီၫ်, သုးကီၣ်ကး အကဘီယူၤဒုးသုး(ဂျက်တိုက်လေယာဉ်) ဟဲခးလီၤမ့ၣ်ပိၫ်အတယၢၤအိၣ်ပီၣ်(၅၀၀)(ဗုံးသီးပေါင်-၅၀၀)ဆူ ကီၫ်ဆၣ်မူဟီၣ်က၀ီၤ, မိၣ်ည့ဒၢသ၀ီ(မိုညှင်းဒဲရွာ)ပူၤ(၁)ဘျီ, ဖဲ(၉း၃၂)နၣ်ရံၣ်အဆၢကတီၫ် ကွံဒိၣ်သ၀ီ(ကွီးဒိုရွာ)အကပၤ(၁)ဘျီ, (၁၀း၄၅)မံးနံးအဆၢကတီၫ် ထံခးထၣ်သ၀ီ(ထီးခထာရွာ)ပူၤ(၁)ဘျီန့ၣ်လီၤ.
လၢန့ၣ်အမဲာ်ညါ ဖဲ(၁၁း၄၅)နၣ်ရံၣ်အဆၢကတီၫ် ဟဲခးလီၤကဒီးဖဲ ရခၢၣ်ကစၢၫ်တၫ်လီၫ်(ရခိုင်တောင်နေရာ) (၁)ဘျီအဃိ သီခါဖၠၣ်(၁)ဖျၢၣ်ဟးဂီၤကွံာ်၀ဲအသိး သီခါ(၁)ဂၤစ့ၫ်ကီးဘၣ်ဒိ၀ဲန့ၣ်လီၤ.
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်ရ့ၣ်ချၢၣ်လွံၫ်ထူၣ်ဟီၣ်က၀ီၤအပူၤ သုးကီၣ်ကးတပၤ ဟဲခးလီၤတၫ်လၢကဘီယူၤအိၣ်၀ဲအသိး ခးလီၤကျိဖးဒိၣ်တဖၣ်အိၣ်ထီၣ်၀ဲ ကိးမုၫ်နံၤန့ၣ်လီၤ.
