လါအ့ဖြ့ၣ်(၁၈)သီ,၂၀၂၅နံၣ်
အမဲရကၤကီၢ်ကီၢ်စၢဖှိၣ်, တကဆဲးကီၢ်စဲၣ်အပူၤ တုၤလါအ့ဖြ့ၣ်(၁၅)သီအနံၤ ပှၤဘၣ်၀ဲးသဲးတၢ်ဆါ(၅၆၁)ဂၤ၀ံၤ တၢ်မ့ၢ်စးထီၣ်ဂံၢ်ဒွးအီၤလၢ လါအ့ဖြ့ၣ်(၁၁)သီအနံၤန့ၣ် ဟဲအါထီၣ်၀ဲပှၤ(၂၀)ဂၤအဂ့ၢ် ဆူၣ်ချ့၀ဲၤကျိၤစံး၀ဲန့ၣ်လီၤ.
တၢ်ကဒုးလီၤပှီၢ် ၀ဲးသဲးတၢ်ဆါလၢအဘၣ်ကူဘၣ်ဂၢ် ဖိသၣ်တဖၣ်အဂီၢ် တၢ်ပျဲလီၤပှၤ(၇)ဂၤဆူ တကဆဲးကီၢ်စဲၣ်အပူၤအဂ့ၢ် အမဲရကၤပဒိၣ်စံး၀ဲန့ၣ်လီၤ.
တၢ်ဆါအိၣ်ကဲထီၣ်သး တၢ်လီၢ်ခၢၣ်သးလၢအမ့ၢ် က့ကီၢ်ဆၣ်အပူၤ တုၤလၢမုၢ်ဖီဖးအနံၤ ပှၤဘၣ်ကူဘၣ်ဂၢ်အိၣ်(၃၅၅)ဂၤဒီးဟဲအါထီၣ်တုၤ(၃၆၄)ဂၤအဂ့ၢ် တကဆဲးကီၢ်စဲၣ် ဆူၣ်ချ့၀ဲၤကျိၤ စံး၀ဲန့ၣ်လီၤ.
ဒ်န့ၣ်အသိး လဘဲးကီၢ်ဆၣ်အပူၤ တၢ်တယၣ်ပၥ်ဖျါထီၣ်ပှၤ(၄၁)ဂၤအကျါ ဖိသၣ်(၂)ဂၤလၢတၢ်တီၣ်ဃၥ်တၢ်ဆါဟံၣ်အံၤ အဘၣ်၀ဲးသဲးတၢ်ဆါလံအဂ့ၢ်န့ၣ် လီၢ်က၀ီၤကမျၢၢ်ဆူၣ်ချ့ပှၤဘၣ်မူဘၣ်ဒါတဂၤ တဲလီၤဃၥ်၀ဲလၢ တၢ်သံကွၢ်စံးဆၢတခါအပူၤန့ၣ်လီၤ.
ဖိသၣ်တဖၣ်အံၤ တၢ်ဟးကသုၣ်ဆူတၢ်လီၢ်အဂၤတအိၣ်ဘၣ်ဒီး က့ကီၢ်ဆၣ်အပူၤ တၢ်ဆါတၢ်ဘၣ်ကူဘၣ်ဂၢ်အိၣ်ထီၣ်ယံၤလံအဂ့ၢ် ဖိသၣ်မိၢ်ပၢ်တဖၣ်တဲ၀ဲအဂ့ၢ်န့ၣ် လဘဲးကမျၢၢ်ဆူၣ်ချ့ပှၤနဲၣ်တၢ် ဒီးကထၢၣ် ကဲးသရ့၀ဲၣ် စံး၀ဲန့ၣ်လီၤ.
“၀ဲးသဲးတၢ်ဆါအဃၣ် ဟဲတုၤလၢပှၤတ၀ၢအပူၤဒ်လဲၣ်တခီ တၢ်တသ့ၣ်ညါလီၤတံၢ်ဘၣ်ဆၣ် တၢ်သ့ၣ်ညါတၢ်ဆါဟဲတုၤအီၤအဆၢကတီၢ်န့ၣ် တၢ်ဆါအဃၣ်တဖၣ်အိၣ်ရၤလီၤအသးလံန့ၣ်လီၤ. တၢ်ဆါတၢ်ဘၣ်ကူဘၣ်ဂၢ်ကဲထီၣ်သးန့ၣ် ကယံၤတုၤ(၁)နံၣ်သ့န့ၣ်လီၤ.”
တၢ်ဆါတၢ်ဘၣ်ကူဘၣ်ဂၢ်ကဲထီၣ်သးအဆၢကတီၢ် တကဆဲးကီၢ်စဲၣ်အပူၤ ပှၤ(၅၈)ဂၤဘၣ်တၢ်တီၣ်ဃၣ်လၢတၢ်ဆါဟံၣ်၀ံၤ ဖိသၣ်(၂)ဂၤလၢတဆဲးဃၥ် တၢ်ဒီသဒၢကသံၣ်တခီ ဘၣ်သံ၀ဲဒၣ်လၢ ၀ဲးသဲးတၢ်ဆါန့ၣ်လီၤ.
Source : Reuters
