ကၠီၣ်တဲၣ်-ပယီၤကီၢ်ဆၢ ဘၣ်ကီဘၣ်ခဲဒဲက၀ီၤတဖၣ်အပူၤ တၢ်ကပတုၥ်ကွံၥ်တၢ်ဆီၣ်ထွဲတၢ်အီၣ်ကးအဂ့ၢ် ထံၣ်ဘံၣ်စံၣ်ဒုးသ့ၣ်ညါ

လါယူၤလံ(၃)သီ, ၂၀၂၅နံၣ်

ကၠီၣ်တဲၣ်-ကညီကီၢ်ဆၢအပူၤအိၣ် ကညီပှၤဘၣ်ကီဘၣ်ခဲဒဲက၀ီၤတဖၣ်အပူၤ စးထီၣ်ဖဲ ၂၀၂၅နံၣ်, လါအီကူၥ်န့ၣ် တၢ်ဟ့ၣ်တၢ်အီၣ်တၢ်မၤစၢၤတဖၣ် တၢ်ကပတုၥ်ကွံၥ်ဃၥ်အီၤအဂ့ၢ်န့ၣ် ထံၣ်ဘံၣ်စံၣ်ဒုးသ့ၣ်ညါဃၥ်၀ဲဆူ ဒဲက၀ဲၤကမံးတံၥ်ဒီး ပှၤဒဲက၀ီၤဖိခဲလၢၥ်အအိၣ် ဖဲလါယူၤ(၂၇)သီအနံၤန့ၣ်လီၤ.

ဘၣ်ဆၣ်ဒီး ဟံၣ်ဒူၣ်လၢအလိၣ်ဘၣ်တၢ်မၤစၢၤလီၤဆီဒိၣ်(MV)ဒီးဟံၣ်ဒူၣ်လၢလိၣ်ဘၣ်တၢ်မၤစၢၤ(V)သ့ၣ်တဖၣ်တခီ ကဆဲးဒိးန့ၢ်ဒံး တၢ်မၤစၢၤဒ်တၢ်ပၥ်ပနီၣ်အသိးအဂ့ၢ် ဒုးသ့ၣ်ညါဃၥ်၀ဲန့ၣ်လီၤ.

တၢ်မၤစၢၤတဖၣ်အံၤကဆီတလဲက့ၤအသးဆူတၢ်နီၤလီၤတၢ်ဖိတၢ်လံၤလၢအမ့ၢ်တၢ်နီၤလီၤတလါတဘျီလၢအမ့ၢ်တၢ်အီၣ်ဃ့လၢဘုဖီပူၤလၢ ကဘၣ်သူ၀ဲဒၣ်တၢ်အီၣ်လဲးမးဒီး တၢ်ဆီတလဲအံၤမ့ၢ်ဒၣ်ကျဲတဘိလၢ တၢ်လိၣ်အဖီခိၣ် ဒ်သိးကရဲၣ်ကျဲၤဘၣ်က့ၤပတၢ်အိၣ်ယၢၤသ့ၣ်တဖၣ်အတၢ်မၤစၢၤလၢကလဲၤက့ၤလိၤလိၤဆူပှၤလၢလိၣ်ဘၣ်တၢ်မၤစၢၤနီၢ်နီၢ်အအိၣ်အဂ့ၢ် ထံၣ်ဘံၣ်စံၣ် စံး၀ဲန့ၣ်လီၤ.

မ့မ့ၢ်လၢပှၤပတီၢ်မုၢ်ဟံၣ်ဖိဃီဖိသ့ၣ်တဖၣ်တခီတဒိးန့ၢ်လၢၤတၢ်အီၣ်တၢ်မၤစၢၤတဖၣ်စးထီၣ်ဖဲလါအီကူၥ်န့ၣ်ဘၣ်.လၢတၢ်န့ၣ်အဃိ တၢ်အီၣ်ကးတၢ်ထၢနုၥ်စ့န့ၣ် အလီၢ်ခံကတၢၢ်ကအိၣ်တုၤလၢ လါယူၤလံ(၃၁)သီအနံၤန့ၣ်လီၤ. တၢ်ဂ့ၢ်အံၤအဖီခိၣ် ဒဲက၀ီၤကမျၢၢ်တဂၤလၢ်လၢ် တၢ်ကဘၣ်သူလၢၥ်ကွံၥ်စ့ခဲလၢၥ်လၢအိၣ်လၢ တၢ်အီၣ်ကးအပူၤအဂ့ၢ် ထံၣ်ဘံၣ်စံၣ် ဒုးသ့ၣ်ညါဃၥ်၀ဲန့ၣ်လီၤ.

လၢန့ၣ်အမဲၥ်ညါ မ့မ့ၢ်လၢတၢ်နီၤလီၤသွၣ်တခီ တၢ်ကဆဲးဟ့ၣ်ဒံး၀ဲလၢ (MV), (V)ဃုၥ်ဒီး ပှၤပတီၢ်မုၢ်ဟံၣ်သ့ၣ်တဖၣ်ဘၣ်ဆၣ် တၢ်မၤစၢၤအနီၢ်ဂံၢ်တဖၣ် ကလီၤစှၤ၀ဲတဆံးတက့ၢ်န့ၣ်လီၤ. ဘၣ်ဆၣ်တၢ်မၤစၢၤအနီၢ်ဂံၢ်နီၣ်ဒွးအလၢအပှဲၤတခီကပၥ်ဖျါထီၣ်အီၤလၢလံၥ်ဘိးဘၣ်ရၤလီၤဆူအမဲၥ်ညါတဘ့ၣ်အပူၤအဂ့ၢ် ထံၣ်ဘံၣ်စံၣ်စံး၀ဲန့ၣ်လီၤ.

တၢ်မၤစၢၤတၢ်အိၣ်သးတဖၣ် ဆီတလဲအသးဘၣ်ဆၣ် ဒဲက၀ီၤဟံၣ်ဖိဃီဖိတဖၣ် အတၢ်အီၣ်လဲးမးဒီးတၢ်အီၣ်ကးသ့ၣ်တဖၣ်တခီ တၢ်ကပၥ်ဃၥ်အီၤဂ့ၤဂ့ၤခီဖျိလၢ တၢ်လိၣ်အီၤဒံးအဃိအဂ့ၢ် ဒုးသ့ၣ်ညါဃၥ်၀ဲန့ၣ်လီၤ.

တၢ်အီၣ်တၢ်မၤစၢၤတၢ်အိၣ်သးတဖၣ် ဆီတလဲအသးအဖီခိၣ် ထံၣ်ဘံၣ်စံၣ်ဃ့၀ံၤသးစူၤဃၥ်ဆူ ဒဲက၀ီၤကမျၢၢ်ဖိတဖၣ်အအိၣ်အသိးအၢၣ်လီၤဃၥ်၀ဲစ့ၢ်ကီးလၢကကျဲးစၢးဃုတၢ်မၤစၢၤအဂုၥ်အဂၤသ့ၣ်တဖၣ်သပှၢ်ပှၢ်ဒီးကဒုးသ့ၣ်ညါက့ၤ၀ဲတၢ်အိၣ်သးလၢအိၣ်ထီၣ်တဆီဘၣ်တဆီအဂ့ၢ် စံး၀ဲန့ၣ်လီၤ.

လၢန့ၣ်အမဲၥ်ညါ ထံၣ်ဘံၣ်စံၣ်တခီ ဂုၥ်ကျဲးစၢးနီၢ်နီၢ်လၢတၢ်မၤသကိးတၢ်ဒီးကၠီၣ်တဲၣ်ပှၤဘၣ်မူဘၣ်ဒါသ့ၣ်တဖၣ် ဒ်သိးကဒုးအိၣ်ထီၣ်တၢ်ဖံးတၢ်မၤအတၢ်ခွဲးတၢ်ယၥ်လၢအဆိအချ့ဒ်သိးကမၤစၢၤတၢ်ကွၢ်ထွဲလီၤနီၢ်ကစၢ်သးကအါထီၣ်အဂီၢ်လၢ ဒဲက၀ီၤဖိအဂီၢ်အဂ့ၢ် ပၥ်ဖျါဃၥ်၀ဲ အလံၥ်ဘိးဘၣ်ရၤလီၤအပူၤန့ၣ်လီၤ.

ကၠီၣ်တဲၣ်-ကညီကီၢ်ဆၢဒီတကျိၤအပူၤ ဘၣ်ကီဘၣ်ခဲဒဲက၀ီၤတဖၣ်ဒ်အမ့ၢ် မဲၢ်လး, အိပၠၣ်,နိးဖိ, မဲၢ်ရမိၢ်, မဲၢ်လအူ, ဘးဒိၣ်ယါ,ထါမဟ့ဒီးနီၣ်ဂံၢ်(၁)ဒီး(၂)ကရ့ၣ်နံၣ်ဘၣ်ကီဘၣ်ခဲဒဲက၀ီၤတဖၣ်ပၣ်ဃုၥ်ကီၢ်ပယီၤဘၣ်ကီဘၣ်ခဲဒဲက၀ီၤအိၣ်၀ဲ(၉)ဖျၢၣ်ဒီး ပှၤနီၣ်ဂံၢ်အိၣ်၀ဲ(၁)ကလီၢ်ဃၣ်ဃၣ်အဂ့ၢ် တၢ်သ့ၣ်ညါဘၣ်လၢ ထံၣ်ဘံၣ်စံၣ်စရီတဖၣ်အဖီခိၣ်န့ၣ်လီၤ.