လါယူၤ(၂၆)သီ,၂၀၂၅နံၣ်
စးထီၣ်လၢသုးဟံးန့ၫ်ဆူၣ်ထံကီၫ်တၫ်စိတၫ်ကမီၤ ၂၀၂၁နံၣ်,လါဖ့ၤဘြူၤအါရံၤ(၁)သီနံၤတုၤ ၂၀၂၅န့ၣ်,လါအ့ဖြ့ၣ်(၃၀) သီနံၤ, (၄)နံၣ်ဘျဲၣ်အတီၫ်ပူၤ သုးကီၣ်ကးသုးအဃိ ဖိသၣ်(၁၁၀၁)ဂၤဘၣ်သံဒီးလၢအကျါ စကဲကီၫ်ခီန့ၣ် ပှၤဘၣ်သံအအါကတၢၫ်အဂ့ၫ် ဒီကလုာ်ဃူဖိးပဒိၣ်,ပိာ်မုၣ်,သးစၫ်ဒီးဖိသၣ်ဂ့ၫ်၀ီ ကိတိာ်၀ဲၤကျိၤအတၫ်ထုးထီၣ်ဘိးဘၣ်ရၤလီၤအဖီခိၣ် တၫ်သ့ၣ်ညါဘၣ်လီၤ.
သုးကီၣ်ကးအဃိ စးထီၣ်လၢ၂၀၂၁နံၣ်,လါဖ့ၤဘြူၤအါရံၤ(၁)သီနံၤတုၤ၂၀၂၅နံၣ်, လါအ့ဖြ့ၣ်(၃၀)သီနံၤ,(၄)နံၣ်ဘျဲၣ် အ တီၫ်ပူၤ ကမျၢၫ်(၉၄၈၇)ဘၣ်သံဒီးလၢအကျါ ဖိသၣ်ဆံးပာ်ဃုာ်(၁၁၀၁)ဂၤအဂ့ၫ် ကိတိာ်၀ဲၤကျိၤ ထုးထီၣ်ဘိးဘၣ်ရၤလီၤ ဃာ်၀ဲလီၤ.
တၫ်န့ၣ်အဃိ (၄)နံၣ်ဘျဲၣ်အတီၫ်ပူၤ ပှၤသံ (၉၄၈၇)ဂၤန့ၣ် တၫ်ထံၣ်ဘၣ်လၢဖိသၣ်အတၫ်သံတၫ်ပှၫ်အိၣ်ထီၣ်၀ဲ ၁၁.၆ မျးကယၤန့ၣ်လီၤ.
ဖိသၣ်တၫ်သံတၫ်ပှၫ် တၫ်မ့ၫ်ကွၫ်၀ဲလၢတနံၣ်စုာ်စုာ်န့ၣ် ၂၀၂၁နံၣ်အပူၤန့ၣ် ၉၅ဂၤ,၂၀၂၂နံၣ်အပူၤန့ၣ် ၁၁၇ဂၤ,၂၀၂၃နံၣ် အပူၤ ၃၅၅ဂၤ,၂၀၂၄နံၣ်အပူၤ ၃၅၇ဂၤဒီး၂၀၂၅နံၣ်,(၄)လါအတီၫ်ပူၤန့ၣ် ၁၁၇ဂၤ ဘၣ်သံ၀ဲအဂ့ၫ် တၫ်သ့ၣ်ညါဘၣ်လီၤ.
မ့ၫ်ကွၫ်လၢကီၫ်ခီဒီးကီၫ်စဲၣ်တဘ့ၣ်စုာ်စုာ်အပူၤန့ၣ် စကဲကီၫ်ခီန့ၣ်ပှၤဘၣ်သံအါကတၢၫ်၀ံၤ ခံတီၤတတီၤန့ၣ်မ့ၫ်ယိၤဒိၣ် ကီၫ်စဲၣ်,သၢတီၤတတီၤန့ၣ် မ့ၫ်ရၢၫ်ခၢၣ်ကီၫ်စဲၣ်ဒီးလွံၫ်တီၤတတီၤန့ၣ် မ့ၫ်မါတလ့ကီၫ်ခီအဂ့ၫ် တၫ်ထံၣ်ဘၣ်၀ဲလီၤ.
ဖိသၣ်တၫ်သံတၫ်ပှၫ်အနီၫ်ဂံၫ်နီၫ်ဒွး(၁၁၀၁)ဂၤအကျါ ပိာ်ခွါတၫ်သံတၫ်ပှၫ်န့ၣ် အိၣ်၀ဲ ၅၅.၂မျးကယၤ,ပိာ်မုၣ် တၫ်သံတၫ် ပှၫ် ၃၃မျးကယၤဒီးတၫ်သံတၫ်ပှၫ်လၢတၫ်ပာ်ဖျါထီၣ်မုၣ်ခွါတသ့ဘၣ် အိၣ်၀ဲ ၁၁.၈မျးကယၤအဂ့ၫ် ကိတိာ်၀ဲၤကျိၤ စရီ တဖၣ်အဖီခိၣ် တၫ်သ့ၣ်ညါဘၣ်လီၤ.
