လါစဲးပထ့ဘၢၣ်(၁၈)သီ,၂၀၂၄နံၣ်
လၢရခၢၣ်ကီၫ်စဲၣ်,ကီၫ်ဆၣ်ကွး,ဆၣ်ဒါသ၀ီ(ကိး)ယတနၣ်မၠဲၣ်သ၀ီအပူၤ တီၤဖုၣ်ကၠိလၢ ပှၤဘၣ်ကီဘၣ်ခဲဖိတဖၣ် အိၣ်ကဒု၀ဲန့ၣ် ဖဲလါစဲးပထ့ဘၢၣ်(၁၈)သီနံၤ ဟါခီအကတီၫ် သုးကီၣ်ကး လဲၤတ့ၫ်လီၤမ့ၣ်ပိၫ်လၢဒြိတဖၣ်ဒီး ပှမဘၣ်ကီဘၣ်ခဲဖိ(၄)ဂၤ ဘၣ်ဒိ၀ဲအဂ့ၫ် လီၫ်က၀ီၤဖိတဖၣ်တဲ၀ဲလီၤ.
တၫ်ဒုးအပူၤ ပှၤဃ့ၫ်သုးဘၣ်ကီဘၣ်ခဲတဖၣ်လၢအမ့ၫ် ဒီၣ်ခ့ၣ်ယံၤ,ဒီၣ်အ့အ့ခဲၣ်,အူစီၣ်၀့ဒီး ကိၣ်ဆါသ့အီၣ်တဖၣ် ဘၣ်ဒိဘၣ်ထံး၀ံၤ လၢအကျါ ပိာ်ခွါခံဂၤ ဘၣ်ဒိဘၣ်ထံးနးနးကျံးကျံးန့ၣ်လီၤ.
“ဒြိန့ၣ် ယူၤ၀့ၤ၀ီၤ၀ဲဒၣ်လၢ ဆၣ်ဒါကၠိ ဖဲဟါ(၅)နၣ်ရံၣ်ဃၣ်ဃၣ်လီၤ.ဖဲယူၤ၀့ၤ၀ီၤဒ်သိးန့ၣ်အကတီၫ် ပှၤလီၫ်အိၣ်ကမှံဖိ တဖၣ် ဃ့ၫ်ဖျိးတဖၣ်ဃ့ၫ်ကွံာ်၀ဲလီၤ.ဒြိန့ၣ် လၢဟါခီလီၤန့ၣ် ယူၤ၀့ၤ၀ီၤ၀ံၤ ဖဲ(၈)နၣ်ရံၣ်အဆၢကတီၫ်န့ၣ် တ့ၫ်လီၤမ့ၣ်ပိၫ် တဖၣ်လီၤ.ပှၤဘၣ်ဒိ(၄)ဂၤလီၤ.ပှၤဒိးန့ၫ်တၫ်ဘၣ်ဒိဘၣ်ထံးနးနးကျံးကျံးအိၣ်၀ဲအဂ့ၫ်”တဲ၀ဲလီၤ.
ကီၫ်ဆၣ်ကွး,၀့ၫ်ကၠ့ၣ်တလံၣ်အပူၤ စးထီၣ်ဖဲလါအီကူးခံနွံတနွံအပူၤန့ၣ် တၫ်ဒုးဆူၣ်ထီၣ်ကဒါက့ၤ၀ံၤ ပှၤဃ့ၫ်သုးပှၤလီၫ် အိၣ်ကမှံတနီၤ ဟဲဃ့ၫ်အိၣ်ကဒုဖဲဆၣ်ဒါသ၀ီ တီၤဖုၣ်ကၠိအပူၤအဂ့ၫ် တဲ၀ဲလီၤ.
ဖဲလါအီကူး(၁၆)သီအနံၤစ့ၫ်ကီး ၀့ၫ်ကၠ့ၣ်တလံၣ်,က၀ီၤဒ့နီၫ်ဂံၫ်(၂)အပူၤ ကျိဖးဒိၣ်လီၤတဲာ်ပိၫ်ဖးအဃိ ကမျၢၫ်(၁၁)ဂၤ ဘၣ်သံ၀ံၤ (၁၁)ဂၤဘၣ်ဒိဘၣ်ထံးအဂ့ၫ် လီၫ်က၀ီၤဖိတဖၣ်တဲ၀ဲလီၤ.
လၢကတီၫ်အံၤ ကၠီးပစးသ၀ီဒီးကးကီၣ်သ၀ီတဖၣ် လၢအိၣ်စီၤစုၤယံၤဒီး ၀့ၫ်ကၠ့ၣ်တလံၣ် (၅)မံးလာ်ဃၣ်ဃၣ်အံၤ အကပၤ သုးကီၣ်ကးဒီးရခၢၣ်သုးမုၫ်ဒိၣ်(AA)အဘၢၣ်စၢၤ တၫ်ဒုးတဖၣ် ဆူၣ်ထီၣ်တပယူာ်ဃီန့ၣ်လီၤ.
Ref: RFA
