လါဒံၣ်စ့ဘၢၣ်(၁၇)သီ,၂၀၂၄နံၣ်
၂၀၂၄နံၣ်, လါဒံၣ်စ့ဘၢၣ်(၁၆)သီအနံၤ, ခ့ၣ်အဲၣ်ယူၣ်-လီၫ်ခၢၣ်သး ပာ်ဖျါ၀ဲလၢ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်သူလ့ၤတၫ်ပၢဟီၣ်က၀ီၤ,ချၢၣ်လွံၫ်ထူၣ်ကီၫ်ရ့ၣ်,ဆီထံးကီၫ်ဆၣ်ပူၤ သုးကီၣ်ကးအသုးတဖၣ် ပညိၣ်ဃီၤထံဖိကီၫ်ဖိကမျၢၫ်၀ံၤ ခးလီၤကျိဖးဒိၣ်တဖၣ်ဆူ ထံဖိကီၫ်ဖိကမျၢၫ်တၫ်ဖံးအီၣ်မၤအီၣ်အလီၫ်တဖၣ် လၢတၫ်ပညိၣ်အိၣ်အပူၤအဃိ ကမျၢၫ်လၢတၫ်ကမၣ်တအိၣ်(၃)ဂၤဘၣ်ဒိဘၣ်ထံး၀ဲအဂ့ၢ်န့ၣ်လီၤ.
ခ့ၣ်အဲၣ်ယူၣ်-ဆီထံးကီၫ်ဆၣ်ပူၤ ဖဲ၂၀၂၄နံၣ်,လါဒံၣ်စ့ဘၢၣ်(၁၀)သီနံၤ,သုးကီၣ်ကးအသုး ခလရ-၅၇သုးပာ်ဖှိၣ်တဖၣ် ဆီလီၤဃာ်အသးဖဲအ့ကနံၣ်သ၀ီ၀ံၤ ခးလီၤကျိဖးဒိၣ် ၆၀မမ(၂)ဖျၢၣ်ဆူ ယိတဲသ၀ီအဃိ သ၀ီဖိ ဒီၣ်သ့,သးနံၣ်(၆၇)နံၣ် ဘၣ်သံ၀ဲန့ၣ်လီၤ.
၂၀၂၄နံၣ်,လါဒံၣ်စ့ဘၢၣ်(၁၁)သီနံၤန့ၣ် ခလရ-၂၆၄ လၢအိၣ်ဆီလီၤအသးဖဲ ပ့စလိးသုးကလၢၤ ခးလီၤကျိဖးဒိၣ် ၁၂၀မမ(၁)ဖျၢၣ်စုာ်စုာ်ဆူခၠိၣ်အ့သ၀ီဒီးကွ့ကိသ၀ီတဖၣ်အပူၤန့ၣ်လီၤ.
၂၀၂၄နံၣ်,လါဒံၣ်စ့ဘၢၣ်(၁၂)သီအနံၤ သုးကီၣ်ကးအသုး ခလရ-၅၇သုးလၢဆီလီၤဃာ်အသးဖဲ အ့ကနံၣ်သ၀ီအံၤ ခးလီၤကျိဖးဒိၣ် ခဲလၢာ်ပာ်ဖှိၣ်(၅)ဖျၢၣ်ဆူစံဖဲသ၀ီပူၤအဃိ သ၀ီဖိအူခ့ၣ်၀့,သးနံၣ်(၄၂)နံၣ်, ဒီးမစါမူၣ်,သးနံၣ်(၄၅)နံၣ်ခံဂၤ ဘၣ်ဒိဘၣ်ထံး၀ဲအဂ့ၢ် ပၥ်ဖျါဃၥ်၀ဲန့ၣ်လီၤ.
