ကညီဖီၣ်စုက၀ဲၤကရၢ ၃ဖု အၢၣ်လီၤတူၢ်လိၥ်လၢ ကပၥ်ဖှိၣ်ဒီသဒၢန့ၢ် သုးကီၣ်မံးရှၢၣ်တၢ်ဃုထၢ

လါစဲးပထ့ဘၢၣ် ၂၉သီ,၂၀၂၅နံၣ်, အၣ်ထူခ့ၣ်တၢ်ကစီၣ်

တၢ်ဃုထၢလၢသုးကီၣ်မံးရှၢၣ် ကရဲၣ်ကျဲၤမၤ၀ဲဖဲ ၂၀၂၅နံၣ်, လါဒံၣ်စ့ဘၢၣ်အတီၢ်ပူၤအံၤ ကညီသုးခိးကီၢ်ဆၢ(BGF), ဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA), (KNU/KNLA-PC)ကရၢတဖၣ် ကပၥ်ဖှိၣ် ကဒီသဒၢန့ၢ်၀ဲအဂ့ၢ် အၢၣ်လီၤတူၢ်လိၥ်၀ဲန့ၣ်လီၤ.

ဖဲလါစဲးပထ့ဘၢၣ် ၂၈သီအနံၤ, ကရၢ၃ဖု ပတီၢ်ထီခိၣ်နၢ်တဖၣ် ထံၣ်လိၥ်တဲသကိး၀ဲဖဲ ရၤမတံကီၢ်ဆၣ်, သ့ၣ်ကတ့ၣ်သ၀ီအပူၤအိၣ် ကညီသုးခိၣ်ကီၢ်ဆၢ(BGF) နီၣ်ဂံၢ် (၂)သုးဟီၣ်က၀ီၤ ၀ဲၤလီၢ်ခိၣ်သ့ၣ်တၢ်လီၢ်၀ံၤအလီၢ်ခံ ဘိးဘၣ်ရၤလီၤ၀ဲ တၢ်အၢၣ်လီၤတူၢ်လိၥ်အံၤန့ၣ်လီၤ.

တၢ်အိၣ်ဖှိၣ်လၢတၢ်ယူၥ်န့ၢ်အမံၤလၢ “တၢ်မုၥ်တၢ်ခုၣ်ဒီးဟီၣ်က၀ီၤတၢ်အိၣ်ဂၢၢ်ဆိးကျၢၢ်” တၢ်ထံၣ်လိၥ်တဲသကိးအပူၤ ကညီသုးခိးကီၢ်ဆၢ(BGF) သုးခိၣ်ဒိၣ်စိ စီၤခၠံးသူၣ်, သုးခိၣ်ဒိၣ်ဖိ စီၤတ့ၣ်၀့, သုးခိၣ်ဒိၣ်ဖိ စီၤမိးသိၣ်, KNU/KNLA-PCကရၢခိၣ်ခံ ဒီးကထၢၣ်နီၢ်ကပီၤထူဒီး DKBA သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤစတံ, သုးခိၣ်ကျၢၢ်ဂီၢ်ဂ့ၢ် စီၤဆါအီၣ်ပၣ်ဃုၥ် သုးခိၣ်သုးနၢ်အဂုၤအဂၤတဖၣ်စ့ၢ်ကီး လဲၤထီၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.

BGF ဒီး DKBAတဖၣ်စ့ၢ်ကီး ကဆီၣ်ထွဲမၤစၢၤ၀ဲ သုးကီၣ်မံးရှၢၣ်တၢ်ဃုထၢအဂ့ၢ်န့ၣ် ဘိးဘၣ်ရၤလီၤဃၥ်၀ဲ ကရၢတဖုစုၥ်စုၥ်လီၤလီၤဆီဆီန့ၣ်လီၤ. BGF အလါစဲးပထ့ဘၢၣ် ၃သီအနံၤ အလံၥ်ဘိးဘၣ်ရၤလီၤပူၤတခီ ကဆီၣ်ထွဲ၀ဲတၢ်ဃုထၢအံၤလၢလၢပှဲၤပှဲၤလီၤဒီး ကဒီသဒၢန့ၢ်၀ဲ ပှၤလၢကဟ့ၣ်တၢ်ဖးတဖၣ်အဂ့ၢ် စံး၀ဲန့ၣ်လီၤ. ဒ်န့ၣ်အသိး DKBA လါစဲးပထ့ဘၢၣ် အလံၥ်ဘိးဘၣ်ရၤလီၤပူၤတခီ ကတီၢ်ခဲအံၤတၢ်သဘံၣ်သဘုၣ်တဖၣ်န့ၣ် တၢ်ဘှါရှဲအီၤလၢ သုးဂ့ၢ်၀ီတန့ၢ်ဘၣ်ဒီး ထဲဒၣ်တၢ်ဃုထၢန့ၣ် တၢ်ဆီတလဲအဂီၢ် ကျဲတဘိအဃိ ကဆီၣ်ထွဲမၤစၢၤ၀ဲအဂ့ၢ် ဘိးဘၣ်ရၤလီၤဃၥ်၀ဲန့ၣ်လီၤ.

ဘၣ်ဆၣ်ဒီး ကညီဖီၣ်စုက၀ဲၤကရၢ၃ဖု အတၢ်အိၣ်ဆၢထၢၣ်လၢ တၢ်ဃုထၢအဖီခိၣ်န့ၣ် ထီဒါလိၥ်အသးဒီး (KNU)အတၢ်ပၥ်သးန့ၣ်လီၤ. တၢ်ဃုထၢအံၤန့ၣ် မ့ၢ်ဒၣ် တၢ်ကဃုထၢထီၣ် ပှၤလၢကမၤဘၣ်ဘျူး မီၤစိရိၤသုးကရူၢ်အတၢ်ဘၣ်ဘျူးတဖၣ်လီၤအဂ့ၢ် KNUဘိးဘၣ်ရၤလီၤဃၥ်၀ဲ ဖဲလါအီကူၥ် ၂၆သီအနံၤန့ၣ်လီၤ.

ဖဲကညီဖီၣ်စုက၀ဲၤ ကရၢ၃ဖုထံၣ်လိၥ်သးလၢ တၢ်မုၣ်တၢ်ခုၥ်အဂီၢ်တကတီၢ်ဃီ KNU အစုတီၤဖီလၥ်တၢ်ပၢၢ်ဆၢသုးပၥ်ဖှိၣ်တဖၣ်ဒီး သုးကီၣ်မံးရှၢၣ်အဘၢၣ်စၢၤ တၢ်ဒုးဆူၣ်၀ဲဖဲ ၀့ၢ်ရၤမတံ ကလံၤထံးတပၤ, လ့က့ၣ်ကိၥ်၀့ၢ်သီအကပၤန့ၣ်လီၤ.