လါအီးကထိဘၢၣ် ၂သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ ၄နံၣ်ဘျဲၣ်အတီၢ်ပူၤ ကီၢ်ကရ့ၣ်နံၣ်ဒီးကယါ(ကယန်း)ဟီၣ်က၀ီၤအပူၤ သုးဂ့ၢ်၀ီ, ထံရူၢ်ကီၢ်သဲးဂ့ၢ်၀ီဒီး တၢ်မၤကမၣ်ပှၤဂ့ၢ်၀ီခွဲးယၥ်တဖၣ်အဃိ လီၢ်က၀ီၤကမျၢၢ်ဒီးပှၤလီၢ်အိၣ်ကမှံ ၈၀၀ဘျဲၣ် ဘၣ်သံ၀ဲအဂ့ၢ် ကရ့ၣ်နံၣ်တၢ်လဲၤထီၣ်လဲၤထီကမျၢၢ်ဂံၢ်ဘါကရူၢ်(PKPF) ထုးထီၣ်ပၥ်ဖျါဃၥ်၀ဲ ဖဲလါအီးကထိဘၢၣ် ၁သီအနံၤန့ၣ်လီၤ.
၂၀၂၅နံၣ်, ၉လါအတီၢ်ပူၤ လီၢ်က၀ီၤကမျၢၢ်ဒီး ပှၤလီၢ်အိၣ်ကမှံဖိ ၁၀၀ဘျဲၣ် ဘၣ်သံ၀ဲ၀ံၤ တၢ်ဒုးကဲထီၣ်တ့ၢ်၀ဲ အဘျီ ၁၅၀အဂ့ၢ် လံၥ်ဘိးဘၣ်ရၤလီၤအပူၤ ပၥ်ဖျါဃၥ်၀ဲန့ၣ်လီၤ.
တကးဘၣ် ကီၢ်ကရ့ၣ်နံၣ်ဒီး ကယါ(ကယန်း)ဟီၣ်က၀ီၤအပူၤ တမ့ၢ် သုးဂ့ၢ်၀ီတၢ်ခးပနီၣ်တဖၣ်ဒ်အမ့ၢ် တၢ်သိၣ်လိကၠိ ၃၀ဖျၢၣ်ဒီး တၢ်ဆါဟံၣ်အဒၢး ၁၉ဖျၢၣ်ဘၣ်ဟးဂီၤကွံၥ်၀ဲဒီး သုးကီၣ်မံးရှၢၣ်တကပၤ အကဘီယူၤဒုးသုးဒီးကဘီယူၤ ၄ခိၣ်ဘၣ်ဟးဂီၤကွံၥ်၀ဲ၀ံၤ အပှၤသုးဖိ ၃,၉၀၀ဘျဲၣ် သံ၀ဲအဂ့ၢ် လံၥ်ဘိးဘၣ်ရၤလီၤအပူၤ ပၥ်ဖျါဃၥ်၀ဲန့ၣ်လီၤ.
ကတီၢ်ခဲအံၤန့ၣ် ကီၢ်ကရ့ၣ်နံၣ်အပူၤ ခီဖျိလၢတၢ်ဃုထၢအဃိ သုးကီၣ်မံးရှၢၣ်တပၤ အိးထီၣ်၀ဲတၢ်ဒုးမဲၥ်သၣ် ၃ခါ၀ံၤ မၤဒုးယၤရဲၣ်ကျဲၤထီၣ်ဒုးတၢ်အဃိ တၢ်ဒုးဆူၣ်လၢ ဘီလခဲ, မိပၠဲဒီး ဖဲၣ်ခိၣ်တကပၤန့ၣ်လီၤ.
ထံဖိကီၢ်ဖိကမျၢၢ်လၢ အိၣ်ဖဲအဘူးဒီးတၢ်ဒုးမဲၥ်သၣ်တဖၣ်တခီ ကအိၣ်ဒီးသုးဂ့ၢ်၀ီတၢ်ပလီၢ်ပဒီဒီး ကဒိကနၣ်လူၤပိၥ်မၤထွဲ တၢ်ပၢၢ်ဆၢသုးတဖၣ် အတၢ်ဒုးသ့ၣ်ညါလံၥ်ပၥ်ဖျါတဖၣ်အဂီၢ် ကရ့ၣ်နံၣ်ဒီကလုၥ်တၢ်ဒီသဒၢသုး (KNDF) တပၤစ့ၢ်ကီး ထုးထီၣ်ပၥ်ဖျါဟ့ၣ်ဒုးသ့ၣ်ညါဃၥ်၀ဲန့ၣ်လီၤ.
