လါအီးကထိဘၢၣ် ၂၈သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
သုးမီၤစိရိၤ သုးကီၣ်မံးရှၢၣ်အသုး ကဒိၣ်စိပၢဆှၢကန့ၢ်က့ၤ ကညီကီၢ်စဲၣ်, ကီးတရံးကီၢ်ဆၣ်, အ့ရှၢဒီးတီနီၢ်ကစၢၢ်ကျဲလီၢ်လံၤအဂီၢ် ဟဲထီၣ်မၤဒုးယၤရဲၣ်ကျဲၤဆူၣ်ဆူၣ်ကိၤကိၤအဃိ တၢ်ဒုးတဖၣ်ဆူၣ်၀ဲ ကိးမုၢ်နံၤဃၣ်ဃၣ်အဂ့ၢ် လီၢ်က၀ီၤသုးဂ့ၢ်၀ီဂံၢ်ခီၣ်ထံးတၢ်ကစီၣ်တဖၣ် စံး၀ဲန့ၣ်လီၤ.
စးထီၣ်လၢ လါအီးကထိဘၢၣ်န့ၣ် သုးမီၤစိရိၤ သုးကီၣ်မံးရှၢၣ်အသုး ကဒိၣ်စိပၢဆှၢကန့ၢ်က့ၤ အ့ရှၢကျဲဒီးတီနီၢ်ကစၢၢ်ကျဲလီၢ်လံၤအဂီၢ် စူးကါ၀ဲ သုးသီလၢထၢန့ၢ်ဆူၣ်ဃၥ်၀ဲတဖၣ်၀ံၤ ဟဲထီၣ်မၤဒုးယၤရဲၣ်ကျဲၤတဖၣ်အဃိ တၢ်လီၢ်သကုးအပူၤ တၢ်ဒုးတဖၣ်ကဲထီၣ်၀ဲ ကိးမုၢ်နံၤဃၣ်ဃၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
လါအီးကထိဘၢၣ် ၂၄သီဒီး၂၅သီအနံၤန့ၣ် သုးကီၣ်မံးရှၢၣ်အသုးဒီး တၢ်ပၢၢ်ဆၢသုးပၥ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်လိၥ်သးဖဲ ကီးတရံးကီၢ်ဆၣ်, မၠးပတဲၣ်သ၀ီအပူၤ၀ံၤ သုးကီၣ်မံးရှၢၣ်တကပၤ တၢ်သံတၢ်ပှၢ်ဒီးတၢ်ဘၣ်ဒိဘၣ်ထံးတဖၣ်အိၣ်အါထီၣ်၀ဲအဃိ ဘၣ်ဂုၤက့ၤအခံအဂ့ၢ် တၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး ဖဲလါအီးကထိဘၢၣ် ၂၆သီအနံၤစ့ၢ်ကီး သုးကီၣ်မံးရှၢၣ်အသုး ခးလီၤ၀ဲကျိဖးဒိၣ်တဖၣ် ဆူ ထံဖိစၣ်ဒီးကီးဖၣ်သ၀ီအဘၢၣ်စၢၤအဃိ တၢ်ပၢၢ်ဆၢသုတကပၤစ့ၢ်ကီး က့ၤခး၀ဲလၢ ကျိဖးဒိၣ်တဖၣ်အဂ့ၢ်, တကးဘၣ် ဖဲအနံၤ မုၢ်ထူၣ် (၂း၀၅)မံးနံးအဆၢကတီၢ်စ့ၢ်ကီး တၢ်ဘၣ်သဂၢၢ်ဒုးလိၥ်သးအိၣ်ထီၣ်၀ဲ ဖဲ တမဲၣ်ကိသ၀ီဒီး ကီးနွဲသ၀ီတကပၤအဂ့ၢ် တၢ်သ့ၣ်ညါဘၣ်န့ၣ်လီၤ.
တကးဘၣ် သုးမီၤစိရိၤအသုးလၢ နဘူဟီၣ်က၀ီၤအိၣ်သူၣ်လီၤ ခမရ ၅၄၇သုးရ့ၣ်, ၅၄၈သုးရ့ၣ်, ၅၄၉သုးရ့ၣ်ဒီး DKBAဘိၣ်ဘံး, BGFကရၢ တဖၣ်အံၤ ဟဲထီၣ်သုးကျိၤမၤဒုးရဲၣ်ကျဲၤတဖၣ် ဖဲနဘူ-နါကီးတ့-လါခိၣ်ဘဲ-မၠးပတဲၣ် ယ့ၣ်ကွဲတီၣ်ကျဲမုၢ်တကပၤစ့ၢ်ကီးအဂ့ၢ် တၢ်သ့ၣ်ညါဘၣ်န့ၣ်လီၤ.
ဖဲလၢတၢ်ဒုးတဖၣ်အပူၤ သုးကီၣ်မံးရှၢၣ်တကပၤ သံဒီးဘၣ်ဒိတဖၣ်အိၣ်ထီၣ်၀ဲအကယၤတဖၣ်၀ံၤ ပှၤလၢစံၣ်ဖျိးတဖၣ်ဒီး ပှၤလၢဟဲပၥ်လီၤစုက၀ဲၤတဖၣ်ဆူ တၢ်ပၢၢ်ဆၢသုးကရူၢ်ပၣ်ဃုၥ် ပှၤလၢဘၣ်တၢ်ဖီၣ်န့ၢ်အီၤမူဒံးတဖၣ်စ့ၢ်ကီး အိၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
“လၢကီးတရံးန့ၣ် တနံၤအတီၣ်ပူၤန့ၣ် တၢ်ဒုးကဲထီၣ်လၢတၢ်လီၢ် ၅တီၤအပူၤလီၤ. ဒုး၀ဲ အ့ရှၢဒီးတီနီၢ်ကစၢၢ်လီၢ်လံၤမ့ၢ်န့ၢ်မး ကျဲကအိးထီၣ်က့ၤအဃိ ဟဲထီၣ်ဒုး၀ဲဒီးသုးအဂံၢ်အဘါအါအါဂီၢ်ဂီၢ်အဃိ ပှၤသံတစှၤန့ၢ်လၢ အကယၤတဖၣ်လံ၀ံၤ ပှၤလၢစံၣ်ဖျိးတဖၣ်ဒီးပှၤလၢဟဲပၥ်လီၤစုက၀ီၤတဖၣ်, ပှၤလၢဘၣ်ဒိတဖၣ်ဒီး ပှၤလၢဘၣ်တၢ်ဖီၣ်န့ၢ်မူဒံးတဖၣ်အိၣ်၀ဲ”အဂ့ၢ် လီၢ်က၀ီၤသုးဂ့ၢ်၀ီဂံၢ်ခီၣ်ထံးတၢ်ကစီၣ် စံး၀ဲန့ၣ်လီၤ.
သုးမီၤစိရိၤအသုးန့ၣ် ကီးတရံးကီၢ်ဆၣ်အပူၤ ဒ်သိးကဆှၢ၀ဲသုးတၢ်မၤစၢၤအဂီၢ် ဖၣ်အၣ် သုးတြိၤ ၂၂ ဆှၢပၥ်၀ဲ သုးသိ့လၣ်ဖးဒိၣ် ၄ခိၣ်ဆူ ကြုၢ်တုတပၤအဂ့ၢ်, တကးဘၣ် မီၣ်လဲမၠဲၣ် ရတခတပၤစ့ၢ်ကီး ဆှၢပၥ်၀ဲ သုးသိလ့ၣ်ဖးဒိၣ် ၆ခိၣ်ဆူ ကီးဘ့မိၣ်သ၀ီတပၤလၢ ဂံၢ်ဘါ ၁၀၀ဃၣ်ဃၣ်အဂ့ၢ်, တကးဘၣ် DKBA ၊ BGF ဒီး PCကရၢတဖၣ်စ့ၢ်ကီး မၤစၢၤ၀ဲဒ် နဲၣ်ကျဲဆှၢန့ၢ်သုးကီၣ်မံးရှၢၣ်အသုးတဖၣ်၀ံၤ နုၥ်လီၤဒုးစၢၤတၢ်အဂ့ၢ် တၢ်သ့ၣ်ညါဘၣ်န့ၣ်လီၤ.
