လါအီကူာ်(၁၁)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ကီၫ်ကရ့ၣ်နံၣ်,လွဲၫ်ကီၣ်-ဒံမီးဆိၣ်-ဖရူၣ်ဆိၣ်ကျဲမုၫ်ဖးဒိၣ် တၫ်ခီဂာ်အီၤတၫ်ပျဲန့ၣ် စးထီၣ်ဖဲလါအီကူာ်(၁၀)သီအနံၤန့ၣ် တၫ်ကးတံာ်ကွံာ်အီၤလၢတအိၣ်ဒီးမုၫ်နံၤမုၫ်သီအဂ့ၫ် ကရ့ၣ်နံၣ်ဒီကလုာ်တၫ်ဒီသဒၢသုးKNDF ထုးထီၣ်ဘိးဘၣ်ရၤလီၤ၀ဲလီၤ.
လၢကတီၫ်အံၤ သုးခီၣ်မံးရှၢၣ်အသုးန့ၣ် ဟဲထီၣ်သုးကျိၤဟူးဂဲၤဖဲဒံမီးဆိၣ်ကီၫ်ဆၣ်ပူၤအဃိ တၫ်ဘၣ်သဂၢၫ်ခးလိာ်သးကဲထီၣ်၀ဲဒီးတၫ်ပၢၫ်ဆၢသုးပာ်ဖှိၣ်တဖၣ်န့ၣ်လီၤ.
တကးဘၣ် ဖရူၣ်ဆိၣ်ကီၫ်ဆၣ်,သုးခီၣ်မံးရှၢၣ်စ့ၫ်ကီး လၢဒံမီးဆိၣ်-ဖရူၣ်ဆိၣ် ကျဲဒီတကျိၤ ခးလီၤ၀ဲဒီးကျိဖးဒိၣ်တဖၣ်အဃိ တၫ်ဘၣ်ကးတံာ်ကွံာ်၀ဲကျဲအဂ့ၫ် တၫ်ဘိးဘၣ်ရၤလီၤအပူၤ ပာ်ဖျါ၀ဲလီၤ.
သုးဟံးန့ၫ်ထံကီၫ်တၫ်စိတၫ်ကမီၤအံၤ ဒ်သိးကထီၣ်ဒုးမၤန့ၫ်ကဒါက့ၤ တၫ်လီၫ်လၢတၫ်ပၢၫ်ဆၢသုးဖိထီၣ်ဒုးမၤန့ၫ်ဃာ်၀ဲ တဖၣ်အဂီၫ် မၤဆူၣ်ထီၣ်၀ဲ ဟီၣ်ခိၣ်လိၤတၫ်ထီၣ်ဒုးဃီၤလၢသုးကျိၤတဖၣ်ဒီးခးလီၤကျိဖးဒိၣ်,ဒုးဃီၤတၫ်ဒီးကလံၤကျါ လၢထံကီၫ်တၫ်လီၫ်သကုၤအပူၤဒီးကမျၢၫ်တၫ်ဘၣ်ဒိဘၣ်ထံးစ့ၫ်ကီး အိၣ်ထီၣ်၀ဲန့ၣ်လီၤ.
