လါနိၣ်၀့ဘၢၣ်(၇)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ကရ့ၣ်ကီၫ်စဲၣ်,ဖရူၫ်ဆိၣ်ကီၫ်ဆၣ်အပူၤ သုးခီၣ်မံးရှၢၣ်အသုးန့ၣ် ဟဲထီၣ်ဆူ ဖရူၫ်ဆိၣ်-ထါလဲ-နါဖဲ ကျဲမုၫ်ဖးဒိၣ်ဒီးမၤ သုးဂ့ၫ်၀ီ တၫ်ဟူးတၫ်ဂဲၤတဖၣ်အဃိ ကျဲမုၫ်ဖးဒိၣ်၀ဲန့ၣ် စးထီးဖဲလါနိၣ်၀့ဘၢၣ်(၆)သီအနံၤန့ၣ် တၫ်သုတလ့ၤလိၤခီဂာ် ၀ဲအဂီၫ် ကရ့ၣ်နံၣ်ဒီကလုာ်တၫ်ဒီသဒၢသုး(KNDF)ထုးထီၣ်ဘိးဘၣ်ရၤလီၤ၀ဲလီၤ.
ဖရူၫ်ဆိၣ်ကီၫ်ဆၣ်,မၣ်ခရီၤရှ့းသ၀ီတကပၤ သုးခီၣ်မံးရှၢၣ်အသုးတဖၣ် စးထီၣ်ဖဲနိၣ်၀့ဘၢၣ်(၃)သီအနံၤန့ၣ် ဟဲထီၣ် ဃီၤဆူ ထါလဲတကပၤဒီးဟဲထီၣ်သုးကျိၤအဃိ ဘၣ်သဂၢၫ်သးလိာ်သးဒီးတၫ်ပၢၫ်ဆၢသုးဖိတဖၣ်အဂ့ၫ် KNDF ဟ့ၣ်ဒုးသ့ၣ်ညါ၀ဲလီၤ.
သုးဂ့ၫ်၀ီတၫ်အိၣ်သးဒ်သိးအံၤအဃိ ဖရူၫ်ဆိၣ်-ထါလဲ-နါဖဲ ကျဲမုၫ်ဖးဒိၣ်ပာ်ဃုာ် ကျဲဖးဒ့လၢဘျးစဲလၢကျဲမုၫ်ဖးဒိၣ် ခဲလၢာ် စးထီၣ်ဖဲနိၣ်၀့ဘၢၣ်(၆)သီနံၤ တၫ်သုတဟးထီၣ်က့ၤလီၤတဂ့ၤဒီးတၫ်ကးတံာ်ဃာ်၀ဲလၢတအိၣ်ဒီးတၫ်ပာ်ပနီၣ် မုၫ်နံၤမုၫ်သီဘၣ်အဂ့ၫ် ဟ့ၣ်ဒုးသ့ၣ်ညါ ဘိးဘၣ်ရၤလီၤ၀ဲလီၤ.
အပူၤကွံာ် အီးကထိဘၢၣ်အပူၤ သုးခီၣ်မံးရှၢၣ်အသုးန့ၣ် လၢကရ့ၣ်နံၣ်ကီၫ်စဲၣ်,ဖရူၫ်ဆိၣ်ကီၫ်ဆၣ်ဒီးဒံၣ်မီဆိၣ်ကီၫ်ဆၣ် တဖၣ်အပူၤ ထံဖိကီၫ်ဖိကမျၢၫ်လၢတမ့ၫ်သုးဂ့ၫ်၀ီတၫ်ခးပနီၣ်တဖၣ်အဖီခိၣ် တ့ၫ်လီၤမ့ၣ်ပိၫ်လၢဒြိလၢတၫ်ပညိၣ်အိၣ်အ ပူၤတပယူာ်ဃီအဃိ ကမျၢၫ်တဖၣ် ကဟးထီၣ်က့ၤလီၤဘၣ်လၢသုးဂ့ၫ်၀ီတၫ်ပလီၫ်ပဒီအပူၤအဂီၫ် ဖဲလါနိၣ်၀့ဘၢၣ်(၃) သီအနံၤန့ၣ် KNDFထုးထီၣ်ဘိးဘၣ်ရၤလီၤတ့ၫ်ဃာ်၀ဲဒံးန့ၫ်လီၤ.
