R2K လါနိၣ်၀့ဘၢၣ်(၂၈),၂၀၂၅နံၣ်
အပူၤကွံာ် (၂၁)သီနံၤ, မ့လဲးပၣ်ကၠါဖျးတၫ်မၤလီၫ်လၢလဲၤတရံးအသးလၢခီဖျိDKBAခိၣ်နၫ်အတၫ်ဒီသဒၢတဖၣ် လၢ တၫ်တတိာ်သူၣ်ပာ်သးဘၣ်အပူၤ KNLAသုးပာ်ဖှိၣ်တဖၣ် နုာ်လီၤဖီၣ်၀ဲ၀ံၤအလီၫ်ခံ DKBA ဟီၣ်က၀ီၤအပူၤ ကၠါဖျးတၫ်မၤ လီၫ်လၢအဂၤ တရူးပှၤမၤတၫ်ဖိတဖၣ်ဒီးတၫ်ပီးတၫ်လီလၢဘၣ်ထွဲတဖၣ် သုးလီၫ်သုးကျဲအဂ့ၫ် ပှၤလီၫ်က၀ီၤဖိလၢထံၣ်၀ဲ လၢအမဲာ်တဖၣ်တဲ၀ဲအဖီခိၣ် တၫ်သ့ၣ်ညါဘၣ်လီၤ.
DKBAဟီၣ်က၀ီၤပူၤ ကၠီၣ်တဲၣ်-ပယီၤကီၫ်ဆၢ ကၠီးခဲး,ဖလူဒီး၀ီၫ်လ့ၤဟီၣ်က၀ီၤပာ်ဃုာ်၀ဲလီၤ.လၢကၠီးခဲးအပူၤ မ့လဲးပၣ် တၫ်ဂ့ၫ်ကဲထီၣ်၀ံၤအလီၫ်ခံ လီၤဆီဒၣ်တၫ်လၢမုၫ်နၤခီတကပၤန့ၣ် သုးလီၫ်သုးကျဲပှၤကညီဒီးတၫ်ပီးတၫ်လီတဖၣ်အဂ့ၫ် လီၫ်က၀ီၤဖိလၢထံၣ်၀ဲလၢအမဲာ်တဂၤ တဲဘၣ်R2Kန့ၣ်လီၤ.
“မ့ၫ်လီၤ.လီၤဆီဒၣ်တၫ်သုးကွံာ်၀ဲလၢမုၫ်နၤတကပၤလီၤ.ဘံဘူဆၢၣ်သၢမးလီၤအဂ့ၫ်”အ၀ဲတဲ၀ဲလီၤ.ဘၣ်ဆၣ်နာ်သက့ သုးကွံာ်လၢတၫ်လီၫ်ဖဲလဲၣ်တခီ တဲဘၣ်ကီ၀ဲလီၤ.DKBAဟီၣ်က၀ီၤအပူၤ ကၠါဖျးတၫ်မၤလီၫ်အိၣ်၀ဲ(၇)လီၫ် ဃၣ်ဃၣ်အ ဂ့ၫ်ဒီးသုးကွံာ်အသးထဲလဲၣ်ဒု တသ့ၣ်ညါဒံးဘၣ်အဂ့ၫ် တဲ၀ဲလီၤ.
ကၠါဖျးတၫ်မၤလီၫ်လၢDKBAဒီသဒၢန့ၫ်၀ဲအပူၤ ပှၤမၤတၫ်ဖိတဖၣ် သုးကွံာ်အသးဆူ တၫ်ကပိာ်ကပၤ တၫ်ဘံၣ်တၫ်ဘၢ အိၣ်အလီၫ်အိၣ်၀ဲဒီးဟီၣ်က၀ီၤတၫ်ဘံၣ်တၫ်ဘၢတၫ်အိၣ်သးအဖီခိၣ် ကလဲၤဆူအယံၤဒုကီ၀ဲအဂ့ၫ် ပှၤလီၫ်က၀ီၤဖိ အဂၤ တဂၤ တဲဘၣ်R2Kန့ၣ်လီၤ.
“လီၤဆီဒၣ်တၫ် ထံဂုၤကီၫ်ဂၤတၫ်ဆီၣ်သနံးတဖၣ်,၀ံၤဒၢး KNUစ့ၫ်ကီး ထုးထီၣ်တၫ်ဘိးဘၣ်ပာ်ဖျါတပယူာ်ဃီအဃိ ပျံၤတၫ်ဒီးဃ့ၫ်ဟးထီၣ်ကွံာ်အဂ့ၫ်”တဲဘၣ်၀ဲအတၫ်ထံၣ်န့ၣ်လီၤ.
KNLAဒီးတၫ်ပၢၫ်ဆၢသုးပာ်ဖှိၣ်သုးတဖၣ် ဖဲအပူၤကွံာ်နွံန့ၣ် နုာ်လီၤဖီၣ်၀ဲ မ့လဲးပၣ်သ၀ီပူၤ DKBAကၠါဖျးတၫ်မၤလီၫ်အ ကတီၫ် DKBAသုးဖိ ၂၃၀ဂၤပာ်လီၤတၫ်စုက၀ဲၤဒီးထံဂုၤကီၫ်ဂၤပှၤမၤတၫ်ဖိလၢအကထိဂၤ မၤတၫ်လၢအိၣ်လဲတၫ်လံၣ် တၫ်လီတၫ်သူၣ်ထီၣ်အပူၤ လၢအိၣ်ဒီးတၫ်ဘံၣ်တၫ်ဘၢဃံးဃံးအဂ့ၫ် KNUထုးထီၣ်ဘိး ဘၣ်ရၤလီၤဃာ်၀ဲလီၤ.
ခီၣ်ဖၠူထၢၣ်ဒီးITတၫ်ပီးတၫ်လီလၢတၫ်ဖီၣ်န့ၫ်၀ဲတဖၣ် တၫ်တမၤဟးဂီၤ၀ဲဘၣ်ဒီးကဒိးန့ၫ်တၫ်အုၣ်ကီၤတၫ်ဂ့ၫ်တၫ်ကျိၤ တဖၣ်အဂီၫ် ကဟ့ၣ်ခီ၀ဲဆူပှၤလၢသ့နၫ်ပၢၫ်၀ဲအိၣ်ဒီးကဃုထံၣ်သမံသမိး၀ဲအဂ့ၫ် KNUတဲဃာ်၀ဲလီၤ.
ဒ်န့ၣ်အသိး လၢဖလူလ့စ့ၫ်ကီး ကၠါဖျးတၫ်မၤလီၫ်လၢတၫ်တ့ထီၣ်၀ဲအဖၢမုၫ်အပူၤ တၫ်ပီးတၫ်လီတဖၣ် ဖဲမဟါနံၤ ဂီၤအ ကတီၫ်န့ၣ် စိာ်သုးကွံာ်၀ဲအဂ့ၫ် လီၫ်က၀ီၤဖိလၢထံၣ်၀ဲလၢအမဲအဂၤတဂၤ တဲ၀ဲ၀ံၤပှၤတ့ထီၣ်ဘှီထီၣ်တၫ်ဖိတဖၣ်စ့ၫ်ကီး ကက့ၤဆူ၀့ၫ်ရၤမတံတကပၤအဂီၫ် တၫ်ကဟ့ၣ်ဘၣ်တၫ်ပျဲန့ၣ် တၢၣ်ပီၣ်တဲသကိး၀ဲဒီးပှၤဖီၣ်စုက၀ဲၤလၢဒုးလိာ်အသးတ ဖၣ် အိၣ်၀ဲန့ၣ်လီၤ.
ဘၣ်ထွဲဒီးတၫ်သုးကွံာ်ကၠါဖျးပှၤမၤတၫ်ဖိတၫ်ဂ့ၫ်န့ၣ် ဂ့ၫ်ခီၣ်ထံးတၫ်ကစီၣ်တခါလၢဘူးဒီး DKBAတခီ အပူၤကွံာ်မ့ၫ်ဂ့ၤ လၢအခဲအံၤမ့ၫ်ဂ့ၤ ထံဂုၤကီၫ်ဂၤကၠါဖျးပှၤမၤတၫ်ဖိတဖၣ် ကၠီၣ်တဲၣ်တကပၤမ့ၫ်ဟဲကိးန့ၣ် ဟ့ၣ်လီၤက့ၤ၀ဲအိၣ်အဂ့ၫ် တဲဘၣ်R2Kန့ၣ်လီၤ.
ဘၣ်ထွဲဒီးတၫ်ဂ့ၫ်အံၤR2Kဃ့ထီၣ်လၢကတဲဘၣ်အါထီၣ်၀ဲအဂီၫ်ဘၣ်ဆၣ် ဂ့ၫ်လိာ်၀ဲန့ၣ်လီၤ.ကၠါဖျးအဃိ မ့လဲပၣ်တၫ်ကဲ ထီၣ်အသးလၢ မၤဘံဘူထီၣ် သုးဂ့ၫ်၀ီ,ထံရူၫ်ကီၫ်သဲးဂ့ၫ်၀ီ၀ံၤအလီၫ်ခံ DKBA၀ဲၤလီၫ်ခိၣ်သ့ၣ်တခီဖဲနိၣ်၀့ဘၢၣ်(၂၄)သီအ နံၤန့ၣ် အတၫ်ပၢဟီၣ်က၀ီၤအပူၤ တပျဲနုာ်၀ဲပှၤဖီၣ်စုက၀ဲၤကရၢဒီးတၫ်ဆှၢထီၣ်ဆှၢလီၤပှၤထံဂုၤကီၫ်ဂၤဖိတဖၣ်လၢၤဘၣ် အဂ့ၫ် ထုးထီၣ်ဘိးဘၣ်ရၤလီၤ၀ဲ၀ံၤအလီၫ်ခံ လၢခံ(၂)သီန့ၣ် တြီဃာ်၀ဲ ပှၤဖီၣ်စုက၀ဲၤကရၢအတၫ်ခီဂာ် အဟီၣ်က၀ီၤ န့ၣ်လီၤ.
တၫ်ကဲထီၣ်အသးအံၤအပူၤ DKBAအစ့တၫ်နုာ်လီၤဘၣ်ဒိကွံ၀ဲဒီးတၫ်အုၣ်ကီၤတၫ်ဂ့ၫ်တၫ်ကျိၤတဖၣ် တၫ်ဒိးန့ၫ်၀ဲအဃိ သုတဘၣ်ဒိဘၣ်ထံးလၢၤတဂ့ၤအဂီၫ် သုးလီၫ်သုးကျဲတကးဘၣ်အမဲာ်ညါ တၫ်ဖ့ၣ်ဆၢဆူၣ်ထီၣ်သ့ဒီးKNUအဂ့ၫ် ပှၤလၢပဲာ်ထံနီၤဖး လီၫ်က၀ီၤ သုးဂ့ၫ်၀ီ,ထံရူၫ်ကီၫ်သဲးဂ့ၫ်၀ီတၫ်အိၣ်သးလၢတအဲၣ်ဒိးပာ်ဖျါမံၤတဂၤ တဲ၀ဲလီၤ.
“တချူးမ့လဲးပၣ်တၫ်ဂ့ၫ်ကဲထီၣ် KNUဒီးDKBAတၫ်ရ့လိာ်ဘၣ်ထွဲန့ၣ် တဲလၢဒုၣ်ဒါတသ့အသိး,တမ့ၫ်စ့ၫ်ကီး သိၣ်မှံၤ ဘၣ်န့ၣ်ပတဲသ့လီၤ. တၫ်အဃိ မ့လဲးပၣ်တၫ်ဂ့ၫ်ကဲထီၣ်၀ံၤအလီၫ်ခံ ခံခီခံကပၤ တၫ်ရ့လိာ်ဘၣ်ထွဲ လၢတၫ်နာ်န့ၫ်လိာ် သးတကပၤ အဂံၫ်စၫ်လီၤ၀ဲသ့န့ၣ်လီၤ.
DKBAတကပၤ တၫ်ဘၣ်ယိၣ်ဘၣ်ဘှီစ့ၫ်ကီးအိၣ်ထီၣ်သ့လီၤ.လၢကတီၫ်အံၤ သုးခီၣ်မံးရှၢၣ်အသုးန့ၣ် ထီၣ်ဒုးကဒါက့ၤ၀ဲ မ့လဲးပၣ်ဟီၣ်က၀ီၤအဃိ တၫ်ဒုးဆူၣ်ထီၣ်၀ဲဒီးKNLAသုးပာ်ဖှိၣ်တဖၣ်ဒီးခးလီၤကျိဖးဒိၣ်ဒီး မၤကလံၤကျါတၫ်ဒုးခးလီၤ တၫ်တဖၣ်န့ၣ်လီၤ.
DKBAလၢဆီၣ်ထွဲသုးခီၣ်မံးရှၢၣ်အတၫ်ဃုထၢအံၤ လၢကျဲတဘိတဘိ ပာ်ဖှိၣ်ဒုးဃုာ်တၫ်ဒီးသုးခီၣ်မံးရှၢၣ်သ့အဂ့ၫ် ပှၤပဲာ်ထံနီၤဖးတၫ်တဖၣ် တယာ်၀ဲလီၤ.”ခဲအံၤတၫ်အိၣ်သးဒု သုးခီၣ်မံးရှၢၣ်တကပၤ ဆီၣ်ထွဲ၀ဲDKBAသ့န့ၣ်လီၤ.
အလီၫ်ခံ DKBAဒီးKNUအဘၢၣ်စၢၤ တၫ်ရ့လိာ်ဘၣ်ထွဲဖ့ၣ်ဆၢထီၣ်သ့ဒီးတၫ်ဘၣ်သဂၢၫ်ခးလိာ်သးအိၣ်ထီၣ်သ့၀ဲအဂ့ၫ် ပှၤပဲာ်ထံနီၤဖးတၫ်တဖၣ် ဟ့ၣ်ပလီၫ်၀ဲလီၤ.
