လါနိၣ်၀့ဘၢၣ် ၆သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကီၢ်ကရ့ၣ်နံၣ် ထံဖိကီၢ်ဖိကမျၢၢ်ဒီးပှၤလီၢ်အိၣ်ကမှံဖိတဖၣ် ဒ်သိးကူးဘုသုတန့ၢ်တဂ့ၤအဂီၢ်ဒီး တၢ်အီၣ်တၢ်အီကကၤထီၣ်အဂီၢ် သုးကီၣ်မံးရှၢၣ်ပညိၣ်ဒုး၀ဲအဂ့ၢ် ကရ့ၣ်နံၣ်ပှၤဂ့ၢ်၀ီခွဲယၥ်ကရၢ KnHRG ထုးထီၣ်ပၥ်ဖျါဃၥ်၀ဲန့ၣ်လီၤ.
သုးကီၣ်မံးရှၢၣ်အသုးအံၤ ခးလီၤ၀ဲကျိဖးဒိၣ်တဖၣ်ဆူ စံၥ်ပျီပူၤတဖၣ်ဒီး ကမျၢၢ်လၢကူးဘုတဖၣ် ဒုးတ့ၢ်လီၤမ့ၣ်ပိၢ်လၢဒြိတဖၣ်အဃိ ကမျၢၢ်တၢ်သံတၢ်ပှၢ်ဒီးတၢ်ဘၣ်ဒိဘၣ်ထံးတဖၣ်အိၣ်ထီၣ်၀ဲအဂ့ၢ် စံး၀ဲန့ၣ်လီၤ.
တကးဘၣ် သုးကီၣ်မံးရှၢၣ်အသုး ပညိၣ်ဟဲထီၣ်သုးကျိၤဆူ ကီၢ်စဲၣ်အံၤအတၢ်သူၣ်တၢ်ဖျးစံၥ်ပျီပူၤအဃိ တၢ်သူၣ်လီၤ တၤသူၣ်တၤသၣ်တဖၣ်ဟဲစှၤလီၤကွံၥ်၀ံၤ ခီဖျိတၢ်ဘံၣ်တၢ်ဘၢတၢ်အိၣ်သးတဖၣ်အဃိ ကွၢ်ဆၢၣ်မဲၥ်ဘၣ်ဒီး တၢ်ကူးက့ၤ တၤသူၣ်တၤသၣ်လၢဘၣ်တၢ်သူၣ်လီၤ၀ဲခဲလၢၥ် တန့ၢ်တၢ်အိၣ်သးအဂ့ၢ် ပၥ်ဖျါဃၥ်၀ဲန့ၣ်လီၤ.
ကမျၢၢ်လၢကူးဘုတဖၣ် ဘၣ်တၢ်ဖီၣ်န့ၢ်ဆူၣ်အီၤတဖၣ်, ဘၣ်တၢ်ဖီၣ်ကမဲအီၤတဖၣ်ဒီး တၢ်မၤဆူၣ်မၤဆါရၢၢ်ရၢၢ်စၢၢ်စၢၢ်လၢတလီၤကူလီၤဂၥ်ဒီးပှၤကညီအဃိ ကမျၢၢ်ဖိကကူးဘုဒီးတၤသူၣ်တၤသၣ်အဂီၢ် သးသမူတၢ်လီၤဘၣ်ယိၣ်အိၣ်၀ံၤ ဟံၣ်ဖိဃီဖိကအိၣ်မူအီၣ်အီအဂီၢ် တၢ်ဘၣ်ယိၣ်ဘၣ်ဘှီတဖၣ် ဟဲဒိၣ်ထီၣ်၀ဲအဂ့ၢ် KnHRG ဟ့ၣ်ဒုးသ့ၣ်ညါဃၥ်၀ဲန့ၣ်လီၤ.
ပညိၣ်ဒုး၀ဲ ကမျၢၢ်အတၢ်အီၣ်တၢ်အီဒီးစ့တၢ်ဟဲနုၥ်လီၤအကျဲတဖၣ်အဃိ ကမျၢၢ်ဒီးပှၤလီၢ်အိၣ်ကမှံဖိတဖၣ် ဒ်သိးစ့တၢ်ဟဲနုၥ်လီၤသုတအိၣ်တဂ့ၤအဂီၢ်ဒီးဟံၣ်ဖိဃီဖိတဖၣ်ဘၣ်ကွၢ်ဆၢၣ်မဲၥ်ဘၣ်ဒီးတၢ်အီၣ်တၢ်အီတၢ်တၤတၢ်တဖၣ်၀ံၤ အယံၤအထၢန့ၣ်” ကကွၢ်ဆၢၣ်မဲၥ်ဘၣ်ဒီး တၢ်သၤ၀ံၣ်လီၤဒိအဂီၢ် သုးကီၣ်မံးရှၢၣ်ပညိၣ်မၤ၀ဲအဂ့ၢ် စံး၀ဲန့ၣ်လီၤ.
လါအီးကထိဘၢၣ်အတီၢ်ပူၤ ခီဖျိသုးကီၣ်မံးရှၢၣ်အသုး ပညိၣ်ဒုးကမျၢၢ်တဖၣ်အဃိ ကီၢ်ကရ့ၣ်နံၣ်ကမျၢၢ်ဖိ ဘၣ်ဒိ၀ဲ ၂၁ဂၤ၀ံၤ ဘၣ်သံ၀ဲ ၇ဂၤအဂ့ၢ် တၢ်သ့ၣ်ညါဘၣ်န့ၣ်လီၤ.
“ကတီၢ်ခဲအံၤတၢ်အိၣ်သးအဖီခိၣ် ကီၢ်စဲၣ်အဘုလီၢ် တ၀ၣ်ဃၣ်ဃၣ်အံၤ အိၣ်၀ဲဒၣ်ဖဲ ဒံၣ်မီၤစိၤမုၢ်နုၥ်တပၤန့ၣ်လီၤ. ခီဖျိလၢတၢ်အိၣ်သးတဖၣ်အဃိ စကစတပၤ ဟဲထီၣ်သုးကျိၤတဖၣ်, ဒုးတ့ၢ်လီၤမ့ၣ်ပိၢ်လၢဒြိတဖၣ် မၤ၀ဲတဘီယူၥ်ဃီန့ၣ်လီၤ. တနီၤတခီ ပၥ်ဒုအသးဒီးလဲၤကူး၀ဲ. တနီၤတခီ ပျံၤ၀ဲအဃိ တလီၤ၀ဲလၢ စံၥ်ပျီပူၤဘၣ်အဂ့ၢ်” ကရ့ၣ်နံၣ်လီၢ်က၀ီၤဖိတဂၤ စံး၀ဲန့ၣ်လီၤ.
သုးကီၣ်မံးရှၢၣ်အသုးအံၤ ဟဲထီၣ်သုးကျိၤဆူ ကီၢ်ကရ့ၣ်နံၣ်အပူၤ လၢဂံၢ်ဘါအါအါဂီၢ်ဂီၢ်အဃိ ကီၢ်စဲၣ်အပူၤတၢ်ဒုးတဖၣ်ဟဲဆူၣ်ထီၣ်၀ဲ၀ံၤ ပှၤလီၢ်အိၣ်ကမှံဖိအနီၣ်ဂံၢ်နီၣ်ဒွးစ့ၢ်ကီး ဟဲအိၣ်အါထီၣ်၀ဲအဂ့ၢ် KnHRGဒုးသ့ၣ်ညါဃၥ်၀ဲန့ၣ်လီၤ.
ပှၤလီၢ်အိၣ်ကမှံဖိလၢ ဟဲအိၣ်ကဒု၀ဲဒၣ်ဖဲ လါယူၤလံဒီးလါအီကူၥ်လံၤလံၤတဖၣ် တၢ်မၤစၢၤအီၤလၢလၢတန့ၢ်ဘၣ်အမဲၥ်ညါလါအီးကထိဘၢၣ်အပူၤခီဖျိပှၤလီၢ်အိၣ်ကမှံဖိအနီၣ်ဂံၢ်နီၣ်ဒွးဟဲအါထီၣ်၀ဲအဃိ လိၣ်ဘၣ်၀ဲဒိၣ်ဒိၣ်မုၢ်မုၢ်လၢ ဂ့ၢ်ဂီၤအူတၢ်အီၣ်တၢ်အီတၢ်မၤစၢၤဒီး တၢ်အိၣ်ကဒုလီၢ်တၢ်ပီးတၢ်လီၢ်တဖၣ်အဂ့ၢ် စံး၀ဲန့ၣ်လီၤ.
“ပှၤလီၢ်အိၣ်ကမှံဒဲက၀ီၤတနီၤ တၢ်အီၣ်ကၤထီၣ်၀ဲ အိၣ်ထီၣ်တနွံခံနွံညါ. ဖဲၣ်ခိၣ်, မိပၠဲဒီး ဒံၣ်မီစိၤမုၢ်နုၥ်တပၤန့ၣ် တၢ်ကီတၢ်ခဲအိၣ်၀ဲလီၤ. အကဲတ့ၢ်ပှၤလီၢ်အိၣ်ကမှံဖိဒီး ဘၣ်ဃ့ၢ်ပူၤဖျဲးသးကဒီးအသီတဘျီအဃိ ကီခဲဒိၣ်မးအဂ့ၢ်” ပှၤလၢမၤစၢၤ ကရ့ၣ်နံၣ်ပှၤလီၢ်အိၣ်ကမှံဖိတဖၣ် စံး၀ဲန့ၣ်လီၤ.
ကီၢ်ကရ့ၣ်လၢ ပှၤနီၣ်ဂံၢ်အိၣ် ၃ကလီၢ်ဃၣ်ဃၣ်အကျါ ၂ကလီၢ်ဘျဲၣ်န့ၣ် ဘၣ်စံၣ်သုးအဃိ တၢ်ကပၥ်ပနီၣ်အီၤဒ် တၢ်ဃံးတၢ်စ့ၤတၢ်အိၣ်သးအသိးအဂီၢ်ဒီး တၢ်ကမၤစှၤလီၤကွံၥ် တၢ်မၤကမၣ်ပှၤဟီၣ်ခိၣ်ဖိခွဲးယၥ်တဖၣ်အဂီၢ် KnHRGဃ့ထီၣ်၀ဲဆူ ဟီၣ်ခိၣ်ဘီမုၢ်ထံကီၢ်တဖၣ်အအိၣ်န့ၣ်လီၤ.
