ပှၤလီၫ်အိၣ်မှံဖိလၢဒဲက၀ီၤပူၤတဖၣ် တၫ်ဟ့ၣ်တၫ်ပျဲလၢ ကမၤဘၣ်တၫ်လၢဖိးသဲစးအပူၤလံအဂ့ၫ် ကၠီၣ်တဲၣ်ပဒိၣ် ဘိးဘၣ်ရၤလီၤ

လါအီးကထိဘၢၣ်(၂)သီ,၂၀၂၅နံၣ်, အၣ်ထူခ့ၣ်တၢ်ကစီၣ်

လၢကီၫ်ဆၢ,ဘၣ်ကီဘၣ်ခဲဒဲက၀ီၤပူၤ ကီၫ်ပယီၤပှၤလီၫ်အိၣ်ကမှံဖိတဖၣ် ကီၫ်ကၠီၣ်တဲၣ်အပူၤ ကမၤဘၣ်တၫ်လၢဖိးသဲစး တၫ်ကဟ့ၣ်တၫ်ပျဲတၫ်ရဲၣ်တၫ်ကျဲၤန့ၣ် ကၠီၣ်တဲၣ်ကိတိာ်ခိၣ်ကျၢၫ် ဘိးဘၣ်ရၤလီၤ၀ဲလီၤ.

ကိတိာ်ခိၣ်ကျၢၫ် Anutin Charnvirakulန့ၣ် စးထီၣ်ဖဲလါအီးကထိဘၢၣ်(၁)သီနံၤ ပှၤလၢအိၣ်ဖဲကၠီၣ်တဲၣ်ကီၣ်ဆၢ ဘၣ်ကီဘၣ်ခဲဒဲက၀ီၤပူၤတဖၣ် ကလဲၤမၤဘၣ်တၫ်လၢတၫ်ချၢအဂီၫ် ကဟ့ၣ်၀ဲတၫ်ပျဲလၢယံာ်(၁)နံၣ်အဂ့ၫ်န့ၣ် ပာ်ဂၢၫ် ပာ်ကျၢၤ၀ဲလီၤ.

ကၠီၣ်တဲၣ်ပဒိၣ်တကပၤ ပာ်သူၣ်ပာ်သးဘၣ်လၢဟီၣ်ခိၣ်ဖိတၫ်ဒိသူၣ်ဒိသးဂ့ၫ်ခီၣ်ထံးတၫ်ဘျၢတဖၣ်,ပှၤလီၫ်အိၣ်ကမှံဖိ တဖၣ်အံၤ ဖဲလၢအိၣ် ဖဲကီၫ်ကၠီၣ်တဲၣ်အကတီၫ် မ့ၫ်လၢဒိကနၣ်လူၤပိာ်မၤထွဲကၠီၣ်တဲၣ်အထံကီၫ်တၫ်ဘျၢသဲစးတဖၣ်ဒီး အဲၣ်ဒိးဒုးအိၣ်ထီၣ်န့ၫ်၀ဲတၫ်ခွဲးတၫ်ယာ်တဖၣ်အဃိ ဆၢတဲာ်၀ဲဒ်သိးအံၤအဂ့ၫ် Anutinတဲ၀ဲလီၤ.

လၢတကပၤ ကၠီၣ်တဲၣ်ဒီးခဲၣ်ဘီဒံယါအဘၢၣ်စၢၤ သုးဂ့ၫ်၀ီတၫ်သဘံၣ်သဘုၣ်အလီၫ်ခံ ခီကီၫ်ပှၤမၤတၫ်ဖိလၢကၠီၣ်တဲၣ် တဖၣ် ခဲၣ်ဘီဒံယါပဒိၣ်ကိးက့ၤအဖီခိၣ် ကၠီၣ်တဲၣ်တကပၤ တမ့ၫ်ကလိၣ်ဘၣ်ပှၤမၤတၫ်ဖိဘၣ်န့ၣ် ပတဲသ့လၢဆှၢလီၤ န့ၫ်ဘၣ်၀ဲတၫ်ကစီၣ်န့ၣ်လီၤ.

ပှၤလၢတတူၫ်လိာ် ကၠီၣ်တဲၣ်အတၫ်ပာ်ပနီၣ်တဖၣ်ဒီးတၫ်ဘျၢတဖၣ်တခီ ကၠီၣ်တဲၣ်စ့ၫ်ကီး တလိၣ်မၤစၫ်လီၤန့ၫ်တၫ်လၢ အဂီၫ်ဘၣ်အဂ့ၫ်,ထံကီၫ်လၢအိၣ်ဒီးတၫ်သဘံၣ်သဘုၣ်လၢကၠီၣ်တဲၣ်တကပၤ ကသ့ၣ်ညါဘၣ်၀ဲလၢ တဘၣ်ဆိကမိၣ် ကမၣ်လၢကၠီၣ်တဲၣ်ပှၤမၤတၫ်ဖိဂံၫ်ဘါကလီၤစှၤတဂ့ၤအဂ့ၫ် Anutinတဲ၀ဲလီၤ.

အ၀ဲတဲ၀ဲလၢ ကၠီၣ်တဲၣ်တၫ်မၤကစၫ်တဖၣ် ကဘၣ်ဟ့ၣ်ပှၤလီၫ်အိၣ်ကမှံဖိ လါလဲဒ် ပှၤမၤတၫ်ဖိဂ့ၫ်၀ီတၫ်ဘျၢပာ်လီၤဃာ် အသိးဒီးတၫ်န့ၫ်ဘျူးခွဲးယာ်တဖၣ် ကဟ့ၣ်စ့ၫ်ကီး၀ဲအဂ့ၫ် အုၣ်ကီၤ၀ဲန့ၣ်လီၤ.ကဲထီၣ်၀ဲကၠီၣ်တဲၣ်အပှၤမၤတၫ်ဖိလၢဖိးသဲ စးအဃိ ကဒီသဒၢန့ၫ်တၫ်လၢအ၀ဲသ့ၣ်အဂီၫ်အဂ့ၫ် ကိတိာ်ခိၣ်ကျၢၫ်တဲ၀ဲလီၤ.

ကီၫ်ဆၢဘၣ်ကီဘၣ်ခဲဒဲက၀ီၤ(၉)ခါအပူၤ ပှၤလီၫ်အိၣ်ကမှံဖိတဖၣ်န့ၣ် လၢကီၫ်ကၠီၣ်တဲၣ် ကလံၤစိး,တၫ်ခၢၣ်သးဒီး မုၫ် ထီၣ်တကပၤ ကီၫ်စဲၣ်(၄၃)ဘ့ၣ်အပူၤ မၤတၫ်ခွဲးယာ်ကန့ၫ်၀ဲအဂ့ၫ် တဲ၀ဲလီၤ.

ဘၣ်ကီဘၣ်ခဲဒဲက၀ီၤတဖၣ်န့ၣ် အိၣ်ဖဲကီၫ်ပယီၤကီၫ်ဆၢ တးခ်ကီၫ်ရ့ၣ်ပူၤ(၃)ခါ,မဲၫ်ဟီၣ်ဆီၣ်ပူၤ(၄)ခါ,ကၣ်ခၠးနၣ်ဘူၣ်ရံၤ အပူၤ(၁)စုာ်စုာ်န့ၣ်လီၤ.ဖဲဒဲက၀ီၤတဖၣ်န့ၣ်အပူၤ ဒ်ပှၤဘၣ်ကီဘၣ်ခဲလၢဖိးသဲစးအသိး ဟ့ၣ်ဃာ်နီၫ်ကစၫ်တၫ်ဂ့ၫ်တၫ်ကျိၤ ဒီးအိၣ်ကဒုအကျါ ပှၤလၢမၤတၫ်န့ၫ် ပာ်ဃုာ်၀ဲ ၄၂,၆၀၁ဂၤအဂ့ၫ် တၫ်သ့ၣ်ညါဘၣ်လီၤ.

ကၠီၣ်တဲၣ်ဒီးခဲၣ်ဘီဒံၣ်ကီၫ်ဆၢသုးဂ့ၫ်ကီတၫ်သဘံၣ်သဘုၣ်အဃိ ခဲၣ်ဘီဒံယါခီကီၫ်ပှၤမၤတၫ်ဖိလၢကၠီၣ်တဲၣ်တဖၣ် အနီၫ် ဂံၫ်နီၫ်ဒွးလၢအကလး က့ၤဆူအထံအကီၫ်န့ၣ်လီၤ.တၫ်ဂ့ၫ်၀ဲအံၤအလီၫ်ခံ တၫ်ကစီၣ်ဟးထီၣ်စ့ၫ်ကီးလၢ မ့ၫ်လၢခဲၣ်ဘီဒံ ယါပဒိၣ် ဟ့ၣ်တၫ်ဆီၣ်သနံးအဃိန့ၣ်လီၤ.