လါအီကူၥ်(၆)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
အံၣ်စရ့ကိတိၥ်ခိၣ်ကျၢၢ် ဘဲးကၠမ့ၣ်န့ၣ်တၣ်ယၣ်ဟူး ထံၣ်လိၥ်သးဒီးတၢ်ဘံၣ်တၢ်ဘၢကဲးဘံနဲးကရၢအဆၢကတီၢ်ခါ တၢ်ကတီၣ်ဆှၢနုၥ်၀ဲ ဘၣ်ဃးတၢ်ပၢဆှၢကၣ်စၣ်အလၢအပှဲၤကန့ၢ်အဂီၢ်အိၣ်၀ဲအဂ့ၢ် အံၣ်စရ့မံၣ်ဒံၣ်ယၣ်တဖၣ် ကွဲးဖျါဃၥ်၀ဲန့ၣ်လီၤ.
အံၣ်စရ့ပဒိၣ်ပတီၢ်ထီလီၢ်လၤအိၣ်တဂၤ အတၢ်ကတိၤလၢ “ပဆၢတဲၥ်လီၤ၀ံၤလံ. ပကလဲၤလၢ တၢ်ပၢဆှၢကၣ်စၣ်ကါမၠီၣ်လၢလၢပှဲၤပှဲၤ၀ံၤ ကဒုးမၤနၢၤကွံၥ်ဟါမး”အဖီခိၣ် အံၣ်စရ့တၢ်ကစီၣ်သန့တဖၣ် ဒိးသန့ၤကွဲး၀ဲဒီး ပၥ်ဖျါဃၥ်၀ဲန့ၣ်လီၤ.
ဘၣ်ထွဲဒီး သုးမုၢ်ဒိၣ်ခိၣ်နၢ်ဒီးသုးဂ့ၢ်၀ီခိၣ်နၢ်တဖၣ် ထီဒါ၀ဲတၢ်ရဲၣ်တၢ်ကျဲၤအံၤ တၢ်ကစီၣ်တဖၣ်အဖီခိၣ်” တၢ်အံၤ မ့ၢ်တဘၣ်လီၢ်ဘၣ်ဆးလၢ သုးရိၣ်မဲခိၣ်ကျၢၢ်အဂီၢ်ဘၣ်န့ၣ် ကြၢးလၢကဘၣ်ဟးထီၣ်လၢ အမူဒါလီၢ်လၤ”အဂ့ၢ် အံၣ်စရ့ပဒိၣ်လီၢ်လၤအိၣ်တဂၤ စံးကဒီး၀ဲန့ၣ်လီၤ.
ပှၤဘၣ်ဖီၣ်ကမဲအဟံၣ်ဖိဃီဖိတဖၣ်တခီ တၢ်ရဲၣ်တၢ်ကျဲၤတဖၣ်အံၤ တၢ်လီၤဘၣ်ယိၣ်အိၣ်ထီၣ်သ့လၢ ပှၤဘၣ်ဖီၣ်ကမဲတဖၣ်အဂီၢ်အဃိ ဘၣ်ယိၣ်ဘၣ်ဘှီတၢ်န့ၣ်လီၤ.
ကၣ်စၣ်ဟီၣ်က၀ီၤအပူၤ ပှၤဘၣ်ဖီၣ်ကမဲဖိအိၣ်တ့ၢ်၅၀ဂၤအကျါ ပှၤ၂၀ဂၤတခီ တၢ်နၥ်အီၤသ့ဒ်အသးသမူအိၣ်ဒံး၀ံၤ တၢ်ကွၢ်ထံဆိကမိၣ်(Servey)တဖၣ်အဖီခိၣ် ပှၤအံၣ်စရ့ဖိ ၄ပူ၁ပူန့ၣ် ဒ်သိးပှၤဘၣ်ဖီၣ်ကမဲဖိတဖၣ်ကပူၤဖျဲးထီၣ်အဂီၢ် အဲၣ်ဒိးလၢတၢ်ကပတုၥ်တၢ်ခးန့ၣ်လီၤ.
အံၣ်စရ့ အသိၣ်မှံတဖၣ်စ့ၢ်ကီး ဟ့ၣ်သဆၣ်ထီၣ်ဃၥ်၀ဲ တၢ်ဒုးကကတၢၢ်ကွံၥ်ဒီး တၢ်ကဘှါရှဲပှၤဟီၣ်ခိၣ်ဖိတၢ်ဒိသူၣ်ဒိသးတၢ်ဃံးတၢ်စ့ၢ်အဂီၢ်အဃိ ဘၣ်ထွဲဒီးဒုးယၤရဲၣ်ကျဲလၢကမၤအံၤအဖီခိၣ် တၢ်ပဲၥ်အၢပဲၥ်သီတဖၣ်စ့ၢ်ကီး အိၣ်ထီၣ်သ့န့ၣ်လီၤ.
ကၣ်စၣ်တၢ်ဒုးအံၤကပတုၥ်ကွံၥ်အဂီၢ်အံၣ်စရ့ဘံၣ်ဘၢသုးလီၢ်လၤအိၣ်လၢအိၣ်ဘှံးလၢမူဒါတဖၣ်ဒီးပ့ၢ်ဆှါအ့ၣ်ကၠံၣ်စံၣ်ခိၣ်နၢ်လီၢ်လံၤတဖၣ်ပၣ်ဃုၥ်ကရၢတကရၢအံၤ ကဆဲးလီၤ၀ဲမံၤဆဲးပနီၣ်၀ံၤ ကဆှၢ၀ဲလံၥ်ပတံထီၣ်တဘ့ၣ်ဆူ အမဲရကၤကီၢ်ခိၣ်ဒီၣ်နၢၤထရၢးအအိၣ် လၢဒ်သိးကဟ့ၣ်တၢ်ဆီၣ်သနံး န့ၣ်တၣ်ယၣ်ဟူးအဂီၢ်န့ၣ်လီၤ.
တၢ်မ့ၢ်ကွၢ်လၢသုးဂ့ၢ်၀ီတကပၤန့ၣ်တၢ်မၤဟးဂီၤကွံၥ်တ့ၢ်လံဟါမးကရၢလံအဂ့ၢ်ဒီးဒ်သိးကမၤနၢၤသနူလၢဟါမးနၥ်၀ဲအဂီၢ်တခီကျိၤကျဲတဘိလၢအမ့ၢ်တၢ်ကပၥ်ဖျါထီၣ်ခါဆူညါလၢအဂ့ၤကတၢၢ်တခါအဂ့ၢ်”ကီၢ်ပူၤပ့ၢ်ဆှၢအ့ၣ်ကၠ့ၣ်စံၣ်ခိၣ်နၢ်လီၢ်လံၤ Ami Ayalonလၢ ဆဲးလီၤ၀ဲမံၤဆဲးပနီၣ်တဂၤ စံး၀ဲန့ၣ်လီၤ.
တၢ်မ့ၢ်မၤကဒီး သုးဂ့ၢ်၀ီတဖၣ်ဆူညါန့ၣ် ကမ့ၢ်ဒၣ်တၢ်အခီလီလီၤအဂ့ၢ် အ၀ဲစံးအါထီၣ်၀ဲန့ၣ်လီၤ.
အံၣ်စရ့ၣ်သုးမုၢ်ဒိၣ်ပၢဆှၢဃၥ်၀ဲကၣ်စၣ်ဟီၣ်က၀ီၤ၇၅မျးကယၤလံ၀ံၤအခဲအံၤန့ၣ်တၣ်ယၣ်ဟူးအတၢ်ရဲၣ်တၢ်ကျဲၤအဖီခိၣ် ကဘၣ်နုၥ်လီၤဒုး၀ဲ လီၢ်က၀ီၤဒီတဘ့ၣ်လၢ ပှၤပၣ်လဲးစတဲဖိ(၂)ကကွဲၢ်ဘျဲၣ်အိၣ်အလီၢ်န့ၣ်လီၤ.
Ref: THN
