လါနိၣ်၀့ဘၢၣ် ၇သီ, ၂၀၂၅နံၣ်, အၣ်ထူခ့တၢ်ကစီၣ်
တၢ်ဃုထၢလၢသုးကီၣ်မံးရှၢၣ်ကရဲၣ်ကျဲၤမၤ၀ဲအံၤ အဆၢကတီၢ်ဟဲဘူးထီၣ်အကတီၢ် ပှၤလီၢ်အိၣ်ကမှံဖိလၢအိၣ်ဖဲတီအူ၀့ၢ်ပူၤတဖၣ် ကၠးခဲၣ်ယ့ပၣ်တံၣ်ဘျီၣ်ဒိၣ်ခၢၣ်စးတဖၣ် ဟဲမၤဘူၣ်၀ဲ ကျိၥ်စ့ဒီးတၢ်အီၣ်တၢ်အီတဖၣ်အဂ့ၢ် တၢ်သ့ၣ်ညါဘၣ်လၢ လီၢ်က၀ီၤဖိတဖၣ်အအိၣ်န့ၣ်လီၤ.
တၢ်ဒုးတဖၣ်လၢကဲထီၣ်သးလၢ ၀့ၢ်တီအူအခိၣ်အဃၢၤအဃိ ပှၤလီၢ်အိၣ်ကမှံဖိလၢဟဲအိၣ်ကဒု၀ဲဒၣ်ဖဲသီခါဖၠၣ်တဖၣ် ဟဲမၤဘူၣ်၀ဲဒၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
“ပ၀ဲပှၤလီၢ်အိၣ်ကမှံဖိတဖၣ် ဟဲတုၤ၀ဲဒၣ် ၄နံၣ်လံ. ပၣ်တံၣ်ဖဲလဲၣ်တဖုဂ့ၤမး တဟဲဘၣ်. ခဲအံၤတဘျီ ကၠးခဲၣ်ယ့ဘျီၣ်ဒိၣ်ခၢၣ်စးလၢကဒိးဃုထၢအသးတဖၣ် ဟဲတုၤလီၤလီၤဆီဆီ၀ံၤ ဟဲဟ့ၣ်လီၤ၀ဲ ဟုသးဒီးကျိၥ်စ့တဆံးတက့ၢ်န့ၣ်လီၤ. လၢအပူၤကွံၥ်န့ၣ် တဟဲတုၤဘူနီတဘျီဘၣ်” ပိၥ်ခွါတဂၤလၢ အမၤစၢၤပှၤလီၢ်အိၣ်ကမှံဖိတဂၤ စံး၀ဲန့ၣ်လီၤ.
စးထီၣ်လၢ ၂၀၂၄နံၣ်စးထီၣ်သီန့ၣ် တၢ်ဒုးတဖၣ်ကဲထီၣ်သးဆူၣ်ဆူၣ်ကိၤကိၤလၢ တီအူ၀့ၢ်အခိၣ်အဃၢၤအဃိ လီၢ်က၀ီၤဖိလၢအကလးတဖၣ် ဘၣ်လဲၤဃ့ၢ်ပူၤဖျဲးအသးဆူ ၀့ၢ်တီအူန့ၣ်လီၤ.
“တၢ်ဒုးတၢ်ယၤတၢ်ကီတၢ်ခဲ, ဟီၣ်ခိၣ်ဟူး၀းတၢ်ကီတၢ်ခဲ, ထံဒိၣ်နိယွၤတၢ်ကီတၢ်ခဲတဖၣ် ကဲထီၣ်တ့ၢ်အသးလၢ၀့ၢ်တီအူလီၤ. မ့မ့ၢ်လၢ ထံတၢ်ကီတၢ်ခဲန့ၣ် ကဲထီၣ်တ့ၢ်၀ဲတဘျူးဘျီညါ. လီၢ်က၀ီၤကမျၢၢ်တဖၣ် ဘၣ်ကီဘၣ်ခဲဖိန့ၣ် ပှၤထံၣ်၀ဲကိးဂၤဒဲးလီၤ. ပၣ်တံၣ်တဖုဂ့ၤတဖုဂ့ၤ မ့ၢ်တဟဲမၤဘူၣ်တၢ်ဘၣ်အသိး တဟဲစံးကတိၤဟ့ၣ်ဂံၢ်ဟ့ၣ်ဘါတၢ်ဘၣ်အဂ့ၢ်” ၀့ၢ်တီအူကမျၢၢ်ဖိတဂၤ စံး၀ဲန့ၣ်လီၤ.
တၢ်ဃုထၢလၢသုးကီၣ်မံးရှၢၣ်ကရဲၣ်ကျဲၤမၤ၀ဲ ဖဲ၂၀၂၅နံၣ်, လါဒံၣ်စ့ဘၢၣ် ၂၈သီအနံၤအပူၤ ကၠးခဲၣ်ယ့ပၣ်တံၣ်ပၣ်ဃုၥ် ပၣ်တံၣ် ၈ဖု ကနုၥ်လီၤဒိးဃုထၢအသးအဂ့ၢ် တၢ်သ့ၣ်ညါဘၣ်န့ၣ်လီၤ.
