လါအီကူၥ်(၆)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤသုးကရူၢ်အံၤ ခီဖျိပညိၣ်ဒုးကမျၢၢ်လိၤလိၤလၢခးကျိဖးဒိၣ်,မၤကလံၤကျါတၢ်ဒုးခးလီၤတၢ်တဖၣ်အဃိ စကဲကီၢ်ခီ, မါတလ့ကီၢ်ခီ, ယိၤဒိၣ်ကီၢ်စဲၣ်ဒီး ရၢၢ်ခၢၣ်ကီၢ်စဲၣ်တဖၣ်အပူၤ သီခါ၁ဂၤပၣ်ဃုၥ် ကမျၢၢ်ဖိဘၣ်သံ၀ဲ(၃၅)ဂၤဘျဲၣ်အဂ့ၢ် တၢ်မၤစၢၤထံရူၢ်ကီၢ်သဲးပှၤလီၤဃိၥ်ဖိကရၢ(AAPP)ပၥ်ဖျါဃၥ်၀ဲန့ၣ်လီၤ.
ဖဲလါယူၤလံ ၂၉သီအနံၤ, သုးခီၣ်မရှ့ၣ်အသုး ခးလီၤကျိဖးဒိၣ်, လဲၤဒုးခးလီၤတၢ်လၢကလံၤကျါ ဖဲစကဲကီၢ်ခီ, ခၠီအူကီၢ်ဆၣ်ဒီးကးဘလူၢ်ကီၢ်ဆၣ်, သ၀ီတဖၣ်အပူၤအဃိ လီၢ်က၀ီၤကမျၢၢ်(၁၀)ဂၤဃၣ်ဃၣ်ဘၣ်သံ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး ဖဲလါယူၤလံ(၃၀)သီအနံၤ, သုးကရူၢ်အကဘီယူၤဒုးသုး လဲၤတ့ၢ်လီၤမ့ၣ်ပိၢ် ဖဲယိၤဒိၣ်ကီၢ်စဲၣ်, ကိးခဲၣ်၀့ၢ်ပူၤအဃိ ဖိသၣ်၁ဂၤပၣ်ဃုၥ် ကမျၢၢ်(၆)ဂၤဘၣ်သံ၀ဲ တကးဘၣ် ခးလီၤစ့ၢ်ကီး ကျိဖးဒိၣ် ဆူကၠီးမဲကီၢ်ဆၣ်, နီၢ်ပ့ၣ်သ၀ီပူၤအဃိ သီခါ၁ဂၤဘၣ်သံ၀ဲန့ၣ်လီၤ.
တနံၤဃီအဆၢကတီၢ် သုးခီၣ်မရှ့ၣ်အသုး လဲၤတ့ၢ်လီၤကဒီးမ့ၣ်ပိၢ်ဆူ ရၢၢ်ခၢၣ်ကီၢ်စဲၣ်, ကၠီးဖၠူၣ်ကီၢ်ဆၣ်, သဲးတွဲးတ့ၣ်သ၀ီသီခါဖၠၣ်ပူၤအဃိ တၢ်သူၣ်ထီၣ်၁ဖျၢၣ် ဘၣ်ဟးဂီၤကွံၥ်၀ဲအဂ့ၢ် (AAPP)အတၢ်ပၥ်ဖျါအဖီခိၣ် တၢ်သ့ၣ်ညါဘၣ်န့ၣ်လီၤ.
တကးဘၣ် ဖဲလါယူၤလံ၂၉သီအနံၤ သုးကရူၢ်အံၤ မၤ၀ဲကလံၤကျါတၢ်ဒုးခးလီၤတၢ်တဖၣ် ဖဲမါတလ့ကီၢ်ခီ, မိကိး၀့ၢ်ပူၤတပယူၥ်ဃီအဃိ ကမျၢၢ်(၆)ဂၤဘၣ်သံ၀ဲအသိး လါအီကူၥ်(၂)သီအနံၤစ့ၢ်ကီး လဲၤတ့ၢ်လီၤကဒီးဖဲ မ့ၣ်ပိၢ်အဃိ ကမျၢၢ်တဒၢစ့ၣ်ဘျဲၣ်ဘၣ်သံ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
စးထီၣ်လၢ အပူၤကွံၥ် ၂၀၂၁နံၣ်, လါဖ့ၤဘြူၤအါရံၤ(၁)သီ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤဒီးတုၤလၢ၂၀၂၅နံၣ်, လါအီကူၥ်(၄)သီအတီၢ်ပူၤခီဖျိသုးကရူၢ်အံၤဒီးအပှၤမၤသကိးတၢ်တဖၣ်အဃိပှၤဟူးဂဲၤလၢဒံၣ်မိၣ်ကရ့ၣ်စံၣ်ဂ့ၢ်၀ီဒီးထံဖိကီၢ်ဖိကမျၢၢ် ခဲလၢပၥ်ဖှိၣ်(၇၀၃၀)ဘျဲၣ် ဘၣ်သံ၀ဲဒီး ပှၤ(၂၉၄၉၂)ဂၤဘျဲၣ် ဘၣ်တၢ်ဖီၣ်န့ၢ်ဆူၣ်အီၤန့ၣ်လီၤ.
ပှၤလၢဘၣ်တၢ်ဖီၣ်န့ၢ်ဆူၣ်အီၤတဖၣ်အကျါ ပှၤ(၂၂၂၅၇)ဂၤန့ၣ် ဘၣ်တၢ်ဖီၣ်ဃၥ်အီၤအဖၢမုၢ်လီၤဒီးမ့မ့ၢ်(၁၀၉၄၃)ဂၤတခီ ဘၣ်တၢ်စံၣ်ညီၣ်ပၥ်လီၤဃိၥ်ပူၤန့ၣ်လီၤ.
တၢ်နီၣ်ဂံၢ်နီၣ်ဒွးလၢတၢ်ပၥ်ဖျါတ့ၢ်လၢထးတဖၣ်အံၤ မ့ၢ်ဒၣ်(AAPP)အတၢ်မၤနီၣ်စရီအဖီခိၣ် အနီၣ်ဂံၢ်နီၣ်ဒွးလီၤဒီး မ့မ့ၢ်လၢဟီၣ်ခိၣ်မဲၥ်ဖံးခိၣ်တခီ ကအိၣ်အါန့ၢ်ဒံးအလီၢ်အဂ့ၢ် တၢ်မၤစၢၤထံရူၢ်ကီၢ်သဲးပှၤလီၤဃိၥ်ဖိကရၢ(AAPP)စံး၀ဲန့ၣ်လီၤ.
