လါအီကူၥ်(၂၆)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
တဲၣ်ဖိကၣ်ကၠံၣ်ကံၣ် ဟဲခီအူတၢ်အဃိ ကီၢ်ဘံၣ်ယဲးနၣ် အကလံၤစိးဒီးတၢ်ချၢၣ်သးပီၣ်လဲၣ်နံၤ ဟီၣ်က၀ီၤတဖၣ်အပူၤ မူခိၣ်စူၤဒိၣ်ဒိၣ်မုၢ်မုၢ်၀ံၤ ထံလူၢ်ဘၢတၢ်တဖၣ်ကဲထီၣ်၀ဲန့ၣ်လီၤ.
ကလံၤမုၢ်အံၤ အိၣ်လၢတရူးပီၣ်လဲၣ်ပူၤတခီ ဟဲသုးဃီၤအသးဆူ မုၢ်နုၥ်တပၤဒီး ဘံၣ်ယဲးနၣ်အမုၢ်ထီၣ်ပီၣ်လဲၣ်နံၤတဆီ ဟဲနုၥ်လီၤအူတၢ်အံၤ ကလံၤအူတၢ်အသဟီၣ်န့ၣ် ၁နၣ်ရံၣ် ၁၃၃ကံၣ်လိၣ်မံၣ်ထၢၣ်တုၤ၁၆၆ကံၣ်လိၣ်မံၣ်ထၢၣ် ဆူၣ်၀ဲန့ၣ်လီၤ. ဘၣ်ဆၣ်ဒီး ကၣ်ကၠံၣ်ကံၣ်အံၤ ကဟဲသုးအသးဆူ ဟီၣ်ခိၣ်လိၤတပၤ၀ံၤ အသဟီၣ်ကစှၤလီၤ၀ဲအဂ့ၢ် မူခိၣ်ကလံၤသီၣ်ဂီၤ ပှၤကူၣ်သ့ကူၣ်ဘၣ်တဖၣ် တယၥ်၀ဲန့ၣ်လီၤ.
ကလံၤမုၢ်အံၤ ဖဲလါအီကူၥ်(၂၅)သီအနံၤန့ၣ် ဟဲခီ၀ဲ တရူးဟဲၣ်နၣ်ကီးကလံၤထံးအစိးတပၤ၀ံၤ ဟဲနုၥ်လီၤ၀ဲလၢ ကီၢ်ဘံၣ်ယဲးနၣ်အပူၤန့ၣ်လီၤ. ဖဲန့ၣ်တဆီ ကဟဲခီ၀ဲ ဟီၣ်ခိၣ်လိၤ လၣ်အိၣ်ထံကီၢ်၀ံၤ ကဟဲသုးအသးဆူ ကီၢ်ကၠီၣ်တဲၣ် ကလံၤစိးတပၤအဂ့ၢ် တၢ်တယၥ်ဃၥ်၀ဲန့ၣ်လီၤ.
ခီဖျိကလံၤမုၢ်အဃိ ကီၢ်ဘံၣ်ယဲးနၣ်အပူၤ သ့ၣ်ထူၣ်လီၤတကူၥ်, မ့ၣ်အူတၢၣ်လီၤပှီၢ်, ဟံၣ်ဃီဒီးကျဲမုၢ်တဖၣ် ထံလူၢ်ဘၢတၢ်တဖၣ် အိၣ်ထီၣ်၀ဲ၀ံၤ တၢ်ဟးဂုၤဟးဂီၤတၢ်အိၣ်သးလီၤတံၢ်လီၤဆဲးတခီ တၢ်တသ့ၣ်ညါဘၣ်ဒံးဘၣ်. ပှၤလၢအိၣ်ဆိးဖဲ ပီၣ်လဲၣ်နံၤတဖၣ်တခီ ထံၣ်ဘၣ်၀ဲ လပီဖးဒိၣ်လၢအိၣ်တုၤ ၇ခီၣ်လၣ်(ပ့ၣ်)အဂ့ၢ် စံး၀ဲန့ၣ်လီၤ.
ဟၣ်တၣ်ကီၢ်စဲၣ်ပူၤတခီ တၢ်လီၢ်အါတီၤအပူၤ လီမ့ၣ်အူဒီၣ်တဲၥ်ကွံၥ်အသး၀ံၤ တမၢၣ်လၢဘူၣ်ညၣ်တဖၣ်စ့ၢ်ကီး ဘၣ်ဟးဂီၤကွံၥ်၀ဲန့ၣ်လီၤ. ခီဖျိမူခိၣ်စူၤဒိၣ်ဒိၣ်မုၢ်မုၢ်အဃိ ဟီၣ်ခိၣ်လၥ်တဖၣ်စ့ၢ်ကီး ကဲထီၣ်တ့ၢ်၀ဲန့ၣ်လီၤ.
ကီၢ်ဘံၣ်ယဲးနၣ်တခီ တချူးလၢကလံၤမုၢ်နုၥ်လီၤဒံးအကတီၢ် ဟီၣ်က၀ီၤဒိၣ်တၢ်လီၢ်တဖၣ်လၢ တၢ်လီၤဘၣ်ယိၣ်အိၣ်အပူၤ လီၢ်က၀ီၤဖိ(၆)ကလီၢ်ဃၣ်ဃၣ် ဘၣ်တၢ်သုးဆိးပၥ်အီၤအသိး ကဘီယူၤသန့ၤ, ဘူၣ်တၢ်တဖၣ်, ၀ဲၤဒၢးတဖၣ်ဒီး ကၠိတဖၣ်စ့ၢ်ကီး ဘၣ်တၢ်ကးတံၥ်ဃၥ်၀ဲန့ၣ်လီၤ.
ကၣ်ကၠံၣ်ကံၣ်န့ၣ် တနံၣ်အံၤ ကလံၤမုၢ်လၢဟဲခီ၀ဲ ကီၢ်ဘံၣ်ယဲးနၣ်အပူၤ မ့ၢ်အဆူၣ်ကတၢၢ် ကလံၤမုၢ်န့ၣ်လီၤ. ပဒိၣ်စ့ၢ်ကီး ခီဖျိကလံၤမုၢ်အဃိ မူခိၣ်ကလံၤသီၣ်ဂီၤ တၢ်ပိၥ်ထွဲထီၣ်အခံ တၢ်လီၤဘၣ်ယိၣ်တဖၣ် တၢ်ကပၥ်သူၣ်ပၥ်သးဒိၣ်ဒိၣ်ယိၥ်ယိၥ်အဂီၢ် ဟ့ၣ်ပလီၢ်ဃၥ်၀ဲန့ၣ်လီၤ.
ကီၢ်ဘံၣ်ယဲးနၣ် ကလံၤစိးဟီၣ်က၀ီၤတနီၤအပူၤတခီ ဖဲလါအီကူၥ်(၂၅)သီအနံၤ ဟါလီၤခီတုၤ ၂၆သီအနံၤဂီၤအဆၢကတီၢ်ပူၤ မူခိၣ်ကစူၤဒိၣ်ဒိၣ်မုၢ်မုၢ်တုၤအပတီၢ်တုၤလၢ တၢ်စူၤယူၥ် ၅၀၀မံၣ်လံၣ်မံၣ်ထၢၣ်အဂ့ၢ် တၢ်တယၥ်ဃၥ်၀ဲန့ၣ်လီၤ.
ကီၢ်ဘံၣ်ယဲးနၣ်ပဒိၣ်အံၤ ဒ်သိးကမၤ၀ဲတၢ်မၤပူၤဖျဲးတၢ်ဖံးတၢ်မၤတဖၣ်အဂီၢ် ဂ့ၢ်ဂီၤအူဟ့ၣ်ပလီၢ်ဃၥ်၀ဲ အသုးမုၢ်ဒိၣ်အပှၤသုးဖိ (၁၆၅၀၀)ဘျဲၣ်ဒီး သုးပၥ်ကီၤ (၁၀၇၀၀၀)ဘျဲၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
Ref: CNA
Photo – AFP
