လါမ့ၤ(၆)သီ,၂၀၂၅နံၣ်
လၢကၣ်စၣ်ကါမၠီၣ်ဟီၣ်က၀ီၤပူၤ အံၣ်စရ့အတၫ်မၤဆူၣ်ထီၣ်ဒုးတၫ်ရဲၣ်တၫ်ကျဲၤတဖၣ် လၢတၫ်ကခီၣ်ဆၢက့ၤ၀ဲအဂီၫ် ကပညိၣ်ဒုး၀ဲ အံၣ်စရ့ကဘီယူၤသန့တဖၣ်၀ံၤကကးတံာ်ကွံာ်၀ဲလၢကလ့ၤကျါတကပၤဒိၣ်ဒိၣ်မုာ်မုာ်အဂ့ၫ် ဟူၣ်သံၣ် ပှၤပူထီၣ်တၫ်ဖိကရၢလၢအိၣ်ဆီလီၤအသးဖဲယံၣ်မ့ၣ် ထုးထီၣ်ဘိးဘၣ်ရၤလီၤ၀ဲလီၤ.
ဖဲလါမ့ၤ(၄)သီအနံၤ ကီၫ်အံၣ်စရ့,ဘၣ်ကူၣ်ရံၣ်ယိၣ်ကဘီယူၤသန့အကပၤ ဒုးခး၀ဲဒီးမျိာ်သၣ်တဖၣ်အဂ့ၫ် ဟူၣ်သံၣ်က ရၢ တဲဃာ်၀ဲ၀ံၤ အံၣ်စရ့ကိတိာ်ခိၣ်ကျၢၫ် န့ၣ်တၣ်ယၣ်ဟူ ဟ့ၣ်ဃာ်တၫ်အၢၣ်လီၤလၢ ကမၤဆၢက့ၤဟူၣ်သံၣ်တဖၣ် န့ၣ် လီၤ.တၫ်ဒုးတဘျီ၀ဲအံၤအပူၤ ပှၤဘၣ်ဒိဘၣ်ထံး၀ဲ(၄)ဂၤလီၤ.
ဟူၣ်သံၣ်ကရၢန့ၣ် ဖဲအပူၤကွံာ်စ့ၫ်ကီး ဒုး၀ဲ ၀့ၫ်ခိၣ်တဲအဘံးလၢဒြိတဖၣ်ဘၣ်ဆၣ် အံၣ်စရ့ ကလံၤကျါတၫ်ဒီသဒၢသနူ တဖၣ် တြီဆၢ၀ဲန့ၫ်န့ၣ်လီၤ.လၢကတီၫ်အံၤတၫ်ဒုးတဘျီအံၤန့ၣ် ဟူၣ်သံၣ်ကရၢပှၤဘၣ်မူဘၣ်ဒါတဲ၀ဲလၢ မ့ၫ်တၫ်ဟ့ၣ်ပ လီၫ်လၢ တၫ်ကပညိၣ်ဒုးဃီၤ၀ဲ အံၣ်စရ့ကဘီယူၤသန့တဖၣ်အဂ့ၫ်န့ၣ်လီၤ.
ဘၣ်ထွဲတၫ်ရဲၣ်တၫ်ကျဲၤလၢ ဟူၣ်သံၣ်ကရၢကမၤ၀ဲတဖၣ်န့ၣ် ဟ့ၣ်ဃာ်အံမ့ဆူ ထံဂုၤကီၫ်ဂၤကလံၤကျါ တၫ်ဆှၢထီၣ် ဆှၢလီၤကရၢ,ဟီၣ်ခိၣ်ဒီဘ့ၣ်ကလံၤကျါတၫ်လဲၤထီၣ်က့ၤလီၤကရၢဒီးဘီမုၫ်စၢဖှိၣ်ကရၢထံဂုၤကီၫ်ဂၤ ၀့ၫ်ပူၤကလံၤကျါ တၫ်ဆှၢထီၣ်ဆှၢလီၤကရၢတဖၣ်အိၣ်အဂ့ၫ် တဲ၀ဲလီၤ.
တၫ်ဘိးဘၣ်ရၤလီၤအံၤ တၫ်ကပာ်သူၣ်ပာ်သးတုၤလီၤတီၤလီၤအဂီၫ် ထံဂုၤကီၫ်ဂၤကလံၤကျါခဲလၢာ် ဟူၣ်သံၣ်ကရၢ တဲဆီၣ်တခူထီၣ်ဃာ်၀ဲ၀ံၤ ကလံၤကျါဒီးပှၤလဲၤထီၣ်က့ၤလီၤဖိတဖၣ် ကပူၤဖျဲးအဂီၫ် ကပတုာ်ကွံာ်တၫ်ယူၤစံၣ်လီၤ ဖဲအံၣ်စရ့ကဘီယူၤသန့အဂ့ၫ် ဟ့ၣ်ပလီၫ်ဃာ်၀ဲန့ၣ်လီၤ.
လၢကတီၫ်အံၤ အံၣ်စရ့န့ၣ် ကမၤဆူၣ်ထီၣ်ဒုးယၤတၫ်ရဲၣ်တၫ်ကျဲၤဖဲကၣ်စၣ်ကါမၠီၣ်ဟီၣ်က၀ီၤအဂီၫ် အံၣ်စရ့ပဒိၣ်တဖၣ် ပာ်ဂၢၫ်ပာ်ကျၢၤ၀ဲ၀ံၤ ဟ့ၣ်တၫ်ဆီၣ်သနံးလၢတၫ်ကပျၫ်ကွံာ် ပှၤလၢဘၣ်တၫ်က့ၤဖီၣ်တဖၣ်န့ၣ်လီၤ.အခဲအံၤ လၢကၣ်စၣ် တၫ်ဟ့ၣ်တၫ်မၤစၢၤတဖၣ် အံၣ်စရ့ ကးတံာ်ကွံာ်၀ဲ ယံာ်ထီၣ်(၂)လါ၀ံၤ ကၣ်စၣ်အပူၤ တၫ်သၣ်၀ံၤလီၤဒိဘူးကအိၣ်ထီၣ် လံအဂ့ၫ် ဘီမုၫ်စၢဖှိၣ်ကရၢဒီးပှၤဟ့ၣ်တၫ်မၤစၢၤကရၢတဖၣ် ဟ့ၣ်ပလီၫ်ဃာ်၀ဲလီၤ.
Ref: CNA
