လါဖ့ၤဘြူၤအါရံၤ(၅)သီ,၂၀၂၅နံၣ်
တုၤလၢ သုးကီၣ်ကး အတၢ်ထၢဆူၣ်သုး နီၣ်ဂံၢ်(၉)အပူၤန့ၣ် ကီၢ်ပယီၤဒီတဘ့ၣ် ကမျၢၢ်(၄)ကလးဘျဲၣ် ဘၣ်တၢ်ထၢန့ၢ်ဆူၣ်သုးအဂ့ၢ် ဒီကလုၥ်ဃူဖိးပဒိၣ် NUG ကီၢ်ခိၣ်၀ဲၤဒၢး ပှၤတဲတၢ်ပၢ အူကၠီၣ်စီ စံး၀ဲန့ၣ်လီၤ.
တနံၤအံၤ လါဖ့ၤဘြူၤအါရံၤ(၄)သီအနံၤ” တၢ်တဲလီၤတၢ်ကစီၣ်ဆူ ကမျၢၢ်ဒီးထံဂုၤကီၢ်ဂၤ” (Press Briefing)တၢ်ရဲၣ်တၢ်ကျဲၤအပူၤ အူကၠီၣ်စီတဲလီၤ၀ဲ ဘၣ်ထွဲဒီး သုးကီၣ်ကးအတၢ်ထၢဆူၣ်သုးဂ့ၢ်၀ီတဖၣ်န့ၣ်လီၤ.
အပူၤကွံၥ်န့ၣ် သုးကီၣ်ကး တၢ်ထၢဆူၣ်သုးတၢ်ဘျၢသဲစးအပူၤ ပၥ်ဖျါဃၥ်၀ဲလၢ သုးတၢ်မၤလိ(၁)၀ီၤန့ၣ် ကထၢ၀ဲပှၤနီၣ်ဂံၢ်(၅)ကထိဘျဲၣ်၀ံၤ တုၤလီၤလၢကတီၢ်အံၤ နီၣ်ဂံၢ်(၉)၀ီတ၀ီန့ၣ် ဘၣ်တၢ်ထၢန့ၢ်ဆူၣ်သုး အိၣ်ထီၣ်တုၤ ပှၤနီၣ်ဂံၢ်(၄)ကလးဘျဲၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ပှၤလၢဘၣ်တၢ်ထၢန့ၢ်ဆူၣ်ဃၥ်အကျါ တနီၤန့ၣ် ဘၣ်တၢ်ဆှၢအီၤဆူ တၢ်မဲၥ်ညါတၢ်ဒုးပျီပူၤအိၣ်အသိး အခဲအံၤ သုးတၢ်မၤလိတ၀ီအံၤအပူၤန့ၣ် ပိၥ်မုၣ်တဖၣ်စ့ၢ်ကီး တၢ်ထၢန့ၢ်ဆူၣ်သုးအိၣ်ထီၣ်၀ဲအဂ့ၢ် အူကၠီၣ်စီ စံး၀ဲန့ၣ်လီၤ.
တၢ်ကနီၤဖး ပှၤလၢဘၣ်တၢ်ထၢန့ၢ်ဆူၣ်သုးအဃိ ကဲထီၣ်သုးဒီး အပူၤကွံၥ်လံၤလံၤကဲထီၣ်တ့ၢ်သုးအဂီၢ် ကီခဲအဃိ တၢ်ကကွၢ်တၢ်အိၣ်သးအကပၤကပၤအဖီခိၣ် ကဟဲပၥ်ဖှိၣ်မၤသကိးတၢ်ဒီး ကမျၢၢ်တၢ်ပၢၢ်ဆၢကရၢတဖၣ်အဂီၢ် စ့ၢ်ကီး ဟ့ၣ်သဆၣ်ထီၣ်ဃၥ်၀ဲန့ၣ်လီၤ.
သုးကီၣ်ကး အတဖိးသဲစး တၢ်ထၢဆူၣ်သုးသဲစးတၢ်ဘျၢ လၢအဘိးဘၣ်ရၤလီၤအီၤလၢ အပူၤကွံၥ်(၂၀၂၄)နံၣ်, လါဖ့ၤဘြူၤအါရံၤအတီၢ်ပူၤအံၤ ပှဲၤထီၣ်၀ဲလံ(၁)နံၣ်အသိး သုးကီၣ်ကးဘိးဘၣ်ရၤလီၤကဒီး တၢ်ထၢဆူၣ်သုးသဲစးတၢ်ဘျၢအံၤ လၢ၂၀၂၅နံၣ်, လါယနူၤအါရံၤ(၂၃)သီအနံၤန့ၣ်လီၤ.
တၢ်ထၢဆူၣ်သုးသဲစးတၢ်လၢ အပၥ်ဖျါထီၣ်တ့ၢ်ဖဲ၂၀၁၀နံၣ်အံၤ စးထီၣ်ဖဲ ၂၀၂၄နံၣ်, လါဖ့ၤဘြူၤအါရံၤ(၁၀)သီအနံၤန့ၣ် အသးစးထီၣ်မူလံအဂ့ၢ် သုးကီၣ်ကးတဲလီၤ၀ဲန့ၣ်လီၤ. ၀ံၤအလီၢ်ခံ ၂၀၂၄နံၣ်, လါအ့ဖြ့ၣ်(၁)သီအနံၤန့ၣ် တၢ်စးထီၣ် သုးတၢ်မၤလိနီၣ်ဂံၢ်(၁) ဒီးတုၤခဲအံၤန့ၣ် တုၤဃီၤ၀ဲဆူၣ် (၉)၀ီတ၀ီလံန့ၣ်လီၤ.
