လါအီးထိဘၢၣ်(၇)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ကရ့ၣ်နံၣ်ကီၫ်စဲၣ်,ဒံၣ်မီဆိၣ်ဒီးဖရူၫ်ဆိၣ်ကျဲတကပၤ သုးခီၣ်မံးရှၢၣ်အသုးသိလ့ၣ်ကျိၤဘၣ်တၫ်ဒုး၀ဲဒီး တၫ်မၤဟးဂီၤန့ၫ် သုးသိလ့ၣ်(၁)ခိၣ်၀ံၤ တၫ်တယာ်လၢပှၤလီၫ်လၤအိၣ်တနီၤဘၣ်သံအဂ့ၫ် ကရ့ၣ်နံၣ်ဒီကလုာ်တၫ်ဒီသဒၢသုး (KNDF) ထုးထီၣ်ဘိးဘၣ်ရၤလီၤ၀ဲ ဖဲလါအီးကထိဘၢၣ်(၆)သီအနံၤန့ၣ်လီၤ.
ဒံၣ်မီဆိၣ်-ဖရူၫ်ဆိၣ် ကျဲမုၫ်ဖးဒိၣ်ဒီတကျိၤအပူၤ သုးခီၣ်မံးရှၢၣ်အသုးဒီးတၫ်ပၢၫ်ဆၢသုးတဖၣ်အဘၢၣ်စၢၤ တၫ်ဘၣ်သ ဂၢၫ်ခးလိာ်သးတဖၣ်အိၣ်ထီၣ်၀ဲကိးမုၫ်နံၤဃၣ်ဃၣ်အဂ့ၫ် KNDFအတနွံအတီၫ်ပူၤ သုးဂ့ၫ်၀ီတၫ်ကစီၣ်တၫ်ပာ်ဖျါအပူၤ ပာ်ဖျါဃာ်၀ဲလီၤ.
ဒ်န့ၣ်အသိး ၀့ၫ်ဖရူၫ်ဆိၣ်,သုးခီၣ်မံးရှၢၣ်အသုးပူၤ ရၤလီၤဃာ်သုးသိလ့ၣ်တဖၣ်ဒီးလဲၤ၀ဲဆူ နီၫ်ဂံၫ်(၁၄)ပတီၫ်ထီသုးတၫ် သိၣ်လိကၠိအကပၤဒူသ၀ီတဖၣ်၀ံၤ ကလဲၤထီၣ်ဆူ၀့ၫ်ဘီၣ်လခဲတကပၤအဃိ တၫ်ဘၣ်သဂၢၫ်ခးလိာ်သးအိၣ်ထီၣ်၀ဲအ ဂ့ၫ် ဟ့ၣ်ဒုးသ့ၣ်ညါ၀ဲလီၤ.
“အိၣ်လၢလွဲၫ်ကီၫ်ဒီးဟဲထီၣ်ဆူဖရူၫ်ဆိၣ် သုးခီၣ်မံးရှၢၣ်အသုးသိလ့ၣ် ကအိၣ်၀ဲအခိၣ်(၅၀)ဃၣ်ဃၣ်လီၤ.ပှၤသုးဖိမ့ၫ်ဂ့ၤ ,တၫ်စုက၀ဲၤမ့ၫ်ဂ့ၤလီၤ.နၫ်ဟူဘၣ်လၢကျိချံပှာ်သၣ်ဒုအါ၀ဲလီၤ.တၫ်ဃုထၢတချူးဘၣ် ဘီၣ်လခဲကျဲကဖျိအဂီၫ် သုးခီၣ် မံးရှၢၣ်တကပၤ ကတိဖျိ၀ဲန့ၣ် တၫ်သ့ၣ်ညါဘၣ်အဂ့ၫ်”ကရ့ၣ်နံၣ်သုးဂ့ၫ်၀ီဂ့ၫ်ခီၣ်ထံးတၫ်ကစီၣ်တဲ၀ဲလီၤ.
လၢဒံၣ်မီဆိၣ်ကီၫ်ဆၣ်,ဒီငၣ်ခါသ၀ီဒီးတနါအူးကွဲၣ်သ၀ီတဖၣ် သုးခီၣ်မံးရှၢၣ်ဟဲထီၣ်သုးကျိၤအဃိ တၫ်ဒုးကဲထီၣ် ကိးမုၫ်နံၤဒီးသုးခီၣ်မံးရှၢၣ်တကပၤ ပာ်ဂံၫ်ပာ်ဘါဒြိဒီးကျိဖးဒိၣ်တဖၣ်၀ံၤဒုးဃီၤတၫ်အဂ့ၫ် ပာ်ဖျါ၀ဲလီၤ.
“တၫ်ဘၣ်သဂၢၫ်ခးလိာ်သးဒုးကဲထီၣ်ကိးမုၫ်နံၤဃၣ်ဃၣ်လီၤ.သုးခီၣ်မံးရှၢၣ်တကပၤ လၢဒူသ၀ီကပိာ်ကပၤတဖၣ်န့ၣ် ကိးမုၫ်နံၤဃၣ်ဃၣ် ခးလီၤ၀ဲလၢကျိဖးဒိၣ်ဒီးလူၤတ့ၫ်လီၤမ့ၣ်ပိၫ်လၢဒြိတဖၣ်အဂ့ၫ်” တၫ်ဒီသဒၢသုးဖိတဂၤ တဲဘၣ်၀ဲ တၫ်ဒုးတၫ်အိၣ်သးန့ၣ်လီၤ.
ကရ့ၣ်နံၣ်ဒီးယိၤကလံၤထံးကီၫ်ဆၢ ဖဲၣ်ခိၣ်ကီၫ်ဆၣ်,မိပြဲကီၫ်ဆၣ်တကပၤစ့ၫ်ကီး သုးခီၣ်မံးရှၢၣ်အသုးဒီးပအဲဂၢၤကီၫ် သုးတဖၣ် ပာ်ဖှိၣ်ထီၣ်သးဒီးမၤသုးဂ့ၫ်၀ီတၫ်ဟူးတၫ်ဂဲၤတဖၣ်အိၣ်၀ဲအဂ့ၫ် တၫ်သ့ၣ်ညါဘၣ်လီၤ.
၀့ၫ်လွဲၫ်ကီၫ်မုၫ်ထီၣ် လွဲၫ်လ့ၣ်လ့ဟီၣ်က၀ီၤ လ့ၣ်ဖိၣ်ကၠံသ၀ီကပၤစ့ၫ်ကီး အပူၤကွံာ် လါစဲးပထ့ဘၢၣ်(၂၈)သီအနံၤန့ၣ် သုးခီၣ်မံးရှၢၣ်ဟဲထီၣ်သုးကျိၤအဃိ တၫ်ဒုးကဲထီၣ်(၃)သီဃၣ်ဃၣ်လၢKNDFသုးပာ်ဖှိၣ်တဖၣ် ဆူၣ်ဆူၣ်ကလဲာ်၀ံၤ တုၤလၢကနံၤအံၤတၫ်ဒုးကဲထီၣ်ဒံး၀ဲလီၤ.
၀့ၫ်လွဲၫ်လ့ၣ်လ့,ခမရ(၅၃၀)သုးရ့ၣ်န့ၣ် ဖဲအီးကထိဘၢၣ်(၃)သီအနံၤ ခးလီၤကျိဖးဒိၣ်အဃိ သးနံၣ်(၁၀)နံၣ်ဖိသၣ်တဂၤ ဘၣ်၀ဲဒီးတဂၤန့ၣ် ဘၣ်အဖံဖးခိၣ်ဒီးအိၣ်တ့ၫ်တဂၤန့ၣ် အစုထီၣ်တဲာ်ကွံာ်၀ဲတကပၤအဂ့ၫ် တဲ၀ဲလီၤ.
ဖဲတနွံအံၤအတီၫ်ပူၤ သုးခီၣ်မံးရှၢၣ်အသုးကျိၤအကျါ သုးဖိ(၃)ဂၤ ဟဲပာ်လီၤတၫ်စုက၀ဲၤလၢ ကရ့ၣ်နံၣ်သုးဖိတဖၣ် အိၣ်န့ၣ်လီၤ.လၢကတီၫ်အံၤ တၫ်ဒုးတၫ်အိၣ်သးတဖၣ်အဃိ တၫ်ကပလီၫ်သးလၢကလံၤကျါ,ဒြိတၫ်လီၤဘၣ်ယိၣ်တဖၣ် ဒီးအရ့မ့ၫ်တဒိၣ်ဘၣ်န့ၣ် တၫ်သုတဟးထီၣ်ဟးလီၤတဂ့ၤအဂီၫ်စ့ၫ်ကီး KNDFတဲဆီၣ်တခူထီၣ်ဃာ်၀ဲလီၤ.
ကရ့ၣ်နံၣ်ကီၫ်စဲၣ်ပူၤ မ့ၫ်တမ့ၫ်လၢ မဲၫ်စဲး,ဖါဆီဒီးရှါတီကီၫ်ဆၣ်ဘၣ်န့ၣ် ကီၫ်ဆၣ်လၢအိၣ်တ့ၫ်တဖၣ် ကမၤတၫ်ဃုထၢ အဂ့ၫ် သုးခီၣ်မံးရှၢၣ် ဘိးဘၣ်ရၤလီၤဃာ်၀ဲလီၤ.
ဘၣ်ဆၣ်သနာ်က့ တၫ်ဃုထၢလၢသုးခီၣ်မံးရှၢၣ်ကမၤ၀ဲန့ၣ် ကထီဒါ၀ဲတုၤလီၤတီၤလီၤဒီးတဟ့ၣ်တၫ်ပျဲလၢကမၤ၀ဲဘၣ် အဂ့ၫ်န့ၣ် ကရ့ၣ်နံၣ်ကီၫ်စဲၣ်ဂံၫ်ဘါကရၢတဖၣ် တဲခီၣ်ဆၢဃာ်၀ဲလီၤ.
