လါနိၣ်၀့ဘၢၣ် ၇သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
သုးကီၣ်မံးရှၢၣ်သုးကလၢၤတဖၣ်လၢ ဘၣ်တၢ်ပျၢ်ကွံၥ်အီၤ ဖဲကညီကီၢ်စဲၣ်, ရၤမတံ၀့ၢ်ကလံၤထံးတဖၣ် ဒ်သိးကမၤန့ၢ်က့ၤအဂီၢ်ဟဲထီၣ်ဒုးတၢ်အဆၢကတီၢ်သုးကီၣ်မံးရှၢၣ်တပၤတၢ်ဘၣ်ဒိဘၣ်ထံးဒီးတၢ်သံတၢ်ပှၢ်တဖၣ်အိၣ်အါထီၣ်၀ံၤ တပၤစ့ၢ်ကီးစူးကါ၀ဲ သုးအဂံၢ်အဘါတဖၣ်ဒီး ဟဲထီၣ်မၤဒုးယၤရဲၣ်ကျဲၤအဂ့ၢ် တၢ်သ့ၣ်ညါဘၣ်လၢ သုးဂ့ၢ်၀ီဂံၢ်ခီၣ်ထံးတၢ်ကစီၣ်အအိၣ်န့ၣ်လီၤ.
သုးကလၢၤလၢဘၣ်တၢ်ပျၢ်ကွံၥ်အီၤဖဲ ရၤမတံ၀့ၢ်ကလံၤထံး ၀ီၢ်လ့ၢ်ကျဲမုၢ်တဖၣ်အံၤ ကမၤန့ၢ်က့ၤအဂီၢ် ဟံးန့ၢ်တၢ်မၤစၢၤလၢ ဟီၣ်ခိၣ်လိၤဒီးကလံၤကျါ၀ံၤ ဟဲထီၣ်သုးကျိၤအဃိ တၢ်ဒုးတဖၣ်ဆူၣ်၀ဲန့ၣ်လီၤ.
စးထီၣ်လၢ လါအီးကထိဘၢၣ် ၂၅သီအနံၤတုၤ လါနိၣ်၀့ဘၢၣ် ၁သီအနံၤ ဟဲထီၣ်သုးကျိၤဆူ လ့က့ၣ်ကိၥ်ဟီၣ်က၀ီၤ ယသ့းကူၢ်, လ့ကပီၤ ထံလီၤဆူ, ကၠီၣ်၀ါဘိကစၢၢ်တပၤအဆၢကတီၢ် KNLAသုးပၥ်ဖှိၣ်သုးကျိၤတဖၣ် က၀ီၤကးတံၥ်ဒုးအီၤအဃိ သုးကီၣ်မံးရှၢၣ်တပၤ တၢ်သံတၢ်ပှၢ်အိၣ်ထီၣ်၀ဲအါအသိး တၢ်မၤန့ၢ်စ့ၢ်ကီး ကျိချံပှၥ်သၣ်အါအါဂီၢ်ဂီၢ်အဂ့ၢ် ခ့ဘှီသူသုးကျိၤ ထုးထီၣ်ပၥ်ဖျါဃၥ်၀ဲန့ၣ်လီၤ.
သုးဂ့ၢ်၀ီဂံၢ်ခီၣ်ထံးတၢ်ကစီၣ်တဂၤစံး၀ဲလၢ “ကတီၢ်ခဲအံၤ သုးကီၣ်မံးရှၢၣ်စူးကါ၀ဲ သုးအဂံၢ်အဘါအါအါဂီၢ်ဂီၢ်လီၤ. စူးကါ၀ဲစ့ၢ်ကီး စုက၀ဲၤပီးလီဂံၢ်ဘါလီၤ. စူးကါ၀ဲ ကဘီယူၤတဖၣ်လီၤ. မဟါအနံၤန့ၣ် ကဘီယူၤဟဲတ့ၢ်လီၤမ့ၣ်ပိၢ် လၢ၂သီ ဒီတနံၤကျၢၤဒီး စူးကါ၀ဲ စုက၀ဲၤဂံၢ်ဘါ, သုးအဂံၢ်အဘါ၀ံၤ ကဟ့ၣ်ဆီၣ်သနံး၀ဲအဂ့ၢ်” စံး၀ဲန့ၣ်လီၤ.
သုးကီၣ်မံးရှၢၣ်အသုးအံၤ ဟဲထီၣ်သုးကျိၤဆူ ရၤမတံ-၀ီလ့ၢ်ကျဲမုၢ်ဖီခိၣ်တဖၣ်, ခးလီၤကျိဖးဒိၣ်တဖၣ်ဒီး မၤကလံၤကျါတၢ်ဒုးတဖၣ်အဃိ လ့က့ၣ်ကိၥ်, မ့လဲးပၣ်, ဖလူ, ယသ့းကူၢ်, ထံမဲၢ်၀ါခံသ၀ီတဖၣ်အပူၤ လီၢ်က၀ီၤကမျၢၢ်လၢအကထိတဖၣ် ဘၣ်လဲၤဃ့ၢ်ပူၤဖျဲးအသးဆူ သူမွဲကျိ၀ၣ်ဘၣ်ခီ ကၠီၣ်တဲၣ်တပၤန့ၣ်လီၤ.
ကတီၢ်ခဲအံၤ ပှၤလီၢ်အိၣ်ကမှံဖိတဖၣ်အံၤ ဘၣ်အိၣ်၀ဲဒၣ်သ့သ့ဘၣ်ဘၣ်၀ံၤ သုးကီၣ်မံးရှၢၣ်သုးကျိၤတဖၣ် ဒ်သိးသုတဟဲတုၤတဂ့ၤအဂီၢ် တၢ်ပၢၢ်ဆၢသုးတဖၣ် ဒီသဒၢန့ၢ်ဃၥ်၀ဲအဂ့ၢ် ပှၤလီၢ်အိၣ်ကမှံဖိတဖၣ် စံး၀ဲန့ၣ်လီၤ.
ပှၤလီၢ်အိၣ်ကမှံဖိတဂၤ စံး၀ဲလၢ” ပှၤလီၢ်အိၣ်ကမှံဖိတဖၣ်န့ၣ် ဘၣ်အိၣ်၀ဲဒၣ်သ့သ့ဘၣ်ဘၣ်လီၤ. ခဲအံၤဒူသ၀ီဖိတဖၣ် ဘၣ်အိၣ်၀ဲဒၣ်လၢထံကျိကၢၢ်နံၤန့ၣ်လီၤ. ပှၤလီၢ်အိၣ်ကမှံဖိတဖၣ်စ့ၢ်ကီး အိၣ်၀ဲဒၣ်ဖဲန့ၣ်အဃိ အ၀ဲသ့ၣ်ဟဲတုၤသ့ဧါ, တသ့ဧါ, မ့ၢ်ဟဲတုၤတခီ ဘၣ်ရဲၣ်ကျဲၤတမၠိလီၤ. သုးကီၣ်မံးရှၢၣ်အသုး မ့ၢ်ဟဲတုၤတခီ ဘၣ်ခီ၀ဲဆူ ကၠီၣ်တဲၣ်တပၤလီၤ. ခဲအံၤန့ၣ် ဘၣ်လီၢ်ဘၣ်ဆးဒံးလီၤ. ဒူသ၀ီပူၤစ့ၢ်ကီး ဘံၣ်ဘၢတဖၣ်အိၣ်၀ဲလီၤ. ဆိမိၣ် သုးကီၣ်မံးရှၢၣ်အသုးတဟဲတုၤဘၣ် ခီဖျိလၢအ၀ဲသ့ၣ်ဒီသဒၢန့ၢ်ဃၥ်၀ဲအဃိအဂ့ၢ်” စံး၀ဲန့ၣ်လီၤ.
ခံခီခံကပၤတၢ်ဒုးတဖၣ်အဃိ ပှၤစံၣ်သုးပှၤလီၢ်အိၣ်ကမှံဖိတဖၣ်အံၤ စးထီၣ်လၢလါအီးကထိဘၢၣ်လီၢ်ခံကတၢၢ်တနွံန့ၣ် မူခိၣ်စူၤ၀ဲဒၣ်အဃိ ပှၤလီၢ်အိၣ်ကမှံဖိတဖၣ် တဒိးန့ၢ် တၢ်ဒီသဒၢမူခိၣ်ထံတၢ်ပီးတၢ်လီတဖၣ် တလၢတလီၢ်ဘၣ်အဃိ ဘၣ်ကွၢ်ဆၢၣ်မဲၥ်ဘၣ်ဒီး တၢ်ကီတၢ်ခဲတဖၣ်၀ံၤ တၢ်အီၣ်တၢ်အီတပၤစ့ၢ်ကီး တလၢတလီၢ်ဘၣ်အဃိ ဘၣ်ဒိးသန့ၤ၀ဲဒၣ်လၢ ပှၤမၤဘူၣ်တဖၣ်အဂ့ၢ် ပှၤလၢမၤစၢၤ၀ဲ ပှၤလီၢ်အိၣ်ကမှံဖိတဖၣ် စံး၀ဲန့ၣ်လီၤ.
