လါအ့ဖြ့ၣ်(၃)သီ, ၂၀၂၄နံၣ်
KNU-ကညီဒီကလုာ်စၢဖှိၣ်ကရၢ သုးက့နီၫ်ဂံၫ်(၅) တၫ်ပၢဟီၣ်က၀ီၤ, ကညီကီၫ်စဲၣ်, ကီၫ်ဆၣ်ဖၣ်ပူၣ်, လါမးရှးပူၤ သုးကီၣ်ကးအသုးခးလီၤတၫ်လၢ ကျိဖးဒိၣ်ဒီးကလံၤကျါတဖၣ်အဃိ မိၫ်ဒၢ(၁)ဂၤပာ်ဃုာ် ပှၤဘၣ်သံ(၉)ဂၤအဂ့ၫ် KNU သုးက့နီၫ်ဂံၫ်(၅) ဘိးဘၣ်ပာ်ဖျါ၀ဲဒၣ်ဖဲလါအ့ဖြ့ၣ်(၂)သီအနံၤန့ၣ်လီၤ.
လါမးရှးအတီၫ်ပူၤ သုးကီၣ်ကးအသုးဒီး KNU- သုးက့နီၫ်ဂံၫ်(၅) အစုတီၤဖီလာ်သုးတဖၣ်အဘၢၣ်စၢၤ ခံကပၤတၫ်ဒုးကဲထီၣ်ဆူၣ်ဆူၣ်ကလဲာ်၀ံၤ သုးကီၣ်ကးအသုးတကပၤ ခးလီၤကျိဖးဒိၣ်အချံ(၄၂)ဖျၢၣ်ဆူ ကမျၢၫ်အိၣ်ဆိးဒူသ၀ီပူၤဒီး တၫ်ဖံးအီၣ်မၤအီၣ်အလီၫ်(တောင်ယာလုပ်ငန်းခွင်)အသိး တ့ၫ်လီၤမ့ၣ်ပိၫ်လၢဒရိ(ဒရုန်း)ဒီး ကဘီယူၤဒုးသုး မ့ၣ်ပိၫ်အဒိၣ်အဆံး ခဲလၢာ်ပာ်ဖှိၣ်အိၣ်၀ဲ (၁,၄၈၅) ဖျၢၣ်အဂ့ၫ် တဲ၀ဲလီၤ.
တၫ်ခးလီၤတၫ်ဒ်သိးအံၤအဃိ သီခါ(၁)ပါဒီး မိၫ်ဒၢ(၁)ဂၤပာ်ဃုာ် ခဲလၢာ်ကမျၢၫ်(၉)ဂၤဘၣ်သံအသိး သီခါ(၁)ပါဒီး ကမျၢၫ်(၃၀)ဂၤ ဘၣ်ဒိဘၣ်ထံး၀ဲအဂ့ၫ် တဲဃာ်၀ဲလီၤ.
ခံကပၤတၫ်ဒုးအပူၤ သုးကီၣ်ကးတကပၤ သုးခိၣ်စိ(၂)ဂၤပာ်ဃုာ် သံ၀ဲ(၄၂)ဂၤဒီး ဘၣ်ဒိဘၣ်ထံး(၅၅)ဂၤန့ၣ်လီၤ. ဒ်န့ၣ်အသိး ကညီတၫ်ထူၣ်ဖျဲးသုးမုၫ်ဒိၣ် (KNLA) သုးက့နီၫ်ဂံၫ်(၅)တကပၤ ဟ့ၣ်လီၤကွံာ်သးလၢ ထံကီၫ်ဒီးကလုာ်ဂီၫ်(၈)ဂၤဒီး ဘၣ်ဒိ၀ဲ(၁၄)ဂၤန့ၣ်လီၤ.
လါမးရှးအတီၫ်ပူၤ တၫ်ဒုးတၫ်ယၤဆူၣ်ထီၣ်၀ဲလၢ သုးက့နီၫ်ဂံၫ်(၅) ဟီၣ်က၀ီၤပူၤအဃိ ဖၣ်ပူၣ်လီၫ်က၀ီၤထံဖိကီၫ်ဖိ ဃ့ၫ်ထူၣ်ဖျဲးကွံာ်သး အနီၫ်ဂံၫ်အိၣ်၀ဲ(၁,၆၂၄)ဂၤလံန့ၣ်လီၤ.
Source: KNU-Mutraw News
