လါစဲးပထ့ဘၢၣ်(၃၀)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ကရ့ၣ်နံၣ်ကီၫ်စဲၣ်ပူၤ ကမျၢၫ်လၢအိၣ်ဖဲဒူသ၀ီလၢဘူးဒီးသုးခီၣ်မံးရှၢၣ်အသုးကျိၤဟဲထီၣ်တၫ်လီၫ်တဖၣ် ကအိၣ်ဒီးတၫ် ဘံၣ်တၫ်ဘၢတၫ်ပလီၫ်အဂီၫ်ဒီးကဒိကနၣ်ဘၣ် ဟီၣ်က၀ီၤတၫ်ပၢဆၢသုးတဖၣ်အတၫ်ထုးထီၣ်ဘိးဘၣ်ရၤလီၤအဂီၫ် ကရ့ၣ်နံၣ်ဒီကလုာ်တၫ်ဒီသဒၢသုး(KNDF) ဟ့ၣ်ဒုးသ့ၣ်ညါဘိးဘၣ်ရၤလီၤဃာ်၀ဲလီၤ.
သုးခီၣ်မံးရှၢၣ်အသုးန့ၣ် စးထီၣ်ဖဲလါအီကူာ်အပူၤန့ၣ် ဟဲထီၣ်သုးကျိၤဒီးဂံၫ်ဘါအါအါဂီၫ်ဂီၫ် ဆူဒံၣ်မီဆိၣ်ကီၫ်ဆၣ်ပူၤဒီး ဟဲထီၣ်သုးကျိၤလၢဒံၣ်မီဆိၣ်-ဖရူၣ်ဆိၣ်-ဘီၣ်လခဲကျဲမုၫ်ဒီတကျိၤအပူၤအဃိ လၢကျဲဒီတကျိၤတၫ်ဒုးကဲထီၣ်၀ဲအဂ့ၫ် တဲ၀ဲလီၤ.
ဒံၣ်မီဆိၣ်ကီၫ်ဆၣ်,ဒီငၣ်ခါက၀ီၤဒ့စ့ၫ်ကီး သုးခီၣ်မံးရှၢၣ်အသုး ဟဲထီၣ်သုးကျိၤလၢဂံၫ်ဘါအါအါဂီၫ်ဂီၫ်အသိး,ဒုးခးလီၤ တၫ်လၢကလံၤကျါ,ဒုးတၫ်လၢဒြိတဖၣ်ဒီးခးလီၤကျိဖးဒိၣ် ကိးမုၫ်နံၤအဂ့ၫ် တၫ်သ့ၣ်ညါဘၣ်လီၤ.
“သုးခီၣ်မံးရှၢၣ်အသုးကျိၤလၢဟဲထီၣ်ဖဲဒံၣ်မီဆိၣ်-နီၣ်ခါတကပၤ တၫ်ဒုးကဲထီၣ်လၢပ၀ဲတၫ်ပၢၫ်ဆၢသုးတဖၣ် ကိးမုၫ်နံၤ န့ၣ်လီၤ.တၫ်ဒုးန့ၣ်ပတဲသ့လၢဆူၣ်၀ဲလီၤ.တနံၤအံၤစ့ၫ်ကီးကဲထီၣ်အဖၢမုၫ်လီၤ.လၢဟီၣ်က၀ီၤအဂၤတဖၣ်အပူၤစ့ၫ်ကီးတၫ်ဒုးကဲထီၣ်၀ဲအိၣ်န့ၣ်လီၤ.ဘၣ်ဆၣ်နာ်သက့ လၢဒံၣ်မီဆိၣ်တကပၤဒု ဆူၣ်၀ဲဒိၣ်မးလီၤ”အဂ့ၫ် KNDFလီၫ်ခၢၣ်သးတၫ် ကစီၣ်တၫ်ဘိးဘၣ်ရၤလီၤပှၤဘၣ်မူဘၣ်ဒါ မီၣ်စံၣ် တဲ၀ဲန့ၣ်လီၤ.
လၢကတီၫ်အံၤ သုးခီၣ်မံးရှၢၣ်သုးကျိၤလၢဟဲထီၣ်လၢဒံၣ်မီဆိၣ်ဆူ ဖရူၣ်ဆိၣ်အံၤ သုးသိလ့ၣ်ကျိၤစ့ၫ်ကီး ဟဲထီၣ်ဃုာ်ဒီး အ၀ဲသ့ၣ်၀ံၤ အခဲအံၤဟဲတုၤ၀ဲဖဲနီၫ်ဂံၫ်(၁၄) ပတီၫ်ထီသုးတၫ်မၤလိကၠိဒီး ဖဲန့ၣ်တဆီ ရဲၣ်ကျဲၤ၀ဲလၢကလဲၤထီၣ်သုးကျိၤ ဆူ ၀့ၫ်ဘီၣ်လခဲအဂ့ၫ် KNDF ဟ့ၣ်ဒုးသ့ၣ်ညါထုးထီၣ်ဘိးဘၣ်ရၤလီၤ၀ဲန့ၣ်လီၤ.
