လါမးရှး(၁၁)သီ, ၂၀၂၄နံၣ်
တၫ်ကဒီၣ်တဲာ်ကွံာ် သုးကီၣ်ကးကဘီယူၤသိတၫ်ဟူးတၫ်ဂဲၤ ဟီၣ်ခိၣ်ဒီဘ့ၣ်ပတီၫ် တၫ်စးထီၣ်မၤ၀ဲဖဲ လါမးၡး(၁၀)သီအနံၤန့ၣ်လီၤ.
လၢကလံၤကျါတၫ်ဒုးတဖၣ်အဃိ ဖိသၣ်လၢတၫ်ကမၣ်တအိၣ်ပာ်ဃုာ် ကမျၢၫ်တၫ်သံတၫ်ပှၫ်, တၫ်ဘၣ်ဒိဘၣ်ထံးအိၣ်၀ဲ၀ံၤ ဟံၣ်ဃီတၫ်သူၣ်ထီၣ်တၫ်အိၣ်ယၢၤ တၫ်ဟးဂုၤဟးဂီၤတဖၣ် တၫ်ကဒီသဒၢန့ၫ်အဂီၫ်ဒီး တၫ်ကပတုာ်ကွံာ်ကလံၤကျါတၫ်ဒုးတဖၣ်အဂီၫ် တၫ်ဂုၫ်ကျဲးစၢးမၤ၀ဲအဂ့ၫ် ကရၢလၢတီခိၣ်ရိၣ်မဲတၫ်ကဒီၣ်တဲာ်ကွံာ်ကဘီယူၤသိ (Blood Money Campaign) ကရၢထုးထီၣ်ပာ်ဖျါဃာ်၀ဲန့ၣ်လီၤ.
သုးကီၣ်ကးန့ၫ်ဘၣ်၀ဲကဘီယူၤသိတဖၣ် တၫ်ကဒီၣ်တဲာ်ကွံာ်အဂီၫ် ကမျၢၫ်လၢထံဂုၤကီၫ်ဂၤဒီး ကီၫ်ပူၤတဖၣ် အတၫ်ဃ့ထီၣ်အဖီခိၣ် တၫ်ကဆီၣ်တခူထီၣ် ထံဂုၤကီၫ်ဂၤအဂီၫ် တလါအံၤလါမးၡး(၁၀)သီအနံၤန့ၣ် တၫ်စးထီၣ်မၤ၀ဲအဂ့ၫ်(Blood Money Campaign) ပှၤဘၣ်မူဘၣ်ဒါတဂၤလၢအမ့ၫ် Mike တဲ၀ဲန့ၣ်လီၤ.
“ထံဂုၤကီၫ်ဂၤတီၣ်ထီၣ် ကဘီယူၤသိလၢ ကီၫ်ပယီၤပူၤလီၤ. ခီပနံၣ်လၢအဆါလီၤတၫ်တဖၣ်, ထံကီၫ်လၢအဆါလီၤတၫ်တဖၣ်, ကဘီကျိၤလၢအတီၣ်ထီၣ်ကဘီယူၤသိတဖၣ် တၫ်ကပညိၣ်ကးတံာ်အီၤလၢ မုၫ်ကျိၤ၀ဲၤကွာ်အဂီၫ် တၫ်ပာ်ဖှိၣ်မၤသကိးတၫ်ဒီး တၫ်ပၢၫ်ဆၢဂံၫ်ဘါကရူၫ်လၢ ထံဂုၤကီၫ်ဂၤ, ကီၫ်ပူၤတဖၣ်လီၤ. လီၫ်ခံတခါန့ၣ် ကီၫ်ပူၤကဘီယူၤသိတဖၣ် မ့ၫ်ဟဲတုၤန့ၣ် အကစၫ်ဒၣ်၀ဲ တလဲၤတုၤလၢ သုးကလၢၤတဖၣ်အပူၤဘၣ်. ကတီၫ်ခဲအံၤတၫ်ဘၣ်တီၣ်အီၤလၢသိလ့ၣ်လီၤ. တၫ်မ့ၫ်ကးတံာ်သိလ့ၣ်တီၣ်ကဘီယူၤသိတဖၣ်မ့ၫ်န့ၫ် မ့ၫ်တလဲၤတုၤလၢကလံၤသုး၀ဲၤလီၫ်ခိၣ်သ့ၣ်တဖၣ်ဘၣ်. ပ၀ဲကမျၢၫ်တဖၣ်ကကိညၣ်လီၤ. ခါဆူညါတၫ်ကမုာ်ခုၣ်ချ့ချ့အဂီၫ် တၫ်ကဘၣ်ကးတံာ်သုးကရူၫ် စ့အတၫ်ဟဲနုာ်လီၤတဖၣ်အသိး တၫ်ကဘၣ်မၤစ့ၫ်ကီး တၫ်ကဒီၣ်တဲာ်ကွံာ် ကဘီယူၤသိတၫ်ဟူးတၫ်ဂဲၤလၢ ထံဂုၤကီၫ်ဂၤဒီး ကီၫ်ပူၤစ့ၫ်ကီးန့ၣ်လီၤ.“
တၫ်ကဒီၣ်တဲာ်ကွံာ် ကဘီယူၤသိတၫ်ဟူးတၫ်ဂဲၤအသိး တၫ်ပာ်ဖျါထီၣ်ကမျၢၫ်တၫ်ပာ်သးဒ် တၫ်ဂီၤ, လံာ်, တၫ်ဆဲးလီၤစုမုၫ်ကျၢၫ်တဖၣ် တၫ်ကထၢဖှိၣ်အီၤ၀ံၤ အမဲရကၤ, ယူၣ်က့ၣ်, အံယူၣ်ဒီး အၣ်စံၣ်ယၣ် ထံကီၫ်တဖၣ်လၢ အဆါလီၤန့ၫ် သုးကီၣ်ကးကဘီယူၤသိတဖၣ်ဒီး ကဘီယူၤသိတီၣ်ကဘီတဖၣ်အဂီၫ် ခီပနံာ်လၢအဟံးန့ၫ်ထံကျါတၫ်ဘံၣ်တၫ်ဘၢတဖၣ် တၫ်ကဆှၢန့ၫ်အီၤန့ၣ်လီၤ.
ထံဂုၤကီၫ်ဂၤပဒိၣ်တခီ ခီပနံာ်လၢအတီၣ်ထီၣ် ကဘီယူၤသိဆူ သုးကီၣ်ကးအအိၣ်ဒီး ခီပနံာ်လၢအဟံးန့ၫ်ထံကျါတၫ်ဘံၣ်တၫ်ဘၢတဖၣ် တၫ်ကမၤတၫ်ကးတံာ်တဖၣ်တဘျီဃီအဂီၫ် တၫ်ဃ့ထီၣ်ဃာ်၀ဲန့ၣ်လီၤ.
တနံၣ်အံၤ (၂၀၂၄)နံၣ်အတီၫ်ပူၤစ့ၫ်ကီး ကလံၤကျါတၫ်ဒုးတဖၣ်အိၣ်ဒံး၀ဲအဃိ ထံဖိကမျၢၫ်ဖိတဖၣ် ဒ်သိးတၫ်ဘၣ်ဒိဘၣ်ထံးတၫ်သံတၫ်ပှၫ်တဖၣ် သုတအိၣ်လၢၤတဂ့ၤအဂီၫ် တၫ်ပညိၣ်မၤတၫ်ကးတံာ်လၢ တၫ်ဒိးန့ၫ်ကဘီယူၤသိအဂ့ၫ် ပှၤလၢတီခိၣ်ရဲၣ်မဲမၤ တၫ်ကဒီၣ်တဲာ်ကွံာ်ကဘီယူၤသိတၫ်ဟူးတၫ်ဂဲၤတဖၣ်တဲ၀ဲန့ၣ်လီၤ.
ref:rfa
photo:airliners
