လါအ့ဖြ့ၣ်(၁)သီ, ၂၀၂၄နံၣ်
စးထီၣ်ဖဲ ၂၀၂၄နံၣ် လါယနူၤအါရံၤတုၤ လါမးရှးအလၢာ် လၢပကိကီၫ်ခီ, ကီၫ်ရ့ၣ်ချၢၣ်လွံၫ်ထူၣ်, ကီၫ်ဆၣ်မူပူၤ လီၫ်က၀ီၤကမျၢၫ်တဖၣ် သုးကီၣ်ကး လဲၤမၤအၢမၤသီ၀ဲအဃိ ပှၤဘၣ်သံ(၁၈)ဂၤ၀ံၤ ဘၣ်ဒိဘၣ်ထံး(၃၉)ဂၤအဂ့ၫ် ကီၫ်ဆၣ်မူ ကညီဂ့ၫ်ဂီၫ်အူ တၫ်မၤစၢၤကမံးတံာ် ဘိးဘၣ်ပာ်ဖျါ၀ဲဒၣ်ဖဲ လါမးရှး(၃၁)သီနံၤန့ၣ်လီၤ.
သုးကီၣ်ကးအံၤ လၢ(၃)လါအတီၫ်ပူၤ ဟဲခးလီၤတၫ်လၢကလံၤကျါ (၆၃)ဘျီဒီး ခးလီၤတၫ်လၢဒရိ(ဒရုန်း)ဒီး ကျိဖးဒိၣ်တဖၣ် အဘျီတဖၣ်အဘျီတကးဘၣ် နုာ်လီၤဆူ ဒူသ၀ီပူၤ ဒွဲၣ်အူထီၣ်ကွံာ်ကမျၢၫ်အဟံၣ်(၁၆၇)ဖျၢၣ်အဂ့ၫ် တၫ်ဘိးဘၣ်ရၤလီၤပူၤ ထၢနုာ်တဲဃုာ်၀ဲလီၤ.
တၫ်မၤအၢမၤသီဒ်သိးအံၤအဃိ ကီၫ်ဆၣ်မူ လီၫ်က၀ီၤဖိတဖၣ် ဘၣ်သံဒ်သိးအံၤအဂ့ၫ် တဲ၀ဲလီၤ. တၫ်မၤအၢမၤသီအဃိ ကီၣ်ဆၣ်မူအပူၤ သ၀ီ(၈၇)ဖျၢၣ် ကမျၢၫ်(၆၃၁၁၂)ဂၤ ဘၣ်ပာ်တ့ၫ်ဟံၣ်ဃီ ဃ့ၫ်ပူၤဖျဲးသးအဂ့ၫ် တဲ၀ဲလီၤ.
သုးကီၣ်ကးတဖၣ် ပညိၣ်မၤအၢမၤသီကမျၢၫ်ဒ်သိးအံၤန့ၣ် ထီဒါ၀ဲအဂ့ၫ်ဒီး တၫ်မၤအၢမၤသီတၫ်ကပတုာ်ကွံာ်တဘျီဃီအဂီၫ် ကီၫ်ဆၣ်မူ ကညီဂ့ၫ်ဂီၫ်အူ တၫ်မၤစၢၤကမံးတံာ်တကပၤ တၫ်ဘိးဘၣ်ရၤလီၤအပူၤ ဖၢနုာ်ဃ့ထီၣ်ဃာ်၀ဲလီၤ.
ပှၤဘၣ်ကီဘၣ်ခဲဖိတဖၣ် အတၫ်အိၣ်ဆိးအီၣ်အီ, ကူၣ်သ့ဂ့ၫ်၀ီ, တၫ်အိၣ်ဆူၣ်အိၣ်ချ့ တၫ်လိၣ်ဘၣ်တဖၣ်အဂီၫ် ဃ့ထီၣ်ဃာ်၀ဲ ထံဂုၤကီၫ်ဂၤတၫ်ကရၢကရိတဖၣ်လၢ ကဟ့ၣ်မၤစၢၤဘၣ် ဟီၣ်ခိၣ်ဖိတၫ်ဒိသူၣ်ဒိသးတၫ်မၤစၢၤတဖၣ်န့ၣ်လီၤ.
RFA စရီတၫ်မၤနီၣ်မၤဃါအဖီခိၣ် သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ၀ံၤအလီၫ်ခံ ၂၀၂၁နံၣ်, လါဖ့ၤဘြူၤအါရံၤ(၁) သီနံၤတုၤ ၂၀၂၄နံၣ် လါယနူၤအါရံၤ(၃၁)သီနံၤ လၢထံကီၫ်ဒီတဘ့ၣ်အပူၤ ကလံၤကျါဒီး ကျိဖးဒိၣ်တဖၣ်အဃိ ကမျၢၫ်ဘၣ်သံ(၁၄၂၉)ဂၤ၀ံၤ ဘၣ်ဒိဘၣ်ထံး၀ဲ (၂၆၄၁)ဂၤန့ၣ်လီၤ.
