လါမ့ၤ(၂)သီ, ၂၀၂၄နံၣ်
၀့ၫ်တကူၣ်-မါတလ့ကျဲမုၫ်ဖးဒိၣ်လီၫ်လံၤ(ရန်ကုန်-မန္တလေးလမ်းဟောင်း)အဖီခိၣ် ကီၫ်ဆၣ်ကညိးကွ့ဟီၣ်က၀ီၤအပူၤ တိၤ(၁)ဘိ တၫ်ထုးအီၤလၢမ့ၣ်ပိၫ်အသိး လ့ၣ်မ့ၣ်အူကျဲစ့ၫ်ကီး တၫ်ထုးမၤဟးဂီၤကွံာ်အီၤလၢမ့ၣ်ပိၫ်အဂ့ၫ် တၫ်သ့ၣ်ညါဘၣ်န့ၣ်လီၤ.
ဖဲမဟါအနံၤ လါမ့ၤ(၁)သီအနံၤ, ဂီၤ(၁)နၣ်ရံၣ်ဃၣ်ဃၣ်အဆၢကတီၫ် လ့ၣ်မ့ၣ်အူကျဲဒီး သိလ့ၣ်ကျဲ တၫ်ထုးမၤဟးဂီၤကွံာ်အီၤလၢမ့ၣ်ပိၫ်၀ံၤ တိၤဒီတဘိဟးဂီၤကွံာ်၀ဲ, လ့ၣ်မ့ၣ်အူကျဲစ့ၫ်ကီးဟးဂီၤကွံာ်၀ဲအသိး လ့ၣ်မ့ၣ်အူ(၄)စူၣ်(ရထားတွဲ(၄)တွဲ)စ့ၫ်ကီး ကျဲဘျ့ကွံာ်၀ဲအဂ့ၫ် တၫ်သ့ၣ်ညါဘၣ်န့ၣ်လီၤ.
“ဟါ(၁၂)နၣ်ရံၣ်ဘျဲၣ် (၁)နၣ်ရံၣ်ဃၣ်ဃၣ်န့ၣ် နၫ်ဟူဘၣ်တၫ်ပိာ်ဖးထီၣ်အကလုၫ်(၂)ဘီလီၤ. ဂီၤကတီၫ်န့ၣ် တၫ်သ့ၣ်ညါဘၣ်လၢ ငနူးသါထံကျိတိၤ(ငါးနုသန်းချောင်းတံတား) တၫ်ထုးမၤဟးဂီၤကွံာ်အီၤလၢမ့ၣ်ပိၫ်လီၤ. လ့ၣ်မ့ၣ်အူလၢအိၣ်သဃဲၤလိာ်သးဒီးတိၤစ့ၫ်ကီးတၫ်ထုးဟးဂီၤကွံာ်အီၤလီၤ. သိလ့ၣ်ကျဲတဖၣ် အိၣ်ကးတံာ်အသး၀ံၤ က့ၤအိးထီၣ်ကွံာ်၀ဲလီၤ” အဂ့ၫ် ကညိးကွ့လီၫ်က၀ီၤကမျၢၫ်ဖိစံး၀ဲန့ၣ်လီၤ.
၀့ၫ်တကူၣ်-မါတလ့ကျဲလီၫ်လံအဖီခိၣ် တၫ်မၤဟးဂီၤကွံာ်တိၤအဃိ ဂီၤကတီၫ်သိၣ်လ့ၣ်အါအါဂီၫ်ဂီၫ် အိၣ်ကးတံာ်ဘၣ်ဆၣ် လီၫ်ခံန့ၣ်တၫ်ပျဲနီၣ်အီၤလၢ ကျဲမုၫ်ဖးဒိၣ်အချ့အဖီခိၣ်အဂ့ၫ် တၫ်သ့ၣ်ညါဘၣ်န့ၣ်လီၤ.
သိလ့ၣ်တဖၣ်တၫ်ပျဲနီၣ်အီၤလၢကျဲမုၫ်ဖးဒိၣ်အချ့အဖီခိၣ်အဃိ တၫ်လဲၤတၫ်က့ၤတဖၣ်အိၣ်ပတုာ်သးတအိၣ်၀ဲဘၣ် ဘၣ်ဆၣ်မ့မ့ၫ်လၢလ့ၣ်မ့ၣ်အူကျဲတခီဟးဂီၤကွံာ်၀ဲအဃိ မါတလ့-၀့ၫ်တကူၣ် တၫ်လဲၤတၫ်က့ၤတဖၣ် အိၣ်ပတုာ်သးအဂ့ၫ် တၫ်သ့ၣ်ညါဘၣ်န့ၣ်လီၤ.
ဖဲအပူၤကွံာ် လါယနူၤအါရံၤ(၄)သီအနံၤစ့ၫ်ကီး ၀့ၫ်တကူၣ်-မါတလ့ကျဲလီၫ်လံၤ(ရန်ကုန်-မန္တလေးလမ်းဟောင်း)အဖီခိၣ်, ကီၫ်ဆၣ်ဖၠူ ဒီးကီၫ်ဆၣ်ကညိးကွ့ဟီၣ်က၀ီၤအပူၤ တိၤ(၁)ဘိတၫ်ထုးမၤဟးဂီၤကွံာ်အီၤလၢမ့ၣ်ပိၫ်အဂ့ၫ် တၫ်သ့ၣ်ညါဘၣ်န့ၣ်လီၤ.
စးထီၣ်လၢ အပူၤကွံာ် ၂၀၂၁နံၣ်ဒီးတုၤကတီၫ် (၃)နံၣ်ဘျဲၣ်အတီၫ်ပူၤ လ့ၣ်မ့ၣ်အူကျဲဒီး လ့ၣ်မ့ၣ်အူကျဲတၫ်အိၣ်ပတုာ်လီၫ်တဖၣ် တၫ်ထုးအီၤလၢမ့ၣ်ပိၫ်အိၣ်ထီၣ်၀ဲအဘျီ(၁၃၀)ဘျဲၣ်၀ံၤ မ့မ့ၫ်လၢလ့ၣ်မ့ၣ်အူတိၤတဖၣ် တၫ်ထုးမၤဟးဂီၤကွံာ်အီၤလၢမ့ၣ်ပိၫ်တခီ အိၣ်ထီၣ်၀ဲအဘျီ(၅၀)ဘျဲၣ်အဂ့ၫ် တၫ်သ့ၣ်ညါဘၣ်လၢ နစက အတၫ်ထုးထီၣ်ပာ်ဖျါအဖီခိၣ်န့ၣ်လီၤ.
ref:vom
