၉.၇.၂၀၂၄
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, တီအူကီၫ်ရ့ၣ်ဟီၣ်က၀ီၤ သုးကီၣ်ကးအသုးကျိၤလၢအိၣ်ဟးထီၣ်၀ဲလၢဒီၣ်ဖးခိၣ် ဒီးဟဲလီၤဆူ၀့ၫ်တီအူအံၤ KNLAသုးပာ်ဖှိၣ်တဖၣ် ခိးဒုးအီၤအဃိ သုးကီၣ်ကးအပှၤသုးဖိတစှၤန့ၣ်(၂၀)ဂၤသံ၀ဲအဂ့ၫ် တၫ်သ့ၣ်ညါဘၣ်န့ၣ်လီၤ.
လါယူၤ(၈)သီအနံၤ,ဂီၤ(၁၀)နၣ်ရံၣ်ဃၣ်ဃၣ်အဆၢကတီၫ် သုးကီၣ်ကးအသိလ့ၣ်(၃)ခိၣ်လၢအဂံၫ်အဘါအိၣ်(၆၀)အံၤ တၫ်ခိးဒုးအီၤဖဲ ယဲၫ်မံၤလၤဒီးဃုမံၤလၤအဘၢၣ်စၢၤအဂ့ၫ် သုးက့နီၣ်ဂံၫ်(၂)KNLA, သုးရ့ၣ်(၅) Thawthikhoထုးထီၣ်ပာ်ဖျါဃၣ်၀ဲတၫ်ကစီၣ်န့ၣ်လီၤ.
“တၫ်န့ၫ်ဘၣ်တၫ်ကစီၣ်လၢ သုးသိလ့ၣ်အိၣ်ဟးထီၣ်၀ဲလၢ ဒီၣ်ဖးခိၣ်အဃိ တၫ်လဲၤခိးအီၤလၢကျဲတ၀ာ်၀ံၤတၫ်ခးအီၤန့ၣ်လီၤ. ခံခီခံကပၤတၫ်ခးလိာ်သးအိၣ်ထီၣ်၀ဲတခီနၣ်ရံၣ်ဃၣ်ဃၣ်လီၤ. တၫ်ထံၣ်ဘၣ်၀ဲ သိၣ်လ့ၣ်မ့ၣ်အူလူာ်ဟးထီၣ်တဖၣ်အဂ့ၫ်“ သုးက့နီၣ်ဂံၫ်(၂)KNLA, သုးရ့ၣ်(၅) Thawthikhoပှၤဘၣ်မူဘၣ်ဒါ စီၤပရူတူး စံး၀ဲန့ၣ်လီၤ.
တၫ်လဲၤဒုးအီၤ၀ံၤအလီၫ်ခံ သုးသိလ့ၣ်တဖၣ် လဲၤထီၣ်ဆူ၀့ၫ်တီအူအဂ့ၫ် တၫ်သ့ၣ်ညါဘၣ်န့ၣ်လီၤ. “တၫ်အိၣ်ခိးကွၫ်၀ဲ တၫ်ကဟဲက့ၤထီၣ်လၢကစၢၫ်ခိၣ်ဒံးဧါလီၤ. ဘၣ်ဆၣ်တဟဲထီၣ်၀ဲအဃိ ပဂုာ်က့ၤအခံ“အဂ့ၫ်စံး၀ဲန့ၣ်လီၤ.
ဖဲလၢတၫ်လဲၤဒုးအီၤအပူၤ KNLAဒီးသုးပာ်ဖှိၣ်တဖၣ်တခီ တၫ်ဘၣ်ဒိဘၣ်ထံးတအိၣ်၀ဲဘၣ်ဒီး ဂုာ်က့ၤအခံန့ၣ်လီၤ.
ဖဲအပူၤကွံာ်လါယူၤ(၁၆)သီအနံၤစ့ၫ်ကီး သုးကီၣ်ကးသုးသိလ့ၣ်ကျိၤ(၁၀)ခိၣ်လၢအိၣ်ဟးထီၣ်၀ဲလၢ ဒီၣ်ဖးခိၣ်ဒီးလဲၤဆူတီအူအံၤ တၫ်ခိးခးအီၤဖဲ (၆)မံၤလၤဒီး(၇)မံၤလၤအဘၢၣ်စၢၤအဃိ ခံခီခံကပၤတၫ်ခးလိာ်သးကဲထီၣ်၀ဲ၀ံၤ သုးခိၣ်စိတဂၤပာ်ဃုာ်အပှၤသုးဖိ(၇)ဂၤ သံ၀ဲအဂ့ၫ် ထုးထီၣ်ပာ်ဖျါဃၣ်၀ဲန့ၣ်လီၤ.
