လါအီးကထိဘၢၣ် ၈သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ချၢၣ်လွံၢ်ထူၣ်, ဆီထံးကီၢ်ဆၣ်အပူၤ ခီဖျိသုးကီၣ်မံးရှၢၣ်အသုး ဒုးတ့ၢ်လီၤမ့ၣ်ပိၣ်လၢဒြိတဖၣ်အဃိ ကမျၢၢ်သံ၁ဂၤအဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲတၢ်ကစီၣ်န့ၣ်လီၤ.
လါအီးကထိဘၢၣ် ၂သီ, ဂီၤ(၁၁း၈)မံးနံးအဆၢကတီၢ် သုးကီၣ်မံးရှၢၣ်အသုးလၢအိၣ်ဖဲ ဆီထံးကီၢ်ဆၣ်, သၣ်ဆ့းကျဲမုၢ်ဖီခိၣ် ခလရ ၅၇သုးရ့ၣ် ဒုးတ့ၢ်လီၤမ့ၣ်ပိၢ်ဆူ ပၠ့ၣ်ယ့ၣ်သ၀ီပူၤအဃိ မ့ၣ်ပိၢ်လီၤတဲၥ်ပိၥ်ဖးထီၣ်၀ဲဒၣ်ဖဲ သ၀ီဖိလၢအမ့ၢ် အူကၠီၣ်သူၣ်ရးဟံၣ်အဖီခိၣ်၀ံၤ သးနံၣ် ၃၆နံၣ်, မသဲမၣ်ဒီးဒီၣ်ခ့ၣ်လးတဖၣ် ဘၣ်ဒိ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး လါအီးကထိဘၢၣ် ၁သီ, ဂီၤ(၅း၃၀)နၣ်ရံၣ်အဆၢကတီၢ် သုးကီၣ်မံးရှၢၣ်အသုး ခလရ ၂၀သုးရ့ၣ်လၢ အိၣ်ဖဲတီၣ်၀ံၣ် ခးလီၤ၀ဲ ၈၁မကျိဖးဒိၣ် ၁ဖျၢၣ်အဃိ လဲၤလီၤတဲၥ်ပိၥ်ဖးထီၣ်၀ဲဒၣ်ဖဲ ကွ့ဒလးကၠံသ၀ီပူၤ၀ံၤ သးနံၣ် ၅၄နံၣ် ဒီၣ်သဲး၀့ ဘၣ်သံ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
သုးဟံးန့ၢ်ဆူၣ်ထံကီၢ်တၢ်စီတၢ်ကမီၤ သုးကီၣ်မံးရှၢၣ်အသုး ပညိၣ်ဒုးလီၢ်က၀ီၤကမျၢၢ်အဃိ လီၢ်က၀ီၤကမျၢၢ်တၢ်သံတၢ်ပှၢ်ဒီးတၢ်ဘၣ်ဒိဘၣ်ထံးတဖၣ် ဘၣ်အိၣ်ထီၣ်၀ဲ ကိးမုၢ်နံၤဃၣ်ဃၣ်ဒီး ဘၣ်အိၣ်၀ဲဒၣ်လၢ တၢ်ပျံၤတၢ်ဖူးတၢ်လီၤဘၣ်ယိၣ်အပူၤအဂ့ၢ် KNU-လီၢ်ခၢၣ်သးပၥ်ဖျါဃၥ်၀ဲန့ၣ်လီၤ.
တကးဘၣ် သုးကီၣ်မံးရှၢၣ်သုးကျိၤတဖၣ် ဟဲနုၥ်လီၤဒွဲၣ်အူမၤဟးဂီၤကွံၥ်၀ဲ မ့ပၠ့ၣ်သ၀ီလၢအိၣ်ဖဲ ကီၢ်ရ့ၣ်ဘျံးဒ၀ဲၢ်, ပလီၢ်ကီၢ်ဆၣ်လၢ ခံဘျီတဘျီအဂ့ၢ် လီၢ်က၀ီၤဖိတဖၣ်စံး၀ဲန့ၣ်လီၤ.
လါအီးကထိဘၢၣ် ၆သီ, ဟါ(၉း၀၀)နၣ်ရံၣ်ဃၣ်ဃၣ်အဆၢကတီၢ် သုးကီၣ်မံးရှၢၣ်အသုး နုၥ်လီၤ၀ဲ မ့ပၠ့ၣ်သ၀ီပူၤ၀ံၤ ဒွဲၣ်အူမၤဟးဂီၤကွံၥ်၀ဲ ကမျၢၢ်အိၣ်ဟံၣ်ဃီတဖၣ်အဂ့ၢ်, ဘၣ်ထွဲသုးကီၣ်မံးရှၢၣ်အသုး ဒွဲၣ်အူမၤဟးဂီၤကွံၥ်တၢ်အဃိ ဟံၣ်ဃီအဖျၢၣ်ထဲလဲၣ် ဘၣ်အူထီၣ်ဟးဂီၤကွံၥ်၀ဲတခီ တၢ်မၤလီၤတံၢ်အီၤတန့ၢ်ဒံးဘၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
“တၢ်ဒုးကဲထီၣ်သးတအိၣ်ဘၣ်ဒီး မီၤစိရိၤသုးတဖၣ် နုၥ်လီၤဒွဲၣ်အူမၤဟးဂီၤကွံၥ်၀ဲ ကမျၢၢ်ဟံၣ်ဃီတဖၣ်လီၤ. အဃိ ကမျၢၢ်တဖၣ်တခီ ဘၣ်ဃ့ၢ်ပူၤဖျဲးသးဆူ တၢ်လီၢ်လၢပူၤဖျဲးန့ၣ်လီၤ. ဟံၣ်ဃီတၢ်ဟးဂုၥ်ဟးဂီၤတခီ တၢ်မၤလီၤတံၢ်အီၤတန့ၢ်ဒံးဘၣ်အဂ့ၢ်” လီၢ်က၀ီၤကမျၢၣ်တဂၤစံး၀ဲန့ၣ်လီၤ.
ဒ်န့ၣ်အသိး ဖဲလါစဲးပထ့ဘၢၣ် ၂၈သီ, ဟါ၈နၣ်ရံၣ်ဃၣ်ဃၣ်အဆၢကတီၢ်စ့ၢ်ကီး ခီဖျိသုးကီၣ်မံးရှၢၣ်အသုး နုၥ်လီၤသုးကျိၤ ဒွဲၣ်အူမၤဟးဂီၤကွံၥ်၀ဲ မ့ပၠ့ၣ်သ၀ီလၢ ခံဘျီတဘျီအဃိ ဟံၣ်ဃီတဖၣ် ဘၣ်ဟးဂူၥ်ဟးဂီၤကွံၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
