လါမးရှး(၁၁)သီ, ၂၀၂၄နံၣ်
လၢကီၫ်ကရ့ၣ်နံၣ်, သုးကီၣ်ကး အတၫ်ဒုးလၢကလံၤကျါ, ခးကျိဖးဒိၣ်ပာ်ဃုာ်ဖီၣ်န့ၫ်ဆူၣ် မၤသံတၫ်တဖၣ်အဃိ လါဖ့ၤဘြူၤအါရံၤ(၁)လါအတီၫ်ပူၤ ကမျၢၫ်(၂၅)ဂၤသံ၀ဲ၀ံၤ (၄၂)ဂၤဘၣ်ဒိ၀ဲအဂ့ၫ် ကရ့ၣ်နံၣ်ဒီကလုာ်တၫ်ဒီသဒၢသုး(KNDF) ထုးထီၣ်ပာ်ဖျါဃာ်၀ဲ ဖဲလါမးၡး(၁၀)သီအနံၤန့ၣ်လီၤ.
တၫ်ပညိၣ်ဒုးလီၫ်က၀ီၤကမျၢၫ်တၫ်လီၫ်တဖၣ်န့ၣ် မ့ၫ်ဒၣ်သုးကီၣ်ကး မၤကမၣ်သုးကွီၫ်မ့ၣ်(စစ်ရာဇဝတ်မှု)တဖၣ်လီၤအဂ့ၫ် ကရ့ၣ်နံၣ်ဒီကလုာ်တၫ်ဒီသဒၢသုး(KNDF) လီၫ်ခၢၣ်သးတၫ်ကစီၣ်ဒီး တၫ်ဘိးဘၣ်ရၤလီၤပှၤဘၣ်မူဘၣ်ဒါတဂၤတဲ၀ဲန့ၣ်လီၤ.
“သုးကီၣ်ကးန့ၣ် ဒ်သိးကဒုးလီၤပှီၫ်ကွံာ် တၫ်ပၢၫ်ဆၢသုးတဖၣ်အဂီၫ်, ကမျၢၫ်, ပှၤဖီၣ်စုက၀ဲၤကရၢ တနီၤဖး၀ဲဘၣ် ပာ်ပနီၣ်ပှၤခဲလၢာ်ဒ်ဒုၣ်ဒါအသိးဒီးဒုး၀ဲလီၤ. သုးကီၣ်ကး အတၫ်ပညိၣ်ဒုးကမျၢၫ်တဖၣ်န့ၣ် မ့ၫ်ဒၣ်အ၀ဲသ့ၣ်မၤညီနုာ် တၫ်မၤကမၣ်သုးကွီၫ်မ့ၣ်တခါလီၤအဂ့ၫ်န့ၣ် ယအဲၣ်ဒိးတဲဒ်န့ၣ်လီၤ.
ဖဲလါဖ့ၤဘြူၤအါရံၤ(၅)သီအနံၤ, သုးကီၣ်ကး အကဘီယူၤဒုးသုး(၅)ခိၣ် လဲၤခးလီၤတၫ် ဖဲဒံမီဆိၣ်ကီၫ်ဆၣ်(ဒီးမော့ဆိုမြို့နယ်) ဒီၣ်ဆံၣ်အံၣ်(ဒေါဆီအီ)တၫ်သိၣ်ကၠိဒီး လွဲၫ်နါဖး(လွိုင်နန်းဖ)သ၀ီ တၫ်သိၣ်ကၠိတဖၣ်အဃိ ဖိသၣ်(၄)ဂၤဒီး ပိာ်ခွါ(၁)ဂၤသံ၀ဲ၀ံၤ အဂၤ(၃၅)ဂၤဘျဲၣ်စ့ၫ်ကီး ဘၣ်ဒိဘၣ်ထံး၀ဲန့ၣ်လီၤ.
လါဖ့ၤဘြူၤအါရံၤ(၁၃)သီအနံၤစ့ၫ်ကီး တၫ်ဒုးကဲထီၣ်သးတအိၣ်၀ဲဘၣ်ဒီး သုးကီၣ်ကး ခးလီၤတၫ်လၢကျိဖးဒိၣ်တဖၣ် ဖဲဖဲၣ်ခိၣ်ကီၫ်ဆၣ်(ဖယ်ခုံမြို့နယ်), ရွ့ၣ်စါသ၀ီပူၤအဃိ လီၫ်က၀ီၤဖိသၣ်(၁)ဂၤပာ်ဃုာ် ပိာ်မုၣ်(၄)ဂၤသံ၀ဲ၀ံၤ ပိာ်ခွါ(၁)ဂၤဒီးပိာ်မုၣ်(၂)ဂၤစ့ၫ်ကီး ဘၣ်ဒိဘၣ်ထံး၀ဲအဂ့ၫ်စံး၀ဲန့ၣ်လီၤ.
လၢကီၫ်ကရ့ၣ်နံၣ်ပူၤ သုးကီၣ်ကးဒီး ကရ့ၣ်နံၣ်တၫ်ပၢၫ်ဆၢသုးပာ်ဖှိၣ်တဖၣ်အဘၢၣ်စၢၤ တၫ်ဒုးကဲထီၣ်သးကိးမုၫ်နံၤ၀ံၤ လၢကီၫ်ကရ့ၣ်နံၣ်, ၀့ၫ်တနီၤ ကရ့ၣ်နံၣ်တၫ်ပၢၫ်ဆၢသုးပာ်ဖှိၣ်တဖၣ် ထီၣ်ဒုးမၤန့ၫ်ဃာ်၀ဲအသိးဒီး ဒ်သိးကမၤန့ၫ် ၀့ၫ်လွဲၫ်ကီၫ်(လွိုင်ကော်မြို့)အဂီၫ် တၫ်ပၢၫ်ဆၢသုးတဖၣ်ဂုၫ်ကျဲးစၢး၀ဲအဖၢမုၫ်န့ၣ်လီၤ.
သုးကီၣ်ကးတပၤစ့ၫ်ကီး ဒ်သိးကဒီသဒၢန့ၫ် ၀့ၫ်လွဲၫ်ကီၫ်(လွိုင်ကော်မြို့)အဂီၫ် ဟဲတ့ၫ်လီၤမ့ၣ်ပိၫ်လၢကလံၤကျါအဃိ ၀့ၫ်ပူၤကမျၢၫ်အိၣ်ဟံၣ်ဃီအါအါဂီၫ်ဂီၫ် မ့ၣ်အူအီၣ်ဟးဂီၤကွံာ်၀ဲအဂ့ၫ်စံး၀ဲန့ၣ်လီၤ.
ဖဲအပူၤကွံာ်လါဖ့ၤဘြူၤအါရံၤအတီၫ်ပူၤ သုးကီၣ်ကးဒီး KNDFသုးတဖၣ်အဘၢၣ်စၢၤ တၫ်ဒုးကဲထီၣ်တ့ၫ်သးဖဲ ကီၫ်ကရ့ၣ်နံၣ်, လွဲၫ်ကီၫ်, ၡါတီ, ကီၫ်ဆၣ်ဘီလခဲဒီး ကီၫ်ဆၣ်ဖဲၣ်ခိၣ်(ဖယ်ခုံမြို့နယ်)တဖၣ်အပူၤန့ၣ်လီၤ.
ref:rfa
photo:kndf
