လါဒံၣ်စ့ဘၢၣ်(၁၇)သီ,၂၀၂၅နံၣ်
ဘၣ်ထွဲဒီးကၠါဖျးဂ့ၫ်၀ီ ကၠီၣ်တဲၣ်သုတမၤဘၣ်ထွဲလိာ်အသးဒီးKNUတဂ့ၤအဂီၫ် သုးခီၣ်မံးရှၢၣ်ဃ့တရူးတၫ်မၤစၢၤအဂ့ၫ် တၫ်သ့ၣ်ညါဘၣ်လီၤ.
ဖဲဒံၣ်စ့ဘၢၣ်(၁၂)သီအနံၤ တုၤ (၁၆)သီအနံၤ လၢကီၫ်ပယီၤတၫ်ဒုးလီၤပှီၫ်ကၠါဖျးတၫ်မၤအပူၤ တရူးကမျၢၫ်တၫ်ဘံၣ်တၫ် ဘၢကိတိာ်သဃဲၤ MR Liu Zhong Yi လၢဟဲတၢၣ်ပီၣ်တဲသကိးတၫ်အံၤ သုးခီၣ်မံးရှၢၣ်ဃ့ထီၣ်၀ဲဒ်သိးန့ၣ်အဂ့ၫ် န့ၣ်ပၠံၣ် တီၣ်ဂ့ၫ်ခီၣ်ထံးတၫ်ကစီၣ်တဲ၀ဲလီၤ.
“ဖဲလါဒံၣ်စ့ဘၢၣ်(၁၂)သီအနံၤ ထံလီၫ်ကီၫ်ပူၤကိတိာ် သုးခိၣ်ကျၢၫ်စိ ထိထိနီၣ်ဒီးတရူးကိတိာ်သဃဲၤ တၫ်ထံၣ်လိာ်သးအ ပူၤ KNUဒီးကၠီၣ်တဲၣ်သုတမၤဘၣ်ထွဲလိာ်သးတဂ့ၤအဂီၫ် ကတဲဘၣ်ကၠီၣ်တဲၣ်အဂီၫ်ဃ့သကွံးကညး၀ဲလီၤ. အလီၫ်ခံဖဲ ဒံၣ်စ့ဘၢၣ်(၁၅)သီအနံၤစ့ၫ်ကီးတရူး,ကၠီၣ်တဲၣ်,ပယီၤထံကီၫ်(၃)ဘ့ၣ်ခၢၣ်စးတဖၣ် အတၫ်ထံၣ်လိာ်သး ဖဲ၀့ၫ်ရၤမတံအ ပူၤစ့ၫ်ကီး ဘၣ်ထွဲဒီးOnline Scamတၫ်ဂ့ၫ် ထံဂုၤကီၫ်ဂၤလၢဘၣ်ထွဲတဖၣ် KNUမ့ၫ်ဆှၢဟ့ၣ်ကၠီၣ်တဲၣ်န့ၣ် သုတတူၫ်လိာ် ၀ဲအဂီၫ် တဲ၀ဲန့ၣ်လီၤ.အ၀ဲသ့ၣ်တဲ၀ဲလၢ မ့ၫ်တၫ်ကရၢကရိခိၣ်သ့ၣ်တဖုလၢ တ့ထီၣ် KK Park Online Scamတၫ်သူၣ်ထီၣ် န့ၣ်လီၤ.တၫ်အၢၣ်လီၤတၫ်အုၣ်ကီၤတဖၣ်စ့ၫ်ကီးအိၣ်၀ဲန့ၣ် ထုးထီၣ်ပာ်ဖျါ၀ဲအဂ့ၫ်” န့ၣ်ပၠံၣ် တီၣ်ဂ့ၫ်ခီၣ်ထံးတၫ်ကစီၣ်တဲ၀ဲ လီၤ.
လၢကတီၫ်အံၤKNUန့ၣ် မ့လဲးပၣ် DKBAပၢဆှၢဃာ်ကၠါဖျးတၫ်မၤလီၫ်န့ၣ် နုာ်လီၤဖီၣ်၀ဲဒီးလီတဲစိ,အ့ၣ်ထၢၣ်နဲးဒီးခီၣ်ဖၠူ ထၢၣ်တၫ်ပီးတၫ်လီလၢကၠါဖျးသူ၀ဲတဖၣ်,တၫ်အုၣ်ကီၤတဖၣ်,ကၠါဖျးတရူးဖိတဖၣ်ဒီးထံဂုၤကီၫ်ဂၤတဖၣ် ဆှၢဟ့ၣ်၀ဲဆူ ကၠီၣ်တဲၣ်အိၣ်အဃိ ပယီၤသုးတကပၤ တၫ်ပာ်ဖှိၣ်မၤသကိးတၫ်ဒ်သိးအံၤန့ၣ် မၤဘၣ်ဒိဘၣ်ထံးထံကီၫ်တၫ်စိတၫ်ကမီၤ အဂ့ၫ်တဲ၀ဲဒီး သုတပာ်ဖှိၣ်မၤသကိးတၫ်တဂ့ၤအဂီၫ် တဲ၀ဲလၢတြီဆၢ၀ဲလၢဖိးသဲစးအပူၤန့ၣ်လီၤ.
KNUတခီ တဘၣ်ထွဲဒီးKK Parkဘၣ်အမဲာ်ညါ တၫ်ဒုးလီၤပှီၫ်ကၠါဖျးအဂီၫ် ကပာ်ဖှိၣ်မၤသကိးတၫ်ဒီးထံဂုၤကီၫ်ဂၤတဖၣ် အဂ့ၫ် ထုးထီၣ်ဘိးဘၣ်ရၤလီၤ၀ဲလၢဖိးသဲစးအပူၤန့ၣ်လီၤ.
ကီၫ်ပယီၤကီၫ်ဆၢဟီၣ်က၀ီၤတဖၣ်အပူၤ တၫ်ကဒုးလီၤပှီၫ်ကၠါဖျးတၫ်ဖံးတၫ်မၤတုၤလၢအဂံၫ်တဲာ်တစုအဂီၫ် တရူး,ကၠီၣ် တဲၣ်ဒီးပယီၤ ထံကီၫ်(၃)ဘ့ၣ် ကဒုးအိၣ်ထီၣ် Task Forceအဂီၫ် ဟ့ၣ်ကူၣ်ဃာ်၀ဲန့ၣ်လီၤ.
