လါအ့ဖြ့ၣ်(၃၀)သီ,၂၀၂၅နံၣ်
ကီၢ်ပယီၤ-ကီၢ်ကၠီၣ်တဲၣ်ကီၢ်ဆၢ၀့ၢ်တၣ်ခၠံၣ်လ့းဒီး၀့ၢ်မဲၣ်ဆၣ်အဘၢၣ်စၢၤခီဖျိလၢမူခိၣ်စူၤအဃိ၀့ၢ်မဲၣ်ဆၣ် ထံကျိထံဟဲအါထီၣ်ဒီးလီၢ်က၀ီၤကမျၢၢ်ဖိတဖၣ်ဂ့ၢ်ဂီၢ်အူဘၣ်သုးလီၢ်သုးကျဲအဂ့ၢ်တၢ်သ့ၣ်ညါဘၣ်န့ၣ်လီၤ.
မဟါတနံၤဂီၤခီ(၁၁)နၣ်ရံၣ်အဆၢကတီၢ်မူခိၣ်စူၤ၀ံၤအလီၢ်ခံထံလုၢ်ဘၢတၢ်အဃိလီၢ်က၀ီၤကမျၢၢ်ဖိလၢအိၣ်ဆိးဖဲနီၢ်ဂံၢ်(၁)တိၤအကပၤအဘၢၣ်က၀ီၤတဖၣ်ဂ့ၢ်ဂီၢ်အူဘၣ်သုးလီၢ်သုးကျဲအဂ့ၢ်လီၢ်က၀ီၤကမျၢၢ်ဖိတဖၣ်တဲ၀ဲန့ၣ်လီၤ.
မ့ၢ်လၢကစၢၢ်ခိၣ်ထံဟဲက့ၤယွၤလီၤအဃိ၀့ၢ်မဲၣ်ဆၣ်အထံကျိထံဟဲအါထီၣ်န့ၣ်လီၤ.ကျဲမုၢ်ဖီခိၣ်သိလ့ၣ်တဖၣ်စ့ၢ်ကီးဘူးထီၣ်လၢကလီၤဘျၢလံန့ၣ်လီၤ.အခဲအံၤန့ၣ်မူခိၣ်စူၤအိၣ်ပတုၥ်သးလံန့ၣ်လီၤ.မူခိၣ်မ့ၢ်စူၤကဒီးန့ၣ်တၢ်အိၣ်သးတဖၣ်အၢထီၣ်၀ဲဒၣ်သ့န့ၣ်လီၤ.အခဲအံၤန့ၣ်မူခိၣ်စူၤအဆၢကတီၢ်တတုၤဃီၤဒံးဘၣ်.မ့ၢ်တုၤလၢမူခိၣ်စူၤအဆၢကတီၢ်န့ၣ်ကအၢထီၣ်ဒိၣ်န့ၢ်ဒံးအခဲအံၤအဂ့ၢ်လီၢ်က၀ီၤကမျၢၢ်ဖိတဂၤတဲ၀ဲန့ၣ်လီၤ.
အခဲအံၤ၀့ၢ်မဲၣ်ဆၣ်ထံကျိထံအနီၢ်ဂံၢ်ဖီးအိၣ်၀ဲ(၂၈၀ စင်တီမီတၥ)၀ံၤတၢ်လီၤဘၣ်ယိၣ်ထံနီၢ်ဂံၢ်ဖီးအိၣ်၀ဲ(၄၀၀ စင်တီမီတၥ)ဘျဲၣ်အဂ့ၢ်တၢ်သ့ၣ်ညါဘၣ်န့ၣ်လီၤ. မဟါတနံၤဂီၤ(၁၁ နၣ်ရံၣ် ၄၅ မံးနံး)အဘၢၣ်က၀ီၤပူၤဖဲထံကျိထံဟဲအါထီၣ်အခါ ၀့ၢ်တၣ်ခၠံၣ်လ့း ,တၣ်လီး လီၢ်က၀ီၤပူၤဟံၣ်တနီၤဒီး(ပုန်းထွန်)လီၢ်က၀ီၤ,(မကၥဟိုခမ်း)လီၢ်က၀ီၤ တၢ်လီၢ်တနီၤပူၤ ထံစးထီၣ်ဟဲနုၥ်လီၤအဂ့ၢ် အ၀ဲတဲ၀ဲန့ၣ်လီၤ.
တကးဒံးဘၣ် (၀မ်ကောင်း)လီၢ်က၀ီၤအပူၤ(နှင်းဆီ)ကျဲ တၢ်ဆှၢလံၥ်ပရၢရူ / တၢ်ဆဲးကျိး ကျဲ ဒီး မ့ၣ်ဇူၣ်ကျဲပၣ်ဃုၥ် တၣ်လီးကၠိ ကျဲ,ပှၤလဲၤဆူတၣ်လီး တၢ်ဆါတၢ်ပှ့ၤလီၢ် ကျဲဒီတဘိအဖီခိၣ်ထံသ့ၣ်တဖၣ်နုၥ်လီၤ၀ဲအဂ့ၢ်တၢ်သ့ၣ်ညါဘၣ်န့ၣ်လီၤ.
ထံဟဲအါထီၣ်အတၢ်အိၣ်သးန့ၣ် မဲၣ်ဆၣ်ကီၢ်ဆၣ်,တၢ်မၤဂုၤထီၣ်ပသီထီၣ်တၢ်ကရၢလၢအမ့ၢ်(၀မ်းဖန်းခမ်း)တၢ်မၤဂုၤထီၣ်ပသီထီၣ်တၢ်ကရၢ ဖဲမဟါတနံၤမုၢ်ဃ့ၢ်လီၤ (၂)နၣ်ရံၣ်အဆၢကတီၢ်အတၢ်မၤနီၣ်မၤဃါဒီး ဒြိအဖီခိၣ် မဲၣ်ဆၣ်ထံကျိဒီတဘိ ကီၢ်ကၠီၣ်တဲၣ်,၀့ၢ်မဲၣ်ဆၣ်,(ကော့ဆိုင်း) လီၢ်က၀ီၤဒီး ပၣ်ဃုၥ်ဒီးတၣ်ခၠံၣ်လ့း လီၢ်က၀ီၤလၢအလီၤဘံၣ်တကပၤ နီၢ်ဂံၢ်(၁)တၢ်မၤတၢ်ဘၣ်ထွဲလိၥ်သးတိၤအကပၤတၢ်ဆါတၢ်ပှ့ၤလီၢ်အဘၢၣ်က၀ီၤ ထံတဖၣ်နုၥ်လီၤ၀ဲန့ၣ်တၢ်ထံၣ်ဘၣ်န့ၣ်လီၤ.
မဲးတဖၣ်,ကပံၥ်ထံတဖၣ်အဃိ မဲၣ်ဆၣ်ထံကျိထံဘၣ်အၢဘၣ်သီ၀ဲဒီးတၢ်မ့ၢ်ဟဲစူၤန့ၣ်ထံအဲၣ်ဒိးလုၢ်ဘၢတၢ်န့ၣ်လီၤ.အခဲအံၤစ့ၢ်မ့ၢ်လၢမူခိၣ်စူၤ၀ဲ(၃)သီတပယူၥ်ဃီအဃိထံစးထီၣ်လုၢ်ဘၢတၢ်န့ၣ်လီၤ.လၢ၀့ၢ် တၣ်ခၠံၣ်လ့းအပူၤစ့ၢ်ကီးထံယွၤလီၤတန့ၢ်ညီညီဘၣ်.တၢ်လီၢ်လၢဟီၣ်ခိၣ်လီၤဘံၣ်တကပၤန့ၣ်အၢဒိၣ်၀ဲန့ၣ်လီၤ.ထံကဟးထီၣ်အပူၤတအိၣ်အဃိထံဟဲထီၣ်ချ့၀ဲန့ၣ်လီၤအဂ့ၢ်လီၢ်က၀ီၤဖိလၢခံတဂၤတဲစ့ၢ်ကီး၀ဲန့ၣ်လီၤ.
၀့ၢ်တၣ်ခၠံၣ်လ့ၣ် အဖီခိၣ်တကပၤ (မိုင်းဆတ်)ကီၢ်ရ့ၣ်အပူၤဖဲလါအ့ဖြ့ၣ်(၂၇)သီမုၢ်နၤခီဒီးလါအ့ဖြ့ၣ်(၂၈)သီမုၢ်နၤခီ မူခိၣ်စူၤအဃိ ကစၢၢ်ခိၣ်ထံဟဲယွၤနုၥ်လီၤဆူ မဲၣ်ဆၣ် ထံကျိပူၤ၀ံၤထံကျိထံဟဲထီၣ်ထီအါထီၣ်ဒီးဖဲမဟါတနံၤ(၂၉)သီနံၤဂီၤခီမူခိၣ်စူၤအ၀ံၤလီၢ်က၀ီၤတဖၣ်အပူၤထံဟဲနုၥ်လီၤအဂ့ၢ်တၢ်သ့ၣ်ညါဘၣ်န့ၣ်လီၤ.
ကီၢ်ပယီၤ-ကီၢ်ကၠီၣ်တဲၣ် ကီၢ်ဆၢ, ၀့ၢ်တၣ်ခၠံၣ်လ့း ဒီး ၀့ၢ်မဲၣ်ဆၣ်ပူၤ မဲၣ်ဆၣ်ထံကျိ န့ၣ်ဖဲအပူၤကွံၥ်(၂၀၂၄)နံၣ်တၢ်စူၤခါအဆၢကတီၢ်စ့ၢ်ကီးထံဒိၣ်,ထံလုၢ်ဘၢတၢ်ကဲထီၣ်တ့ၢ်၀ဲ၀ံၤထံဟဲနုၥ်လီၤလၢလီၢ်က၀ီၤပူၤစ့ၢ်ကီးအိၣ်၀ဲန့ၣ်လီၤ.
Ref: VOM
