လါနိၣ်၀့ဘၢၣ်(၃)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ကညီကီၫ်စဲၣ်,ကီးတရံးကီၫ်ဆၣ်အပူၤ သုးကီၣ်ကးသုးပာ်ဖှိၣ်လၢဟဲထီၣ်သုးကျိၤတဖၣ် ဖဲလါအီးကထိဘၢၣ်(၃၁)သီ အနံၤ,ဂီၤ၉နၣ်ရံၣ်ဃၣ်ဃၣ်အကတီၫ် တၫ်ဘၣ်သဂၢၫ်ခးလိာ်သးအိၣ်ထီၣ်၀ဲဒီးKNLAသုးပာ်ဖှိၣ်တဖၣ်အဂ့ၫ် တၫ်သ့ၣ်ညါ ဘၣ်လၢတၫ်ပၢၫ်ဆၢသုးဂ့ၫ်၀ီဂ့ၫ်ခီၣ်ထံးအအိၣ်န့ၣ်လီၤ.
တၫ်ဒုးတဘျီအံၤအပူၤ သုးကီၣ်ကးသုးပာ်ဖှိၣ်တကပၤဘၣ်ဒိဆါဒီးသံ၈ဂၤ,ဘၣ်ဒိနးနးကျံးကျံး ၃၀ဂၤအဂ့ၫ် ဂ့ၫ်ခီၣ်ထံးတၫ်ကစီၣ်၀ဲန့ၣ်တဲ၀ဲလီၤ.
တကးဘၣ်သုးကီၣ်ကးသုးပာ်ဖှိၣ်တနီၤစ့ၫ်ကီး တၫ်ပၢၫ်ဆၢသုးပာ်ဖှိၣ်တကပၤ ဖီၣ်မူန့ၫ်၀ဲအိၣ်အဂ့ၫ် တဲ၀ဲလီၤ.
သုးကီၣ်ကးသုးပာ်ဖှိၣ်သုးဖိသိလ့ၣ်(၃)ခိၣ်စ့ၫ်ကီး တၫ်ပၢၫ်ဆၢသုးတကပၤ မၤန့ၫ်ဃာ်၀ဲအဂ့ၫ် တဲ၀ဲလီၤ.
လၢမံးဖၣ်လဲတၫ်ဒုးကဲထီၣ်ဟီၣ်က၀ီၤအပူၤ သုးကီၣ်ကးအသုး ၂၃၀တၫ်လီၫ်သီ တကပၤ ခးလီၤကျိဖးဒိၣ် အိၣ်၀ဲဒီးလီၤတဲာ်ပိၫ်ဖးထီၣ်၀ဲလၢဒူသ၀ီအပူၤအဂ့ၫ် တၫ်ဒိးန့ၫ်ဘၣ်တၫ်ကစီၣ်လီၤ.
ခံကပၤတၫ်ဘၣ်သဂၢၫ်ခးလိာ်သး၀ံၤအလီၫ်ခံ သုးကီၣ်ကးတကပၤ ဟဲကွၫ်ဟုၣ်တၫ်လၢ Y12ကဘီယူၤ၀ံၤအလီၫ်ခံ ဖဲမုၫ်ထူၣ်(၁၂)နၣ်ရံၣ်အကတီၫ်န့ၣ် ဟဲတ့ၫ်လီၤမ့ၣ်ပိၫ်လၢဘီယူၤ(၆)ဘျီအဂ့ၫ် ဂ့ၫ်ခီၣ်ထံးတၫ်ကစီၣ်တဲ၀ဲလီၤ.
သုးကီၣ်ကးအသုးကျိၤလၢဟဲထီၣ်ဖဲကွံာ်မီၣ်တဲၣ်,ထံဖိ,မံးဖၣ်လဲသ၀ီတဖၣ်န့ၣ် မၤဆူးမၤဆါ,မၤသံဒူဖိသ၀ီဖိတဖၣ် အိၣ်၀ဲအဂ့ၫ်စ့ၫ်ကီးတဲ၀ဲလီၤ.
လါအီးကထိဘၢၫ်(၂)သီနံၤန့ၣ် KNLA-PC သုးဖိတဂၤလၢအိၣ်ဖဲမၠးကတဲၣ်ဒီးကက့ၤဆူကွံာ်မီၣ်တဲၣ် သုးကီၣ်ကးသုးပာ် ဖှိၣ်ဖီၣ်မၤသံအီၤန့ၣ်လီၤ.
၅၄၅,၅၄၇,၅၄၈သုးဒီးသုးကီၣ်ကးအသုးပိာ်မုၣ်တဖၣ် လၢဟဲတုၤဖဲနီၣ်ထပၣ်သ၀ီ နုာ်လီၤဟံးန့ၫ်ကမျၢၫ်တၫ်ဖိတၫ်လံၤ လၢဟံၣ်ပူၤဒီး က့ၤဆါလီၤက့ၤ၀ဲအိၣ်အဂ့ၫ် တဲ၀ဲလီၤ.
ထိး,ဆီလၢပှၤလီၫ်က၀ီၤဖိဘုၣ်ဃာ်တဖၣ် ခးသံအီၣ်၀ဲအိၣ်အဂ့ၫ်တဲ၀ဲလီၤ.လၢဖၣ်အၣ်ဆူကြူၫ်တုတဆီ ကီးတရံးသုးကီၣ်ကးသုးဖိတဖၣ်အဂီၫ် ဆှၢဃာ်၀ဲ သိလ့ၣ်(၃)ခိၣ်လၢဟဲတီၣ်ဃုာ်တၫ်စုက၀ဲၤတဖၣ်အဂ့ၫ် တဲ၀ဲန့ၣ်လီၤ.
