လါမ့ၤ(၇)သီ, ၂၀၂၅နံၣ်
လၢကီၫ်နယူစံၣ်လၣ် သးနံၣ်(၁၆)နံၣ်အဖီလာ်တဖၣ် တၫ်ကတြီဃာ် တၫ်သူဆိၣ်ရှၢၣ်မံၣ်ဒံၣ်ယၣ်အဂီၫ် ရဲၣ်ကျဲၤ၀ဲအဂ့ၫ် ကိတိာ်ခိၣ်ကျၢၫ် ခရံာ်စတိၣ်ဖၢၣ်တဲ၀ဲလီၤ.
လၢဆိၣ်ရှၢၣ်မံၣ်ဒံၣ်ယၣ်တဖၣ်အပူၤ တၫ်ဂ့ၫ်တၫ်ကျိၤလၢလီၤရၢၫ်လီၤစၢၫ်ဒီးကဲထီၣ်တၫ်သးတံာ်တာ်တဖၣ် ဟဲအိၣ်အါ ထီၣ်အဃိ လၢဟီၣ်ခိၣ်ချၢ ဘၣ်ထွဲပတီၫ်ထီ တၫ်ဘံၣ်တၫ်ဘၢဂ့ၫ်၀ီကရၢစ့ၫ်ကီး အိၣ်လဲတၫ်ဘံၣ်တၫ်ဘၢတဖၣ် ကလီၤ တံၫ်အဂီၫ် ဂဲၤလိာ်၀ဲလၢ ကပာ်လီၤတၫ်ဘျၢတဖၣ်အဂီၫ်န့ၣ်လီၤ.
ထံကီၫ်ပူၤ သးနံၣ်(၁၆)နံၣ်အဖီလာ်တဖၣ် တၫ်တဟ့ၣ်တၫ်ပျဲလၢကသူဆိၣ်ရှၢၣ်မ့ၣ်ဒံၣ်ယၣ်အဂီၫ် ကပာ်လီၤတၫ်ဘျၢ ဟ့ၣ်တၫ်ဆီၣ်သနံး ပတီၫ်ထီတၫ်သ့တၫ်ဘၣ်ခီပနံာ်တဖၣ်အဂီၫ် ရဲၣ်ကျဲၤ၀ဲ၀ံၤ ခီပနံာ်လၢတလူၤပိာ်မၤထွဲ၀ဲတဖၣ် ကဃ့ အီၣ်လိး၀ဲစ့ဒီၣ်လၣ်(၁.၂)ကကွဲၫ်တၫ်ရဲၣ်တၫ်ကျဲၤစ့ၫ်ကီး ကိတိာ်ခိၣ်ကျၢၫ်အတၫ်ဆှၢနုာ်တၫ်ဂ့ၫ်အပူၤ ပာ်ဃုာ်၀ဲန့ၣ်လီၤ.
ဆိၣ်ရှၢၣ်မံၣ်ဒံၣ်ယၣ်တဖၣ်န့ၣ် တမ့ၫ်ဂ့ၤခဲလၢာ်ဘၣ်အမဲာ်ညါ ထီဘိတမ့ၫ်တၫ်လီၫ်ပူၤဖျဲးလၢသးစၫ်တဖၣ်အဂီၫ်အဂ့ၫ်, တၫ်ဂ့ၫ်တၫ်ကျိၤလၢအိၣ်ဒီးတၫ်လီၤဘၣ်ယိၣ်တဖၣ်,ဆဲၣ်ဘၣ်တၫ်ဆီၣ်ဘံၣ်ဆီၣ်ဘၢတဖၣ်ဒီးတၫ်ကဒီသဒၢတၫ်မၤအီၣ်တၫ်လၢပှၤဂၤအဖီခိၣ်အဂီၫ် တၫ်ဆၢကတီၫ်တုၤဃီၤလံအဂ့ၫ် ကိတိာ်ခိၣ်ကျၢၫ်တဲ၀ဲလီၤ.
တၫ်ဘျၢဃီၤဃၤအံၤ လၢပၣ်လံၣ်မၣ်အပူၤ ကတၢၫ်ပီၣ်တဲသကိးပာ်ဂၢၫ်ပာ်ကျၢၤ၀ဲ အခါဖဲလဲၣ်ဒု တၫ်တသ့ၣ်ညါဘၣ် လီၤတံၫ်ဒံးဘၣ်ဆၣ် ကဒိးန့ၫ်တၫ်တူၫ်လိာ်ဆီၣ်ထွဲအဂီၫ် မုၫ်လၫ်ဃာ်၀ဲအဂ့ၫ် ကိတိာ်ခိၣ်ကျၢၫ်တဲ၀ဲလီၤ. တၫ်ဂ့ၫ်လၢ ကိတိာ် ခိၣ်ကျၢၫ်ဆှၢနုာ်အံၤ လီၫ်ခၢၣ်သးစုထွဲပၣ်တံၣ် ကွဲးလီၤ၀ဲ၀ံၤ ပာ်လီၤတၫ်ဘျၢကန့ၫ်အဂီၫ် လိၣ်ဘၣ်၀ဲပၣ်တံၣ်(၂)ခါအတၫ် တူၫ်လိာ်ဆီၣ်ထွဲန့ၣ်လီၤ.
နယူစံၣ်လၣ်န့ၣ် မ့ၫ်ထံကီၫ်တဘ့ၣ်လၢ တၫ်သ့လံာ်သ့လဲၫ် လီၤစှၤအဖီခိၣ် ဂဲၤလိာ်၀ဲလၢကမၤထီထီၣ်အပတီၫ်၀ံၤ လၢ တၫ်သိၣ်လိကၠိတဖၣ်အပူၤ ဖဲအပူၤကွံာ်န့ၣ်န့ၣ် တၫ်တြီဃာ်၀ဲတၫ်သူလီတဲစိတဖၣ်န့ၣ်လီၤ.
Ref: CNA
