၁၀.၇.၂၀၂၄
ခ့ၣ်အဲၣ်ယူၣ်-ကညီဒီကလုာ်ဖှိၣ်ကရၢ, ကီၫ်ရ့ၣ်ဒူ့ပျာ်ယာ်ဟီၣ်က၀ီၤ,ကီၫ်ဆၣ်ကီးတရံး-ရၤမတံ, အ့ရှၢၣ်ကျဲဒီး တီနီၫ်ကစၢၫ်အကပၤ ကိးမုၫ်နံၤဃၣ်ဃၣ် တၫ်ဒုးကဲထီၣ်၀ံၤ သုးကီၣ်ကးအအီၣ်စ့ၣ်ယးသုးကျိၤ ဂုၤက့ၤအခံဃ့ၫ်ဖျိးကွံာ်အဃိ ကညီဒီကလုာ်တၫ်ထူၣ်ဖျဲးသုးမုၫ်ဒိၣ်-KNLA သုးပာ် ဖှိၣ်တဖၣ် မၤန့ၫ်ကဒါက့ၤတၫ်လီၫ်တနီၤအဂ့ၫ် တၫ်မဲာ်ညါဂ့ၫ်ခီၣ်ထံးတၫ်ကစီၣ် ပာ်ဖျါ၀ဲလီၤ.
အ့ရှၢၣ်ကျဲမုၫ်ဒိၣ်ဒီး၀့ၫ်ရၤမတံလၢ အရ့ဒိၣ်လၢ ကၠီၣ်တဲၣ်-ကီၫ်ပယီၤတၫ်ကူၣ်လဲၤမၤကၤပနံာ်အံၤ တၫ်ကက့ၤပၢဆှၢ မၤန့ၫ်က့ၤ၀ဲအဂီၫ် ထံကီၫ်ပတီၫ် ဟ့ၣ်၀ဲအမံၤလၢ အီၣ်စ့ၣ်ယးဒုးယၤတၫ်ရဲၣ်တၫ်ကျဲၤဒီး သူ၀ဲခိသုးဒီးကလံၤသုးအါအါ ဂီၫ်ဂီၫ်၀ံၤ ဟဲထီၣ်လၢသုးကျိၤလၢလါအ့ဖြ့ၣ်လံၤလံၤန့ၣ်လီၤ.
သုးကီၣ်ကးအသုးကျိၤတဖၣ် လၢယံာ်(၃)လါဃၣ်ဃၣ်အတီၫ်ပူၤ ဟဲတိဖျိ၀ဲ အ့ရှၢၣ်ကျဲမုၫ်ဒိၣ်ဒီး တီနီၫ်ကစၢၫ်တန့ၫ်ဘၣ် အမဲာ်ညါ ကညီဒီကလုာ်တၫ်ထူၣ်ဖျဲးသုးမုၫ်ဒိၣ်-KNLAဒီးသုးပာ်ဖှိၣ်တဖၣ် အတၫ်ဒုးဆှၢက့ၤအီၤအဃိ ဘၣ်ဒိဘၣ်ထံး ဘၣ်သံဘၣ်ပှၫ်အါမးန့ၣ်လီၤ.
ဖဲလါယူၤလံ(၈)သီနံၤ သုးကီၣ်ကးအသုးကျိၤန့ၣ် KNLA သုးပာ်ဖှိၣ်တဖၣ် ထီၣ်ဒုးဃီၤအီၤဒီး ဂုၤက့ၤအခံဃ့ၫ်ပူၤဖျဲးသး အဃိ တၫ်လီၫ်တနီၤ KNLAသုးပာ်ဖှိၣ်တဖၣ် မၤန့ၫ်ကဒါက့ၤ၀ဲလီၤ.
ဂ့ၫ်ခီၣ်ထံးတၫ်ကစီၣ်တဲ၀ဲလၢတၫ်ဒုးကဲထီၣ်ကိးမုၫ်နံၤလီၤ.သုးကီၣ်ကးတကပၤအိၣ်တ့ၫ်ဒၣ်လၢြတီဆၢက့ၤတၫ်တခီလီၤ.ပ၀ဲတခီမ့ၫ်လၢပထီၣ်ဒုးက့ၤအ၀ဲသ့ၣ်အဃိ အ၀ဲသ့ၣ်ဃ့ၫ်ဖျိးကွံာ်၀ဲအိၣ်န့ၣ်လီၤ. တၫ်လီၫ်လၢအ၀ဲ သ့ၣ်ပၢဆှၢဃာ်၀ဲတနီၤ ပမၤန့ၫ်ကဒါက့ၤလီၤ.တလါအတီၫ်ပူၤ ပကမၤတုၤလၢ ပမၤန့ၫ်က့ၤ၀့ၫ်ကီးတရံး အဂ့ၫ်တဲ၀ဲလီၤ.
ဖဲလါအ့ဖြ့ၣ်(၂၇)သီအနံၤန့ၣ် ၀့ၫ်ကီးတရံးအပူၤ ကမျၢၫ်လၢဃ့ၫ်သုးတဖၣ် ကက့ၤနုာ်လီၤအိၣ်ဆိးကဒါက့ၤအဂီၫ် သုးကီၣ်ကးတကပၤကိးက့ၤ၀ဲလီၤ.ဖဲခံကပၤတၫ်ဒုးကဲထီၣ်ဖဲအ့ရှၢၣ်ကျဲမုၫ်ဒိၣ်ဒီးတီနီၫ်ကစၢၫ် အကပိာ်ကပၤ သ၀ီ တဖၣ် သုးကီၣ်ကး ဟဲကွၫ်ဟုၣ်လၢကလံၤကျါ၀ံၤ ခးစိဃီၤကျိဖးဒိၣ်ဒီးဟဲတ့ၫ်လီၤမ့ၣ်ပိၫ် လၢဒြိတဖၣ်အိၣ် ကိးမုၫ်နံၤလီၤ.
ဖဲလါယူၤလံ(၇)သီနံၤ ၀့ၫ်ကီးတရံး,ယွၣ်သံးယွၣ်လ့သ၀ီ သုးကီၣ်ကးအကျိဖးဒိၣ်အချံလီၤတဲာ်ပိၫ်ဖး၀ဲဖဲဟံၣ်တဖျၢၣ် အဖီခိၣ်အဃိ ပိာ်ခွါတဂၤဘၣ်ဒိဘၣ်ထံး၀ဲအဂ့ၫ် ပှၤ၀့ၫ်ဖိဖဲန့ၣ်တဖၣ်တဲ၀ဲလီၤ. ကမျၢၫ်လၢက့ၤနုာ်လီၤအိၣ်ဆိးကဒါက့ၤ တဖၣ်န့ၣ် မ့ၫ်လၢသုးကီၣ်ကးခးလီၤကျိဖးဒိၣ် ကိးနံၤဒဲးဃၣ်ဃၣ်အဃိ ဟးထီၣ်ကဒါက့ၤကဒီးလၢ၀့ၫ်ပူၤ၀ံၤ ဘၣ်စံာ်သုးန့ၣ်လီၤ.
ကမျၢၫ်လၢစံာ်သုးတဂၤတဲ၀ဲလၢ ဘၣ်ဃ့ၫ်ဟးထီၣ်ကဒီးလီၤ.အ၀ဲသ့ၣ်ခးကျိဖးဒိၣ်ဖဲဂီၤ(၅)နၣ်ရံၣ်ဃၣ်ဃၣ်ဒီး လီၤတဲာ် ၀ဲဖဲနီၫ်ဂံၫ်(၁)တီၤထီကၠိန့ၣ်လီၤ.လၢ၀့ၫ်ပူၤသုးကီၣ်ကးအသုးအိၣ်၀ဲအါမးဒံးလီၤ.ခးတၫ်ဒ်သိးအံၤယံာ်ထီၣ်ပတူၫ်တန့ၫ်လၢာ်ဘၣ်ဒီးပဟဲဃ့ၫ်ကဒါက့ၤလၢအံၤတကပၤအဂ့ၫ်တဲ၀ဲလီၤ.
ကီၫ်ပယီၤအပူၤ တၫ်အိၣ်ဆိးအီၣ်အီကီခဲဒီး ဆူၣ်ချ့တၫ်ကဟုကယာ်တဖၣ် ထံဂုၤကီၫ်ဂၤဒီးဘီမုၫ်စၢဖှိၣ်ကရၢတကပၤ ကပာ်၀ဲဒ်တၫ်ဂ့ၫ်လၢအရ့ဒိၣ်တခါ၀ံၤ ကြၢးဘှါဆှဲန့ၫ်၀ဲအဂ့ၫ် တၫ်ကရၢကရိလၢ မၤစၢၤပှၤလီၫ်အိၣ်ကမှံတဖၣ်တဲ၀ဲလီၤ.
ဖဲလါမ့ၤ(၂၈)သီနံၤ ၀့ၫ်ကီးတရံး,က၀ီၤဒ့နီၫ်ဂံၫ်(၄)အပူၤ ပှၤစံာ်သုးပိာ်မုၣ်တဂၤလၢက့ၤနုာ်လီၤအိၣ်ဆိးကဒါက့ၤတဂၤ လၢအဟံၣ်ကရၢၫ်ပူၤ ယီၫ်ဘၣ်မ့ၣ်ပိၫ်အဃိ အခီၣ်ဘၣ်ဟးဂီၤ၀ဲတကပၤန့ၣ်လီၤ.
စးထီၣ်ဖဲလါဒံၣ်စဲဘၢၣ်(၁)သီနံၤ တၫ်ဒုးတၫ်ယၤအပူၤ ကမျၢၫ်အဂၤ(၂၀)ဘျဲၣ် ဘၣ်သံ၀ံၤ ကမျၢၫ်ဟံၣ်ဃီအဖျၢၣ်(၅၀၀) ဘျဲၣ် မ့ၣ်အူအီၣ်လီၤကလဲကွံာ်၀ံၤ ဟံၣ်ဃီအဖျၢၣ်(၁၀၀)ဘျဲၣ်ဘၣ်ဟးဂီၤ၀ဲအမဲာ်ညါ လီၫ်က၀ီၤကမျၢၣ်လၢကအလီၫ် ဘၣ်ဃ့ၫ်ပူၤဖျဲးသးန့ၣ်လီၤ.
Ref: DVB
