လါမ့ၤ(၈)သီ,၂၀၂၅နံၣ်
ကၠီၣ်တဲၣ်ကညီဒီးကရ့ၣ်နံၣ်ကီၢ်ဆၢဒီတကျိၤအိၣ်ကညီဘၣ်ကီဘၣ်ခဲဒဲက၀ီၤတဖၣ်အပူၤတၢ်မၤစှၤလီၤကွံၥ်တၢ်အီၣ်တၢ်အီတၢ်မၤစၢၤတဖၣ်အဃိ ပှၤဘၣ်ကီဘၣ်ခဲဖိ(၁)ကလီၢ်ဘျဲၣ် ဘၣ်ကွၢ်ဆၢၣ်မဲၥ်ဘၣ်ဒီး တၢ်သၣ်၀ံၤလီၤဒိအဂ့ၢ် ဒီး အမဲရကၤပၣ်ဃုၥ်ဟီၣ်ခိၣ်ထံကီၢ်တဖၣ်ဒ်သိးကဘှါရှဲန့ၢ်ပှၤဘၣ်ကီဘၣ်ခဲဖိတၢ်သၣ်၀ံၤလီၤဒိတၢ်ဂ့ၢ်ကီအံၤတဘျီဃီအဂီၢ် ဟီၣ်ခိၣ်ဒီဘ့ၣ်ကညီပှၤတ၀ၢတၢ်ကရၢကရိတဖၣ် ဃ့ထီၣ်၀ဲန့ၣ်လီၤ.
ကီၢ်ဆၢဒဲက၀ီၤတဖၣ်အပူၤ ကညီဒီးကရ့ၣ်နံၣ်ပှၤဘၣ်ကီဘၣ်ခဲဖိ (၁)ကလီၢ်ဘျဲၣ်(၁၀,၈၀၀၀)အံၤ ကတီၢ်ခဲအံၤန့ၣ် တၢ်အီၣ်တၢ်အီလီၤစှၤကွံၥ်၀ဲ၀ံၤဘၣ်ကွၢ်ဆၢၣ်မဲၥ်ဘၣ်ဒီးပှၤဟီၣ်ခိၣ်ဖိတၢ်ဒိသူၣ်ဒိသးတၢ်မၤစၢၤတၢ်ဃံးတၢ်စ့ၢ်တဖၣ်အဂ့ၢ် စံး၀ဲန့ၣ်လီၤ.
သးနံၣ်(၅)နံၣ်ဆူအဖီလၥ်ဖိသၣ်တဖၣ် တၢ်အီၣ်အဂီၢ် တလါဒိးန့ၢ်၀ဲ အမဲရကၤဒီလၣ်(၁.၅)ဒီလၣ်, (ကၠီၣ်တဲၣ် ၅၃ဘး), သးနံၣ်(၅)နံၣ်ဆူအဖီခိၣ်တဖၣ် တၢ်အီၣ်အဂီၢ် ဒိးန့ၢ်၀ဲ ဒီလၣ်(၂.၄)ဒီလၣ်(ကၠီၣ်တဲၣ် ၈၇ဘး)အဂ့ၢ် ပၥ်ဖျါဃၥ်၀ဲန့ၣ်လီၤ.
တချူးလၢတၢ်မၤစှၤလီၤကွံၥ် လၢအပူၤကွံၥ်လံၤလံၤန့ၣ် ပှၤဘၣ်ကီဘၣ်ခဲဖိတဖၣ်န့ၢ်ဘၣ်၀ဲတၢ်အီၣ်လၢ စှၤန့ၢ်ဒံး ကြၢးဒိးန့ၢ်ဘၣ်၀ဲအဂ့ၢ် စံး၀ဲန့ၣ်လီၤ.
ဖဲအပူၤကွံၥ် (၁၅)နံၣ်အတီၢ်ပူၤလံၤလံၤန့ၣ် ကၠီၣ်တဲၣ်ပဒိၣ်တဖၣ်ဒီၣ်တဲၥ်ကွံၥ် ပှၤဘၣ်ကီဘၣ်ခဲဖိစ့ပၥ်ကီၤတဖၣ် မ့တမ့ၢ် တၢ်မၤစှၤလီၤကွံၥ်၀ဲအဃိ တၢ်ဘၣ်ဟံးန့ၢ်၀ဲတၢ်ဆီၣ်ထွဲမၤစၢၤလၢUSAIDပၣ်ဃုၥ်ဟီၣ်ခိၣ်ထံကီၢ်တဖၣ်ဘၣ်ဆၣ် ခီဖျိလၢတၢ်ဒီၣ်တဲၥ်ကွံၥ်အဃိ ကညီကီၢ်စဲၣ်ဒီးဟီၣ်က၀ီၤတဖၣ်အပူၤ ပှၤဘၣ်ကီဘၣ်ခဲဖိ(၁)ကလီၢ်ဘျဲၣ်ပၣ်ဃုၥ် ကီၢ်ပယီၤထံလီၢ်ကီၢ်ပူၤပှၤလီၢ်အိၣ်ကမှံဖိတဖၣ် လိၣ်ဘၣ်၀ဲတၢ်ဆီၣ်ထွဲမၤစၢၤတဖၣ်အဂ့ၢ် ပၥ်ဖျါဃၥ်၀ဲန့ၣ်လီၤ.
အမဲရကၤဒီးထံကီၢ်ဟီၣ်ခိၣ်တဖၣ်တခီဒ်သိးတၢ်ကထုးသံကွံၥ်တၢ်ဒီၣ်တဲၥ်ကွံၥ်တၢ်ဆီၣ်ထွဲမၤစၢၤလၢပှၤဘၣ်ကီဘၣ်ခဲဖိအဂီၢ်, ပှၤဘၣ်ကီဘၣ်ခဲဖိဒီး IDPတဖၣ် တၢ်ကဆီၣ်ထွဲမၤစၢၤအါထီၣ်အဂီၢ်, ကၠီၣ်တဲၣ်ပဒိၣ်တခီ ဒ်သိးတၢ်ကဟ့ၣ်တၢ်ပျဲ ပှၤဘၣ်ကီဘၣ်ခဲဖိတဖၣ်လၢ ကဖံးမၤတၢ်လၢအဖိးသဲစးအဂီၢ် ဒီး တၢ်ကထုးသံကွံၥ် ကီၢ်ဆၢခီဂၥ် တၢ်ဆီၣ်ထွဲမၢၤတဖၣ်အဂီၢ် ဃ့ထီၣ်၀ဲန့ၣ်လီၤ.
ပှၤဘၣ်ကီဘၣ်ခဲဖိဒီးထံလီၢ်ကီၢ်ပူၤပှၤလီၢ်အိၣ်ကမှံဖိတဖၣ်အံၤ ခီဖျိလၢ သုးမီၤစိရိၤသုးကီၣ်ကးအသုး ပညိၣ်လိၤလိၤမၤကလံၤကျါတၢ်ဒုးဒီးခးလီၤကျိဖးဒိၣ်တဖၣ်ဆူ ထံဖိကီၢ်ဖိကမျၢၢ်အိၣ်ဟံၣ်ဒီးတၢ်သိၣ်လိကၠိတဖၣ်, တၢ်ဘူၣ်တၢ်ဘါတၢ်သူၣ်ထီၣ်, တၢ်ဆါဟံၣ်တဖၣ်ဒီးတၢ်သူၣ်တၢ်ဖျးလီၢ်တဖၣ်အဃိ ဘၣ်ဃ့ၢ်ပူၤဖျဲးအသးအဂ့ၢ် ပၥ်ဖျါဃၥ်န့ၣ်လီၤ.
လၢတၢ်န့ၣ်အဃိ ပယီၤသုးမီၤစိရိၤသုးကီၣ်ကးအသုး အတၢ်မၤကမၣ်ကွီၢ်မ့ၣ်တဖၣ်အဃိ ကဘီယူၤသိပၣ်ဃုၥ် ဟီၣ်ခိၣ်ဒီဘ့ၣ်တၢ်ကးတံၥ်ဟံးန့ၢ်ဂ့ၢ်၀ီတဖၣ် တၢ်ကမၤဖျါထီၣ်အမိၢ်လံမိၢ်ပှၢ်အဂီၢ် ဟီၣ်ခိၣ်ဒီဘ့ၣ်ကညီပှၤတ၀ၢတၢ်ကရၢကရိတဖၣ်ဃ့ထီၣ်၀ဲန့ၣ်လီၤ.
