လါမ့ၤ(၈)သီ ၂၀၂၅ နံၣ်
ခ့ၣ်အဲၣ်ယူၣ် – ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤ ဒူသထူၣ်ကီၢ်ရ့ၣ် ကၠဲးထိၣ်ကီၢ်ဆၣ်ဒီးသထူၣ်ကီၢ်ဆၣ်အပူၤ သုးမီၤစိရိၤသုးကီၣ်ကးအသုးတဖၣ် ပၥ်ဝဲတၢ်ခးပနီၣ်လိၤလိၤဆူ ထံဖိကီၢ်ဖိကမျၢၢ်အဖီခိၣ် ခးလီၤကျိဖးဒိၣ်ဒီးဟဲတ့ၢ်လီၤမ့ၣ်ပိၢ်တဖၣ်လၢကဘီယူၤအဃိ လီၢ်က၀ီၤကမျၢၢ်လၢဘၣ်ဃ့ၢ်တၢ်ဒုးအိၣ်၀ဲ(၈)ကထိဘျဲၣ်, တၢ်ဆါဟံၣ်(၁)ဖျၢၣ်,သီခါဖၠၣ်(၂)ဖျၢၣ်ဒီးတၢ်သူၣ်တၢ်ဖျးတၢ်လီၢ်တၢ်ကျဲသ့ၣ်တဖၣ်ဟးဂီၤဝဲအဂ့ၢ် ခ့ၣ်အဲၣ်ယူၣ်- လီၢ်ခၢၣ်သးပၥ်ဖျါဃၥ်၀ဲန့ၣ်လီၤ.
ခ့ၣ်အဲၣ်ယူၣ်-ကၠဲးထိၣ်ကီၢ်ဆၣ်အပူၤ ဖဲ၂၀၂၅နံၣ် လါအ့ဖြ့ၣ်(၂၈)သီ ဂီၤခီ(၁၀း၅၅)နၣ်ရံၣ်အဆၢကတီၢ် သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်ကးအသုးသ့ၣ်တဖၣ် တ့ၢ်လီၤမ့ၣ်ပိၢ်(၃၀၀)(၁)ဖျၢၣ် ဖဲဖွ့လူၢ်ကရူၢ်အပူၤအဃိ ရီဘၢၣ်ကျီးဘၣ်ဟးဂီၤကွံၥ်ဝဲအဂ့ၢ် တၢ်သ့ၣ်ညါဘၣ်န့ၣ်လီၤ.
၂၀၂၅ နံၣ် လါမ့ၤ(၂)သီ ဂီၤ(၉း၀၀)နၣ်ရံၣ်တုၤ ဟါ(၅း၀၀)နၣ်ရံၣ် သုးကီၣ်ကးအသုး ခီၣ်ချ့သုးရ့ၣ်(ခမရ-၂၀၇),အမျိၥ်သုး(အမတ-၃၁၀)သ့ၣ်တဖၣ် ခးလီၤကျိဖးဒိၣ်(၆၀မ ၈၁မမဒီး၁၂၀၀မမ)ခဲလၢၥ်အိၣ်ဝဲ(၁၂)ဖျၢၣ်အဃိ ခယွဲ(ခရွဲ)ကရူၢ် သိခွးယ့ၣ်ကၠီၣ် တမးဒူးတးသီခါဖၠၣ်ဃၢၤဒီးသဝီချၢ တၢ်ဖိတၢ်လံၤဒ်အမ့ၢ် မ့ၣ်အူတၢၣ်၊ ရီဘၢၣ်ထူၣ် သ့ၣ်တဖၣ်ဟးဂီၤဝဲအဂ့ၢ် တၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး တနံၤဃီဖဲ မုၢ်ထူၣ်(၂း၁၁)နၣ်ရံၣ်အဆၢကတီၢ် သုးကီၣ်ကးအသုးကဘီယူၤဒုးသုး ခးလီၤကဒီးပီၣ်(၃၀၀)မ့ၣ်ပိၢ်(၁)ဖျၢၣ် ဖဲဖွ့လူၢ်ကရူၢ်အပူၤအဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲန့ၣ်လီၤ.
လါမ့ၤ(၄)သီ (၁၁း၂၀)မံးနံး ဆၢကတီၢ် သုးကီၣ်ကးအသုး ကဘီယူၤဒုးသုး ဟဲတ့ၢ်လီၤမ့ၣ်ပိၢ်(၂)ဖျၢၣ်လၢ ဖှၣ်ဂီၤတၢ်ဆၣ်ဟံၣ်အဃိ တၢ်ဆၣ်ဟံၣ်လီၤပှီၢ်ဟးဂီၤကွံၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
လါမ့ၤ(၆)သီ ဂီၤ(၈း၁၄)နၣ်ရံၣ်အဆၢကတီၢ် သုးကီၣ်ကးအသုး ကဘီယူၤဒုးသုး တ့ၢ်လီၤမ့ၣ်ပိၢ်ဖဲ အလူကရူၢ် (၁)ဖျၢၣ် အဃိ သၣ်ကပၢၤကျီး ဟးဂီၤကွံၥ်၀ဲ၀ံၤ တကတီၢ်ဃီဖဲ ဂီၤ(၈း၁၈)နၣ်ရံၣ်အဆၢကတီၤ ဟဲတ့ၢ်လီၤမ့ၣ်ပိၢ်(၁)ဖျၢၣ်ဖဲ ငဲးပၠီတီကရူၢ်အပူၤအဃိ လိၣ်ထူၣ်ကျီးဘၣ်ဟးဂီၤကွံၥ်အဂ့ၢ် တၢ်သ့ၣ်ညါဘၣ်န့ၣ်လီၤ.
ခ့ၣ်အဲၣ်ယူ-သထူၣ်ကီၢ်ဆၣ် ဖဲလါမ့ၤ (၄)သီ ဟါ(၁း၁၅)နၣ်ရံၣ်အဆၢကတီၢ် သုးကီၣ်ကးအသုး ကဘီယူၤဒုးသုး တ့ၢ်လီၤမ့ၣ်ပိၢ်(၂)ဖျၢၣ်အဃိ လီၤတဲၥ်ပိၢ်ဖးထီၣ်လၢ စွ့ၣ်ယီၣ်ပၠးကရူၢ်အပူၤအဃိ သီခါဖၠၣ်တၢ်သူၣ်ထီၣ်ဒီး ရီဘၢၣ်ထူၣ် အါန့ၢ်(၅၀)ကၢ်လီၤဝဲန့ၣ်လီၤ.
တနံၤဃီဖဲဟါ(၂း၁၀)နၣ်ရံၣ်အဆၢကတီၢ် သုးကီၣ်ကးအမျိၥ်သုး (အမတ-၃၂၀) ခးလီၤကျိဖးဒိၣ် လီၤတဲၥ်ပိၢ်ဖးဖဲ စွ့ၣ်ယီၣ်ပၠးကရူၢ်အပူၤ အဃိ တီရသီခါဖၠၣ်တၢ်သူၣ်ထီၣ်ဒီး ရီဘၢၣ်ထူၣ် ဟးဂီၤဝဲ တကးဒံးဘၣ် ဟါ (၇း၄၅) မံးနံးဆၢကတီၢ် သုးကီၣ်ကးအသုး သုးခီၣ်ချ့သုးရ့ၣ်( ခမရ-၂၀၆) ဒီး အမျိၥ်သုး(အမတ-၄၀၂) သ့ၣ်တဖၣ် ခးလီၤကျိဖးဒိၣ်(၂)ဖျၢၣ် လီၤတဲၥ်ပိၥ်ဖးဖဲ ကီးလၢၢ်ကရူၢ်အဃိ ထံဖိကီၢ်ဖိကမျၢၢ် တၢ်မၤလီၢ်ဘၣ်ဟးဂီၤကွံၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
