လါနိၣ်၀့ဘၢၣ် ၂၆သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
၂၀၂၁တုၤ ၂၀၂၅နံၣ်အတီၢ်ပူၤ ပှၤဘၣ်ကီဘၣ်ခဲဖိခဲလၢၥ်လၢ အန့ၢ်တၢ်ပျဲနုၥ်လီၤဆူ ကီၢ်အမဲရကၤပူၤတဖၣ် ကသမံသမိးက့ၤ၀ဲအဂီၢ် အမဲရကၤပဒိၣ် ထုးထီၣ်ဃၥ်၀ဲတၢ်ကလုၢ်အဂ့ၢ် တၢ်သ့ၣ်ညါဘၣ်လၢ ထံဂုၤကီၢ်ဂၤတၢ်ကစီၣ်တဖၣ်ပၥ်ဖျါဃၥ်၀ဲအဖီခိၣ်န့ၣ်လီၤ.
တၢ်ကဲထီၣ်အမဲရကၤထံဖိကီၢ်ဖိဒီး ပှၤကညီတၢ်နုၥ်လီၤဟးထီၣ်၀ဲၤကျိၤ (U.S. Citizenship and Immigration Services – USCIS) အတၢ်မၤနီၤစရီတခါအပူၤစ့ၢ်ကီး နဲၣ်လီၤဃၥ်၀ဲ ဒ်န့ၣ်အဂ့ၢ် တၢ်ထံၣ်ဘၣ်၀ဲအဂ့ၢ် USA TODAY တၢ်ကစီၣ် တၢ်ပၥ်ဖျါအပူၤန့ၣ်လီၤ.
အပူၤကွံၥ်ပဒိၣ်အစိၤ ၂၀၂၁ တုၤ၂၀၂၅အဘၢၣ်စၢၤ ပှၤဘၣ်ကီဘၣ်ခဲဖိခဲလၢၥ်လၢ အန့ၢ်တၢ်ပျဲနုၥ်လီၤဆူကီၢ်အမဲရကၤပူၤ အလံၥ်ပတံထီၣ်တဖၣ် ကသမံသမိးက့ၤ၀ဲအဂ့ၢ်, ဖဲအတီၢ်ပူၤ ပှၤဘၣ်ကီဘၣ်ခဲဖိလၢ အဟဲနုၥ်လီၤတၢ်လၢတၢ်ချၢခဲလၢၥ်စ့ၢ်ကီး ကသမံသမိးက့ၤ၀ဲအဂ့ၢ် လၢတၢ်မၤနီၣ်စရီအပူၤ ပၥ်ဖျါဃၥ်၀ဲအဂ့ၢ် တၢ်ကစီၣ်စံး၀ဲန့ၣ်လီၤ.
ပှၤဘၣ်ကီဘၣ်ခဲဖိလၢ ဟဲတုၤအိၣ်လၢကီၢ်အမဲရကၤကီၢ်စၢဖှိၣ်အပူၤတဖၣ်န့ၣ် ဘၣ်တၢ်ဆီၣ်ဘံၣ်ဆီၣ်ဘၢအီၤ မ့တမ့ၢ် တၢ်ဘၣ်ယိၣ်ဘၣ်ဘှီအိၣ်၀ဲနီၢ်နီၢ်အိၣ်တအိၣ် တၢ်ကသံကွၢ်သံဒိးအီၤအဂ့ၢ်, ဘၣ်ကီဘၣ်ခဲဖိလၢ တၢ်တတူၢ်လိၥ်အီၤတဖၣ်စ့ၢ်ကီး ဟဲတီၣ်ထီၣ်လံၥ်ပတံထီၣ်တဖၣ်တန့ၢ်ဘၣ်အဂ့ၢ် ပၥ်ဖျါဃၥ်၀ဲန့ၣ်လီၤ.
တၢ်မၤနီၤစရီအပူၤ ပှၤဘၣ်ကီဘၣ်ခဲဖိလၢ ဘၣ်တၢ်ကသမံသမိးအီၤအနီၣ်ဂံၢ်နီၣ်ဒွးန့ၣ် ကအိၣ်၀ဲ ၂၃၃,၀၀၀ဃၣ်ဃၣ်န့ၣ်လီၤ.
ကီၢ်ခိၣ်ထရၢး က့ၤတုၤလၢဟံၣ်၀ါ၀ံၤအလီၢ်ခံ တယံၥ်ဘၣ်အဆၢကတီၢ်န့ၣ် ပတုၥ်ကွံၥ်၀ဲ ပှၤဘၣ်ကီဘၣ်ခဲဖိတၢ်ရဲၣ်တၢ်ကျဲၤလၢ တအိၣ်ဒီးတၢ်ဆၢကတီၢ်တၢ်ပၥ်ပနီၣ်အီၤဘၣ်န့ၣ်လီၤ. ပှၤလၢကန့ၢ်တၢ်ပျဲကနုၥ်လီၤကီၢ်ပူၤတဖၣ် အနီၣ်ဂံၢ်စ့ၢ်ကီး မၤစှၤလီၤကွံၥ်၀ဲတုၤ ၇,၅၀၀၀ံၤ အါတက့ၢ်န့ၣ် မ့ၢ်ပှၤ၀ါဖံးဖိလၢ အိၣ်ဖဲကီၢ်အၣ်ဖရံးကၤထံကီၢ်တဖၣ်အဂ့ၢ် ပၥ်ဖျါဃၥ်၀ဲတၢ်ကစီၣ်န့ၣ်လီၤ.
UNHCR သမံသမိး၀ဲလီၤတံၢ်လီၤဆဲး၀ံၤ တၢ်ပၥ်ပနီၣ်အီၤဒ် ပှၤဘၣ်ကီဘၣ်ခဲဖိအသိးတဖၣ်အံၤ ထံကီၢ်လၢကတူၢ်လိၥ်၀ဲတဖၣ်စ့ၢ်ကီး သမံသမိး၀ဲ လီၤတံၢ်လီၤဆဲးအဂ့ၢ် တၢ်ထံၣ်ဘၣ်၀ဲန့ၣ်လီၤ.
ထံကီၢ်လၢကတူၢ်လိၥ်၀ဲတဖၣ် မ့ၢ်တူၢ်လိၥ်လံမးဒီး ပှၤဘၣ်ကီဘၣ်ခဲဖိ တၢ်လဲၤတၢ်က့ၤအဂီၢ် ဘီမုၢ်စၢဖှိၣ်ကရၢပၣ်ဃုၥ် တၢ်မၤစၢၤကရၢတဖၣ် ထိၣ်ဃူရဲၣ်ကျဲၤမၤ၀ဲန့ၣ်လီၤ.
ကီၢ်အမဲရကၤန့ၣ် တူၢ်လိၥ်၀ဲ ဟီၣ်ခိၣ်ဒီဖျၢၣ်တၢ်လီၢ်သကူး ပှၤဘၣ်ကီဘၣ်ခဲဖိ အနီၣ်ဂံၢ်နီၣ်ဒွးအအါကတၢၢ် ထံကီၢ်ဖးဒိၣ်တဘ့ၣ်န့ၣ်လီၤ.
ပှၤဘၣ်ကီဘၣ်ခဲဖိတဖၣ်အကျါ ပှၤလၢဟဲဃ့ၢ်ဟးထီၣ်လၢ ကီၢ်ပယီၤအပူၤတဖၣ်စ့ၢ်ကီး ပၣ်ဃုၥ်၀ဲန့ၣ်လီၤ.
ကီၢ်ပယီၤပူၤ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံ ၅နံၣ်အတီၢ်ပူၤ ခီဖျိတၢ်ဘံၣ်တၢ်ဘၢတၢ်အိၣ်သးအဖီခိၣ် ပှၤကီၢ်ပယီၤဖိလၢ က့ၤဆူအတၢ်အိၣ်ဆိးလီၢ်ကျဲတသ့ဒံးတဖၣ်လၢ လဲၤအိၣ်ကဒုဖဲ ကီၢ်အမဲရကၤကီၢ်စၢဖှိၣ်ပူၤ တစိၢ်တလီၣ်တဖၣ်စ့ၢ်ကီး တၢ်ကပတုၥ်ကွံၥ်၀ဲအဂ့ၢ် အမဲရကၤပဒိၣ် ထုးထီၣ်ပၥ်ဖျါဃၥ်၀ဲဖဲ လါနိၣ်၀့ဘၢၣ် ၂၄သီအနံၤန့ၣ်လီၤ.
