လါစဲးပထ့ဘၢၣ်(၃၀)သီ,၂၀၂၄နံၣ်
ဖဲလါစဲးပထ့ဘၢၣ်(၂၈)သီအနံၤ, KNU(လီၫ်ခၢၣ်သး)တၫ်ကစီၣ် ဘိးဘၣ်ရၤလီၤ၀ဲလၢ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ တၫ်ပၢဟီၣ်က၀ီၤ,သုးက့(၇)ဘ့ၣ်အပူၤ သ၀ီခဲလၢာ်ပာ်ဖှိၣ်(၅၄၂)သ၀ီ,ပှၤ(၄)ကလီၫ်ဃၣ်ဃၣ် (၃၈၀,၇၇၉)ဂၤ တူၫ်ဘၣ်ထံလုၫ်ဘၢတၫ်၀ံၤ လိၣ်ဘၣ်တၫ်အီၣ်တၫ်အီ,ထံအီတဖၣ်ဒီး တၫ်ပီးတၫ်လီလၢ တၫ်ကမၤကဆှီက့ၤတၫ်အဂီၫ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢတၫ်ပၢဟီၣ်က၀ီၤပူၤ ကီၫ်ဆၣ်အိၣ်(၂၇)ဘ့ၣ်အကျါ ကီၫ်ဆၣ်အဘ့ၣ်(၂၀)အပူၤ ထံးဒိၣ်နိယွၤကဲထီၣ်၀ံၤ လီၤဆီဒၣ်တၫ် ကီၫ်ရ့ၣ်ဒူသထူၣ်,ကီၫ်ရ့ၣ်ချၢၣ်လွံၫ်ထူၣ်ဒီးကီၫ်ရ့ၣ်တီအူတဖၣ်အပူၤ တူၫ်ဘၣ်ထံလုၫ်ဘၢတၫ်အနးကတၢၫ်အဂ့ၫ် KNUတဲ၀ဲလီၤ.
ထံတၫ်မၤဘၣ်ဒိတဖၣ်အဃိ စံၣ်ပျီတဖၣ်,တၫ်အီၣ်တၫ်အီလၢတၫ်ပာ်ကီၤဃာ်တဖၣ်,ထံပူၤ,ထံကမါဒီးထံအီတဖၣ်, တၫ်ဟးလီၫ်ဒီး ဆၣ်ဖိကီၫ်ဖိတဖၣ် ဘၣ်ဒိဟးဂီၤကွံာ်တကးဘၣ် တၫ်သူၣ်ထီၣ်တဖၣ်စ့ၫ်ကီးဘၣ်ဟးဂီၤ၀ဲလီၤ.
တၫ်န့ၣ်အဃိ တၫ်ပီးတၫ်လီလၢတၫ်သူၣ်တၫ်သူၣ်ဖျးအဂီၫ်,ဟံၣ်ဖိဃီဖိကအီၣ်အဂီၫ်ဒီးတၫ်လုၫ်အီၣ်သးသမူအဂီၫ် ဆၣ်ဖိကီၫ်ဖိလၢကဘုၣ်အီၣ်၀ဲတဖၣ်,ထံပူၤတဖၣ်ဒီးထံအီတဖၣ် လၢတၫ်က့ၤသူၣ်ထီၣ်အဒါက့ၤအဂီၫ် လိၣ်ဘၣ်တၫ်ပီးတၫ်လီ တၫ်မၤစၢၤတဖၣ်အဂ့ၫ် ပာ်ဖျါ၀ဲလီၤ.
KNUဒီးကလုာ်ဒူၣ်တၫ်ပၢၫ်ဆၢတၫ်ပၢဟီၣ်က၀ီၤတဖၣ်အပူၤ တၫ်မ့ၫ်လဲၤဟ့ၣ်တၫ်မၤစၢၤန့ၣ် သုးကီၣ်ကး အတၫ်မၤတံာ်တာ်အိၣ်အဃိ တၫ်ကြၢးတၢၣ်ပီၣ်တဲသကိးဒီး တၫ်ပၢၫ်ဆၢဂံၫ်ဘါကရၢတဖၣ်အဂ့ၫ်ဒီး တၫ်ကမၤတၫ်တၢၣ်ပီၣ် တဲသကိးအဂီၫ် အိၣ်ကတီၤသးအဂ့ၫ် KNUတဲ၀ဲလီၤ.
ယၣ်ကံၣ်ကလံၤမုၫ်အဃိ ထံကီၫ်ဒီတဘ့ၣ်အပူၤ ပှၤခဲလၢာ်(၁)ကကွဲၫ်ဃၣ်ဃၣ် တူၫ်ဘၣ်ထံလုၫ်ဘၢတၫ်၀ံၤ တၫ်မၤစၢၤဆီၣ်ထွဲတဖၣ် မ့ၫ်တဒိးန့ၫ်ဘၣ်၀ဲ ချူးဆၢချူးကတီၫ်ဘၣ်န့ၣ် တၫ်က့ၤသူၣ်ထီၣ်ဆီလီၤအဂီၫ် ကဃၢထီၣ်၀ဲ၀ံၤ လီၫ်က၀ီၤဖဲန့ၣ်တဖၣ်အပူၤ ကကွၫ်ဆၢၣ်မဲာ်ဘၣ် တၫ်ကီတၫ်ခဲလၢနံၣ်ယံာ်တဖၣ်အပူၤအဂ့ၫ် ဘီမုၫ်စၢဖှိၣ်ကရၢ ဘၣ်ထွဲဟီၣ်ခိၣ်ဖိတၫ်မၤစၢၤတၫ်တၢၣ်ပီၣ်တဲသကိး၀ဲၤဒၢး(UNOCHA)ဘိးဘၣ်ပာ်ဖျါ၀ဲဖဲလါစဲးပထ့ဘၢၣ်(၂၇)သီနံၤန့ၣ်လီၤ.
