လါဖ့ၤဘြူၤအါရံၤ(၅)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ချၢၣ်လွံၢ်ထူၣ်, လၢၢ်ဒိၣ်ကီၢ်ဆၣ်, ကစၢၢ်တရ့လိၣ်ကရူၢ်အပူၤ တၢ်ဒုးကဲထီၣ်သးတအိၣ်ဘၣ်ဒီးဖျိသုးကီၣ်ကးအသုးပညိၣ်ကမျၢၢ်ခးမ့ၣ်အူမ့ၣ်ပိၢ်တဖၣ်ဒီးခးလီၤကျိဖးဒိၣ်တဖၣ်အဃိလီၢ်က၀ီၤပိၥ်မုၣ်ဘၣ်ဒိ၀ဲ(၁)ဂၤ,သီခါ(၁)ဂၤဒီးဘၣ်ဟးဂီၤကွံၥ်စ့ၢ်ကီးသီခါဖၠၣ်တၢ်သူၣ်ထီၣ်ဒီးကမျၢၢ်ဟံၣ်ဃီတဖၣ်အဂ့ၢ် တၢ်သ့ၣ်ညါဘၣ်လၢ လၢၢ်ဒိၣ်ကီၢ်ဆၣ် ပှၤဘၣ်မူဘၣ်ဒါအအိၣ်န့ၣ်လီၤ.
၂၀၂၅နံၣ်, လါဖ့ၤဘြူၤအါရံၤ(၃)သီအနံၤ, ဟါ(၁၀)နၣ်ရံၣ်ဃၥ်ဃၥ်အဆၢကတီၢ် သုးကီၣ်ကးအသုး ဟဲတ့ၢ်လီၤမ့ၣ်အူမ့ၣ်ပိၢ်ဆူ ခ့ၣ်အဲၣ်ယူၣ်-လၢၢ်ဒိၣ်ကီၢ်ဆၣ်, ကစၢၢ်ရ့လိၣ်ကရူၢ်ပူၤအဃိ လဲၤလီၤတဲၥ်ပိၢ်ဖးထီၣ်၀ဲဒၣ် ဖဲအလဲၣ်သ၀ီပူၤဒီး မစူးမၠ့းမိၣ် သးနံၣ်(၁၆)ဘၣ်သံ၀ဲန့ၣ်လီၤ.
တကးဘၣ် ခီဖျိမ့ၣ်အူမ့ၣ်ပိၢ်လီၤတဲၥ်ပိၢ်ဖး မ့ၣ်အူအီၣ်တၢ်အဃိ အလဲၣ်သ၀ီဖိလၢအမ့ၢ် မအ့အ့နွဲၣ် ဒီး မလးနွဲၣ် အဟံၣ်တဖၣ်စ့ၢ်ကီး မ့ၣ်အူအီၣ်ဟးဂီၤကွံၥ်၀ဲန့ၣ်လီၤ.
“တၢ်ဒုးတၢ်ယၤန့ၣ် ကဲထီၣ်သးတအိၣ်ဘၣ်. သုးကီၣ်ကးအသုးန့ၣ် ပညိၣ်၀ဲကမျၢၢ်လိၤလိၤဒီးခး၀ဲန့ၣ်လီၤ. အလဲၣ်သ၀ီန့ၣ် တၢ်ပၢၢ်ဆၢသုးတဖၣ်ဆီလီၤသးတအိၣ်ဘၣ်. ဒူၣ်ဒါတဖၣ်ခး၀ဲဒၣ် မ့ၣ်အူမ့ၣ်ပိၢ် လဲၤလီၤတဲၥ်ဘၣ်ဟံၣ်ဒီး ဟံၣ်မ့ၣ်အူအီၣ်ကွံၥ်ဃုၥ်ဒီး ပိၥ်မုၣ်သးစၢ်ဖိတဂၤအဂ့ၢ်” လၢၢ်ဒိၣ်ကီၢ်ဆၣ် ပှၤကတိၤတၢ်ပၢ ပဒိၣ်စီၤ၀ါမုၢ် စံး၀ဲန့ၣ်လီၤ.
လါဖ့ၤဘြူၤအါရံၤ(၄)သီအနံၤ, ဂီၤ(၉)နၣ်ရံၣ်ဃၣ်ဃၣ်အဆၢကတီၢ် သုးကီၣ်ကးအသုး(ခလရ-၂၆၄)လၢအိၣ်ဖဲ ၀့ၢ်ပ့စလိး ခးလီၤ(၁၂၀-မမ)ကျိဖးဒိၣ်(၂)ဖျၢၣ် ဆူ ခ့ၣ်အဲၣ်ယူၣ်-လၢၢ်ဒိၣ်ကီၢ်ဆၣ်ပူၤအဃိ လဲၤလီၤတဲၥ်ပိၢ်ဖးထီၣ်၀ဲဒၣ်ဖဲ ကစၢၢ်တရ့လိၣ်သ၀ီပူၤအဃိ ဘၣ်ဟးဂီၤကွံၥ်၀ဲ သီခါဖၠၣ်တၢ်သူၣ်ထီၣ်(၁)ဖျၢၣ်အသိး သီခါလၢအမ့ၢ် အူအိးကၣ်သး သးနံၣ်(၆၀)နံၣ်စ့ၢ်ကီး ဘၣ်ဒိ၀ဲန့ၣ်လီၤ.
တၢ်ခးလီၤကျိဖးဒိၣ်အပူၤ ကစၢၢ်တရ့လိၣ်သ၀ီဖိလၢအမ့ၢ် အူထိဘီအဟံၣ်(၁)ဖျၢၣ်စ့ၢ်ကီး ဘၣ်ဟးဂီၤကွံၥ်၀ဲဒၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
တနံၤဃီဖဲမုၢ်ထူၣ်(၁၁)နၣ်ရံၣ်အဆၢကတီၢ် သုးကီၣ်ကးအသုး(ခလရ-၂၆၄) ဟဲတ့ၢ်လီၤဒြိမ့ၣ်ပိၢ်အဃိ ဘၣ်ဟးဂီၤကွံၥ်၀ဲ ကစၢၢ်တရ့လိၣ်သ၀ီ တၢ်သိၣ်ကၠိတၢ်သူၣ်ထီၣ်တဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၃), ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤတဖၣ်အပူၤ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်ကးအသုးတဖၣ် ပညိၣ်ဒုးလီၢ်က၀ီၤကမျၢၢ်လၢ တၢ်ခးလီၤကျိးဖဒိၣ်မ့ၢ်ဂ့ၤ ဒီး တ့ၢ်လီၤဒြိမ့ၣ်ပိၢ်မ့ၢ်ဂ့ၤအိၣ်ထီၣ်၀ဲ ကိးမုၢ်နံၤဃၥ်ဃၥ်အဃိ လီၢ်က၀ီၤကမျၢၢ် တၢ်သံတၢ်ပှၢ်, တၢ်ဘၣ်ဒိဘၣ်ထံးဒီး ကမျၢၢ်စုလီၢ်ခီၣ်ခိၣ်တၢ်ဖိတၢ်လံၤတဖၣ် ဘၣ်ဟးဂီၤကွံၥ်၀ဲ အါအါဂီၢ်ဂီၢ်န့ၣ်လီၤ.
