ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၂), တီအူကီၫ်ရ့ၣ်, ထီတထူၣ်ကီၫ်ဆၣ်, စယဲးကၠံ၀့ၫ် သုးကီၣ်ကး သုးရ့ၣ်သုးကလၢၢၤ, ပၢၤကီၫ်သုးကလၢၤ ဒီးတၫ်သမံသမိးတြဲၤတဖၣ် တၫ်ပၢၫ်ဆၢသုးပာ်ဖှိၣ်တဖၣ် လဲၤထီၣ်ဒုးမၤန့ၫ်၀ဲအဂ့ၫ် ဖဲၣ်ဒရၢၣ်FM ပာ်ဖျါဃာ်၀ဲန့ၣ်လီၤ.
တနံၤအံၤဂီၤ(၄)နၣ်ရံၣ်အဆၢကတီၫ် မၠိးဆိၣ်သုးကလၢၤ(မြို့စိုစခန်း), ၡါစ့ဘိၣ်သုးကလၢၤ(ရှားစေဘိုစခန်း), စယဲးကၠံ၀့ၫ်(ဇရပ်ကြီးမြို့) (ခလရ(၇၃)သုးရ့ၣ်, စယဲးကၠံပၢၤကီၫ်သုးကလၢၤ(ဇရပ်ကြီးရဲစခန်း)ဒီး ခၠီခၠါတၫ်သမံသမိးတြဲၤ(ချောင်းခြားဂိတ်)တဖၣ် တၫ်ထီၣ်ဒုး၀ဲတကတီၫ်ဃီဒီး ထီၣ်ဒုးမၤန့ၫ်၀ဲအဂ့ၫ် တၫ်သ့ၣ်ညါဘၣ်န့ၣ်လီၤ.
“ခလရ (၇၃)သုးရ့ၣ်, စယဲးကၠံပၢၤကီၫ်သုးကလၢၤ, ခၠီခၠါတၫ်သမံသမိးတြဲၤတဖၣ် ထီၣ်ဒုးမၤန့ၫ်၀ံၤ ကတီၫ်အံၤသုးကီၣ်ကးဟဲခးလီၤတၫ်လၢကဘီယူၤဖဲ စယဲးကၠံန့ၣ်လီၤ. တၫ်ဟဲပညိၣ်ခး၀ဲကမျၢၫ်တီတီန့ၣ်လီၤ. ကမျၢၫ်တဖၣ်အိၣ်ကးတံာ်သးဒံးလီၤအဂ့ၫ်” စယဲးကၠံ၀့ၫ် ကမျၢၫ်လၢ အိၣ်ကးတံာ်သးတဂၤ တဲ၀ဲန့ၣ်လီၤ.
သုးကီၣ်ကးအကဘီယူၤ ဟဲခးလီၤတၫ်ဖဲ ထီတထူၣ်ကီၫ်ဆၣ်, ယွၣ်တါၡ့ၣ်(ရွာတန်းရှည်), ခၠီခၠါ(ချောင်းခြား), နးယွၣ်(နတ်ရွာ), သပၠ့ၣ်ကွ့(သပြေကွင်း)သ၀ီတဖၣ်အဃိ ဒူသ၀ီကမျၢၫ်တဖၣ် ဘၣ်ဃ့ၫ်ပူၤဖျဲးအသးလံအဂ့ၫ် တၫ်သ့ၣ်ညါဘၣ်န့ၣ်လီၤ.
တၫ်ထီၣ်ဒုးမၤန့ၫ် သုးကီၣ်ကးသုးကလၢၤတဖၣ်အပူၤ ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA)တီခိၣ်ရိၣ်မဲ၀ံၤ ပယီၤကမျၢၫ်တၫ်ထူၣ်ဖျဲးသုးမုၫ်ဒိၣ်(BPLA), ၀့ၫ်တကူၣ်ကလံၤစိးကီၫ်ရ့ၣ်ပကဖ(ရန်ကုန်မြောက်ပိုင်းခရိုင်ပကဖ), တီၣ်၀့ၣ်ဒီ အၣ်နၣ်၀ကးသုးကျိၤ(တော်၀င်ဒေါင်း အာဠာဝက စစ်ကြောင်း), တီကၠံကါ(တောကျီးကန်း), ဒီး Spring Warriors Columnသုးတဖၣ် ပာ်ဃုာ်၀ဲအဂ့ၫ် လီၫ်က၀ီၤကမျၢၫ် ဂံၫ်ခီၣ်ထံးတၫ်ကစီၣ်တနီၤ ပာ်ဖျါဃာ်၀ဲန့ၣ်လီၤ.
ref:FFM
တၫ်ပၢၫ်ဆၢသုးပာ်ဖှိၣ်တဖၣ် ထီၣ်ဒုးမၤန့ၫ်၀ဲ စယဲးကၠံး၀့ၫ်သုးကလၢၤ, ပၢၤကီၫ်သုးကလၢၤဒီး တၫ်သမံသမိးတြဲၤတဖၣ်
